ސައިން ލެންގުއޭޖް އަކީ ހުރިހާ ސުކޫލެއްގައިވެސް ދަސްކޮށްދޭން ޖެހޭ އެއްޗެއް

ކޮންމެ ހައިސްކޫލެއްގައިވެސް ތަފާތު ބަހުރުވަ ދަސްކޮށްދޭ ކްލާސްތައް ހުރެއެވެ. އޭގެތެރޭގައި ފްރެންޗް، ސްޕެނިޝް، ޖަރމަނީ ފަދަ ބަސްތައް ހިމެނެއެވެ. ނަމަވެސް ވަރަށް މުހިންމު ބަހެއް ދަސްކޮށްދިނުމަށް ސްކޫލްތަކުން ވަނީ އިހްމާލުވެފައެވެ. އެއީ ސައިންލޭންގްއޭޖްއެވެ. ނުވަތަ އިޝާރާތުގެ ބަހުރުވައެވެ. 

އިޝާރާތްކޮށްގެން ވާހަކަދެއްކުން (އިޝާރާތުގެ ބަހުރުވަ) އަކީ ދުނިޔޭގައި ގިނަ އަދަދެއްގެ މީހުން ވާހަކަދައްކާ އުޅޭ ބަހުރުވައެކެވެ. ނަމަވެސް މިއީ ގިނަ ސްކޫލްތަކުގެ ކައިކިއުލަމްގައި ކިޔަވައިދޭ ބަހުރުވައެއްނޫނެވެ. ނަމަވެސް މި ބަހުރުވަ ސްކޫލްތަކުގައި ކިޔަވައިދިނުމަކީ ވަރަށް މުހިންމުކަމެކެވެ. އަދި ކިޔަވައިދޭންޖެހޭ ސަބަބުތައްވެސް ގިނަގުނައެވެ. 

advertisement

މުޅި ދުނިޔޭގައިވެސް މި ބަހުރުވަ ބޭނުންކުރާ މީހުންގެ އަދަދު އިތުރުވުމާއިއެކު މިއީ ކޮންމެހެންވެސް ދަސްކޮށްދޭންޖެހޭ ބަހުރުވައެކެވެ. މުޅި ދުނިޔޭގައިވެސް އިޝާރާރުގެ ބަހުރުވައިން ވާހަކަދައްކާ މީހުންގެ އަދަދު 70 މިލިއަނަށް އަރައެވެ. މީގެތެރެއިން %13 އަކީ ޓީނޭޖް އުމުރުގެ ކުދިންނެވެ. އެހެންކަމުން ސްކޫލްތަކުގައި އެހެނިހެން ބަހުރުވަ ދަސްކޮށްދޭހެން އިޝާރާތުގެ ބަހުރުވަ ދަސްކޮށްދިނުމަކީ މިބަހުން ވާހަކަދައްކާ މީހުންގެ ދިރިއުޅުން އިތުރަށް ފަސޭހަވެ އެފަދަ މީހުންނަށް އެހެންމީހުންނާއި ވާހަކަދައްކާލުމުގެ ފުރުސަތު ފަހިވެގެންދާނެކަމެކެވެ.

ސްކޫލްގެ މާހައުލުގައި އިޝާރާތުގެ ބަހުރުވަ ކިޔަވައިދޭނަމަ ޙާއްސައެހީއަށް ބޭނުންވާ ކުދިންނަށް ސޯސަލައިޒްވެ އުޅުމަށް މަގުފަހިވެގެންދާނެއެވެ.  ރާއްޖޭގެ ސްކޫލްތަކުގައިވެސް އިޝާރާތުގެ ބަހުރުވަ ބޭނުންކުރަނީ ހަމައެކަނި ޙާއްސަ އެހީއަށް ބޭނުންވާ ކުދިންނަށް ކިޔަވައިދިނުމަށެވެ. މިބަސް ސްކޫލްތަކުގައި ކިޔަވައެއްނުދެއެވެ. މިހެން ވުމުގެ ސަބަބުން ޙާއްސައެހީއަށް ބޭނުންވާ ކުދިންނާއި އެހެން ކުދިންނާއި ދެމެދު މާބޮޑު ގުޅުމެއް ނޯވެއެވެ.

ސްކޫލް މާހައުލުގެ އިތުރުން ވަޒީފާއަކަށް ކުރިމަތިލާއިރުވެސް އިޝާރާތުގެ ބަހުރުވަ އިނގުމަކީ ފައިދާއަކަށްވާނެއެވެ. ވަޒީފާއަކަށް ކުރިމަތިލާއިރު ވަނަވަރުގައި އިޝާރާތުގެ ބަހުރުވަ އިނގޭކަމަށް ޖަހާފައިވާނަމަ އެމީހަކަށް އިތުރު ފުރުސަތުތައް ފަހިވެގެންދާނެއެވެ. މިސާލަކަށް އޮފީހެއްގެ ރިސެޕްޝަނަށް ނުވަތަ ވެއިޓަރަކަށް އެޕްލައިކުރާ މީހަކަށް އިޝާރާތުގެ ބަހުރުވަ އިނގޭނަމަ އެތަނަށް އަންނަ އިޝާރާތުގެ ބަހުރުވައިން ވާހަކަދައްކާ މީހުންނާއި މުހާތަބުކުރަން ފަސޭހަވާނެއެވެ.

ޙާއްސައެހީއަށް ބޭނުންވާ ކުދިންގެ ނިސްބަތް އިތުރުވަމުން އަންނައިރު ސްކޫލްގެ މާހައުލުގައި ކުދިންނަށް މި ބަސް ދަސްކޮށްދިނުމަކީ މުހިންމު ކަމެކެވެ. މީގެ ސަބަބުން ޙާއްސަ އެހީއަށް ބޭނުންވެފައިވާ ކުދިންނަށް މުޖްތަމައުން ބާކީވެފައިވާ އިހްސާސްނުވެ އެހެންމީހުންނާއި ވާހަކަދައްކާލާ މަޖާ އުފާވެރި މާހައުލެއްގައި އުޅުމުގެ ފުރުސަތު ލިބިގެންދާނެއެވެ. މިހާރު އިޝާރާތުގެ ބަހުރުވަ އެނގެނީ ހަމައެކަނި އެކުދިންގެ އާއިލާއަށާއި ރަހުމަތްތެރިންނަށެވެ. ނަމަވެސް ސްކޫލްތަކުގައި މިބަސް ދަސްކޮށްދޭން ފެށުމުން މުޖްތަމައުގެ ގިނަ ބަޔަކަށް މި ބަހުން ވާހަކަދައްކަން ދަސްވެގެންދާނެއެވެ.