“އޭ.ޑީ.ބީގެ ޕްރޮޖެކްޓްތައް ހިންގުމުގައި ހިއުމަންޓް ރައިޓްސް ކޮމްޕޯނަންޓް ނުބެލެހެއްޓޭ”

އޭ.ޑީ.ބީގެ ޕްރޮޖެކްޓްތައް ހިންގުމުގައި “ހިއުމަންޓް ރައިޓްސް” ކޮމްޕޯނަންޓް އެންމެ ރަގަޅަށް މޮނިޓަރކުރެވި ބެލެހެއްޓެމުން ނުދާކަމަށް މޯލްޑިވްސް ހެލްތް ޕްރޮފެޝަނަލް ޔޫނިއަންއިން ވިދާޅުވެއްޖެއެވެ. އެ ޔޫނިއަނުން ފިނޭންސް މިނިސްޓަރ އިބްރާހިމް އަމީރަށް ފޮނުވި ސިޓީއެއްގައި ވިދާޅުވީ، ދިވެހި ރާއްޖޭގައި ހިންގޭ އޭ.ޑީ.ބީގެ ގިނަ މަޝްރޫޢުތަކެއް، ޕަބްލިކް ސެކްޓަރ، ސިއްހީ ދާއިރާ އަދި ތައުލީމީ ދާއިރާ އަދި އުމްރާނީ ތަރައްގީގެ މަޝްރޫއުތައް ފަދަ މަސައްކަތްތެރިން ގިނަ ދާއިރާތަކުގައި ކުރިއަށް ދާއިރު، ރާއްޖޭގައި މަސައްކަތްތެރިންގެ ޔޫނިއަންތައް ހަރަކާތްތެރިވުމަށް ޤާނޫނީ ރައްކާތެރިކަން ނެތްކަން ފާހަގަކުރާކަމަށެވެ. އަދި މިފަދަ މަޝްރޫޢުތައް ހިންގާ އިރު މަސައްކަތްތެރިންގެ މަސައްކަތުގެ މާޙައުލުގެ ރައްކާތެރިކަން ކަށަވަރުކުރުމަށާއި، އެމީހުންނަށް ވަޒީފާގެ ކުރިއެރުން ހޯދައިދީ އަދި ތަމްރީންއާއި ހުނަރުވެރިކަން ކުރިއެރުވުމަށް މަސައްކަތްނުކުރެވޭކަން ފާހަގަކުރާކަމަށެވެ.

ހާއްސަކޮށް، ސިއްހީ ދާއިރާގައި ހިދުމަތް ދިނުމަށް އެންމެ އެކަށޭނަމިންވަރަށް މުއައްޒަފުން ނެތުމުން، ގިނަ ވަގުތު މަސައްކަތުގައި އުޅެންޖެހުމާއި، މުއައްޒަފުންގެ މެދުގައި ތަފާތުކުރުން އޮތުމާއި، އަދި ސިއްހީ ދާއިރާއަށް ކުރު މުއްދަތުގެ ކޮންޓްރެކްޓްއަށް މުއައްޒަފުންނަމުންދާކަން ވަރަށް ހިތާމައާއިއެކު ފާހަގަކުރާކަމަށް އެ އެސޯސިއޭޝަނުން ވަނީ ވިދާޅުވެފައެވެ.

މޯލްޑިވްސް ހެލްތް ޕްރޮފެޝަނަލްސް ޔޫނިއަންއަކީ، ޕަބްލިކް ސަރވިސް އިންޓަރނޭޝަނަލްގެ މެންބަރެއްގެ ހައިސިއްޔަތުން، މުޅި ދުނިޔޭގައި ހިންގޭ އޭ.ޑީ.ބީގެ މަޝްރޫޢުތަކުގައި، މަސައްކަތްތެރިންގެ ހައްގުތައް ހިފެހެއްޓުމަށް، އޭ.ޑީ.ބީގެ ބޯޑުގައި ރާއްޖެއިން ހިމެނިވަޑައިގަންނަވާ ގަވަނަރގެ ހައިސިއްޔަތުން، ފިނޭންސް މިނިސްޓަރ ވަކާލާތުކޮށްދެއްވުމަށް އެދޭކަމަށް އެސޯސިއޭޝަނުން ފޮނުވި ސިޓީގައި ވަނީ ބުނެފައެވެ.
ހަމަ، މިއާއިއެކު ރާއްޖޭގައި ހިންގޭ ތަރައްޤީގެ މަޝްރޫޢުތަކުގައި މަސައްކަތްތެރިންގެ ހައްޤުތަކަށް ރައްކާތެރިކުރުމަށް ވަނީ ގޮވާލާފައެވެ. ރާއްޖޭގައި ހިންގާ އޭ.ޑީ.ބީގެ މަޝްރޫޢުތަކުގައި، ލޭބަރ ސްޓޭޑްޑަޑްސް ހިފަހައްޓާ މިންވަރު ބަލައި، އަދި ސްޓޭންޑަޑްސްތަކާއި ހިލާފުކަންކަން، އޭ.ޑީ.ބީ އަދި އިންޓަރނޭޝަނަލް ފެޑެރޭޝަންތަކަށް މިޔޫނިއަންއިން ރިޕޯރޓްކުރަމުންގެންދާނެކަމުގައި ވެސް ވަނީ ފަހަގަކޮށްފައެވެ.