މަސައްކަތުގެ މާހައުލު ރައްކާތެރި ކުރުމަށް އިންޑަސްޓްރިއަލް ރިލޭޝަންސް ބިލް ފާސްކުރުމަށް ސަރުކާރުން ކުރި ވައުދު ކޮބާ؟

އިންޑަސްޓްރިއަލް ރިލޭޝަންސް ބިލަކީ ރާއްޖޭގެ އެކި ދާއިރާތަކުގެ މަސައްކަތްތެރިންގެ ހުރި ކަންބޮޑުވުންތަކާއި މައްސަލަތަކަށް ޙައްލު ކުރުމުގެ ގޮތުން އެކުލަވާލާ ބިލެކެވެ. މިހާރު ޑްރާފްޓްކުރުމުގެ މަސައްކަތްކުރިއަށްދާ އިންޑަސްޓްރިއަލް ރިލޭޝަންސް ބިލް، ވަރަށް އަވަހަށް ރައްޔިތުންގެ މަޖިލީހަށް ހުށަހަޅުއްވާނެކަމަށް ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙް ވަނީ ދާދިފަހުން މަސައްކަތެރިންނާ ގުޅޭ އެކި ޖަމުޢިއްޔާ ޖަމާޢަތްތައް ތަމްޞީލުކުރުމަށް އެކުލަވާލައިފައިވާ މޯލްޑިވްސް ޓްރޭޑް ޔޫނިއަން ކޮންގްރެސް (އެމް.ޓީ.ޔޫ.ސީ)ގެ މެންބަރުންނާ ބައްދަލުކުރައްވައި، ވިދާޅުވެފައެވެ.

އިންޑަސްޓްރިއަލް ރިލޭޝަންގެ ބިލަކީ މަސައްކަތްތެރިންގެ ގިނަ ހައްޤުތަކެއް ކަށަވަރުކޮށްދޭ ބިލެކެވެ. މި ބިލް ހުށައެޅުމުގެ ބޭނުމަކީ ވަޒީފާ ދޭ ފަރާތާއި ވަޒީފާ އަދާކުރާ ފަރާތުގެ މެދުގައި އޮންނަ ގުޅުން ބަދަހިކުރުމަށް ޖަމިއްޔާތަކާއި ޓްރޭޑް ޔޫނިއަންތައް އުފެއްދުމާއި، އަދި އެ ޖަމިއްޔާތަކުގެ މެދުގައި ކަލެކްޓިވް ބާރގެއިނިންގ ސިސްޓަމެއް ޤާއިމުކުރުމެވެ. މީގެ އިތުރުން އިންސާނީ ހައްޤުތައް ހިމާޔަތްކޮށް، ހިއުމަން ޓްރެފިކިންގ ފަދަ ނުރަނގަޅު ކަންކަމުން ދިވެހިރާއްޖޭގެ އިޤްތިސާދާއި ވަޒީފާގެ ބާޒާރު ރައްކާތެރި ކުރުންވެސް މި ބިލުގެ މަޤުސަދު ތަކުގެ ތެރޭގައި ހިމެނެއެވެ.

މިއަހަރުގެ މަސައްކަތްތެރިންގެ ދުވަހު އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވެފައިވަނީ 2020 ވަނަ އަހަރަކީ މަސައްކަތްތެރިންނަށް ވަރަށް ދަތި އުނދަގޫ އަހަރެއްކަމަށެވެ. އެގޮތުން އިންޑަސްޓްރިއަލް ރިލޭޝަންގެ ބިލް މިއަހަރު ނިމުމުގެ ކުރިން ފާސްކުރައްވާނެކަމަށް ވަނީ ވިދާޅުވެފައެވެ. ނަމަވެސް މި ބިލް އަދިވެސް ހުށައަޅާފައިނުވާތީ ބައެއް ފަރާތްތަކުން ވަނީ ކަންބޮޑުވުން ފާޅުކޮށްފައެވެ. ސޯސަލް މީޑިއާގައި ބައެއް ފަރާތްތަކުން މިއަހަރު ފާސްކުރާނެކަމަށް ބުނެފައިވާ ބިލް އަދިވެސް މަޖިލީހަށް ހުށައަޅާފައިނުވަނީ ކީތްވެތޯ ވަނީ ސުވާލުއުފައްދާފައެވެ.