ޕެންޝަންގެ އަސްލު މަންފާ މަސައްކަތްތެރިންނަށް ލިބޭނީ އަސާސީ މުސާރަތަކަށް ހެޔޮ ބަދަލެއް ގެނެވިގެން

ޕެންޝަންގެ އަސްލު މަންފާ މަސައްކަތްތެރިންނަށް ކުރާނީ އަސާސީ މުސާރަ ތަކަށް ހެޔޮ ބަދަލެއް ގެނެވިގެންކަމަށް މޯލްޑިވްސް ޓްރޭޑް ޔޫނިއަން ކޮންގްރެސްއިން ވިދާޅުވެއްޖެއެވެ.

މޯލްޑިވްސް ޓްރޭޑް ޔޫނިއަން ކޮންގްރެސްއިން ވިދާޅުވީ، މިނިމަމް ވޭޖް އަކީ އަސާސީ މުސާރަ ގޮތުގައި ކަނޑައަޅަން ޖެހޭކަމަށެވެ. މިނިމަމް ވޭޖްގައި އެލަވަންސް ތައް ހިމެނުމުން މަސައްކަތްތެރިންގެ އިންކަމް ސެކުއުރިޓީ އަދި ސޯޝަލް ސެކިއުރިޓީ ދަށްވާނެކަމަށް އެ ޔޫނިއަނުން ވަނީ ބުނެފައެވެ.

advertisement

މިނިމަން ވޭޖް ކަނޑައެޅުމަކީ ރައީސް އިބްރާހިމް މުޙައްމަދު ޞާލިޙުގެ ރިޔާސީ ވައުދުތަކުގެ ތެރޭގައި ހިމެނޭ މުހިއްމު ވަޢުދެކެވެ. ނަމަވެސް އަދިވެސް މިނިމަމް ވޭޖް ތަންފީޒްކުރަން ފެށިފައެއް ނުވެއެވެ.

މަސައްކަތްތެރިންނަށް އެންމެ ކުޑަ އުޖޫރަ ނުވަތަ މިނިމަމް ވޭޖުގެ ގޮތުގައި 6،400ރ ހަމަޖެއްސުމަށް މިނިމަމް ވޭޖް އެޑްވައިޒަރީ ބޯޑުން އިކޮނޮމިކް މިނިސްޓަރަށް ވަނީ ލަފާވެސްދީފައެވެ.

ނަމަވެސް މިނިމަމް ވޭޖް އަވަސްކުރުމަށް ގޮވާލާ މުއަސަސާތަކުން އަންގަނީ މިނިމަމް ވޭޖްގައި އެލަވަންސްތައް ނުހިމެނުމަށް އިލްތިމާޒްކުރަމުންނެވެ.

މިނިމަމްވޭޖް ކަނޑައެޅުމުގައި 9 ދާއިރާއެއް ވަނީ ޚާއްސަކޮށްފައެވެ. އެދާއިރާތަކަކީ މަސްވެރިކަމާއި ދަނޑުވެރިކަމުގެ ސިނާއަތް، ފަތުރުވެރިކަމުގެ ސިނާއަތް، ކޮންސްޓްރަކްޝަން މަސައްކަތުގެ ސިނާއަތް، ދަތުރުފަތުރުގެ ސިނާއަތް، ސިއްހީ ހިދުމަތުގެ ދާއިރާ، ތައުލީމީ ހިދުމަތުގެ ދާއިރާއެވެ. މީގެއިތުރުން ކުދި އަދި މެދު ފަންތީގެ ވިޔަފާރިތަކުގެ ދާއިރާ، އިންފޮމޭޝަން، ކޮމިއުނިކޭޝަން އަދި ޓެކްނޮލޮޖީގެ ދާއިރާއާއި މެރިޓައިމް ދާއިރާއެވެ.