ދަބަސް ބަރުވެގެން ކުދިންނަށް އެތަށް ގެއްލުންތަކެއް، ސުކޫލްތަކުގައި ލޮކަރު ބަހައްޓާނީ ކޮން އިރަކުން؟

ސްކޫލަށްދާއިރު ކުދިން ގެންދާ ފޮތްދަބަސްތައް ބަރުވާ ވާހަކައަކީ ވަރަށް ގިނައިން ދެކެވޭ ވާހަކައެކެވެ. ކުޑައިރު މިހާބަރު ފޮތްދަބަހެއް ކޮންމެ ދުވަހަކު އުފުލުމަކީ އޭގެ ސަބަބުން ކުއްޖާއަށްވެސް އެތަކެއް ގެއްލުންތަކެއް ލިބިގެންދާނެކަމެކެވެ.

ކަށީގެ ޑޮކްޓަރުން ވިދާޅުވާގޮތުގައި ނުވަ އަހަރުން ފެށިގެން ފުރާވަރު އުމުރުގެ ކުދިން ގައިގައި ރިއްސާތީ ފުދޭވަރަކަށް ގިނައިން ދައްކަން ދާ ކަމަށެވެ. ބަރުދަބަސް އުފުލައިގެން އެކަމުގެ އަސަރު ޅައުމުރުގައި ނުފެނުނު ކަމުގައި ވިއަސް ގެއްލުން ފެންނާނީ މެދު އުމުރާ ހިސާބަށް ދިއުމުންނެވެ. އެހެންވެ މިއީ ގައުމީ ފެންވަރުގައި އިދާރާތަކުން ވިސްނައިގެން އަވަސް ހައްލެއް ގެންނަންޖެހޭ ކަމެކެވެ.

advertisement

ފޮތް ދަބަސް ބަރުވުމުގެ މައްސަލަ ހައްލުކުރުމަށް ސްކޫލްތަކަށްވެސް ކުރެވިދާނެ ކަންކަން އެބަހުއްޓެވެ. އެގޮތުން ސްކޫލްގައި ކޮންމެ ކުއްޖަކަށް ލޮކަރެއް ބެހެއްޓިދާނެއެވެ. މީގެ ސަބަބުން ކޮންމެ ދުވަހަކު ދަރިވަރު ސްކޫލަށް އުފުލަންޖެހޭ ފޮތުގެ އަދަދު މަދުވެ ދަބަހަށް ލުއިވެގެންދާނެއެވެ.

ދަބަސް ބަރުވުމުގެ މައްސަލަ އަށް ރަސްމީ ސިފައެއްގައި ހައްލެއް ނުގެނެވޭ ނަމަ، ބެލެނިވެރިޔާ ވިސްނައިގެން ކުރެވިދާނެ ކަންކަންވެސް އެބަހުއްޓެވެ. އެގޮތުން ދަރިފުޅުގެ ބަރުދަނަށް ބަލާފައި ފޮތް ދަބަސް ތައްޔާރުކުރުމާއި ދަރިފުޅުގެ ހަށިގަނޑު ވަރުގަދަކުރުން މިއީ ކުރެވިދާނެކަމެކެވެ.