“މަސައްކަތް ކުރާ މާހައުލުގެ ގޮތުން ކެންސަރު ޖެހޭ!”

މަސައްކަތްކުރާ މާހައުލުގެ ސަބަބުން ކެންސަރު ޖެހޭ މީހުންގެ އަދަދު އިތުރުކަމަށް ކެންސަރ އޮޕަރޭޝަންގެ ޙާއްސަ ޑޮކްޓަރ މުޙައްމަދު ޝިފާން ވިދާޅުވެއްޖެއެވެ. 

އޮކިއުޕޭޝަނަލް ކެންސަރަކީ މަސައްކަތްކުރާ ތަނެއްގެ ސަބަބުން ނުވަތަ މަސައްކަތްކުރާ މާހައުލަކުން ހުށައެޅޭ ސަބަބުތަކާއި ހުރެ ނުވަތަ ދިމާވާ ކަމަކާއި ހުރެ ކެންސަރަށް ހުށައެޅުމެވެ. ޑރ. ޝިފާން ވިދާޅުވީ، ތަފާސްހިސާބުތައް ދައްކާގޮތުން އަހަރަކު ގާތްގަނޑަކަށް 2 ލައްކައަށްވުރެ ގިނަ މީހުންނަށް ވަޒީފާ އަދާކުރާ މާހައުލުގެ ސަބަބުން ކެންސަރު ޖެހޭކަމަށެވެ.

advertisement

“ޑަބްލިއުއެޗްއޯގެ ތަފާސްހިސާބުތައް ދައްކާގޮތުގައި އަހަރަކު ގާތްގަނޑަކަށް 2 ލައްކައަށްވުރެ ގިނަ ބޭފުޅުން މަސައްކަތްކުރާ މާހައުލުގެ ސަބަބުން މެދުވެރިވާ ކަންތަކާއިހެދި ކެންސަރ ޖެހިގެންދޭ. ޙާއްސަކޮށް ރާއްޖޭގައިވެސް މިވަގުތު އަންނަނީ ކެންސަރު ގިނައިން ޑައިގްނޯޒް ކުރެވެމުން. މިދެންނެވި ސަބަބކީވެސް ރާއްޖޭގައިވެސް މުހިންމު ވެގެންދާނެ ސަބަބަކަށް ވާނެ ކެންސަރަށް ހުށައެޅޭ.” ޑރ. ޝިފާން ވިދާޅުވިއެވެ.

ވަޒީފާއަދާކުރާ މާހައުލުގައި ގެންގުޅޭ ސާމާނުގެ ސަބަބުން ނުވަތަ ގެންގުޅެވޭ އާދަތަކެއްގެ ސަބަބުން އޮކިއުޕޭޝަނަލް ކެންސަރު ޖެހިދާނެއެވެ. ޑރ. ޝިފާން ވިދާޅުވީ، މިސާލަކަށް އެސްބެސްޓޯސް ނޫނިއްޔާ ސިލިކާ ނޫނިއްޔާ ވުޑް ޑަސްޓް ފަދަ ބާވަތްތަކަކީ ކެންސަރަށް ހުށައެޅޭ ތަކެތިކަމަށެވެ. އާންމުގޮތެއްގައި މިފަދަ މާއްދާއެއް ހަށިގަނޑަށް ހުށައެޅޭ 3 ގޮތެއް އޮންނަކަން ޑރ ޝިފާން ފާހަގަކުރެއްވިއެވެ. ފުރަތަމަ ގޮތަކީ ލާނޭވާގެ ސަބަބުންނެވެ. 2 ވަނަ ގޮތަކީ ހަމުގެ ޒަރިއްޔާއިން އަދި 3 ވަނަ ގޮތަކީ ހަށިގަނޑުގެ އެތެރެއަށް ކާއެއްޗެއްގޮތައް ނުވަތަ ބޯއެއްޗެއްގޮތައް އެތެރެވުމެވެ.

ޑރ. ޝިފާން ވިދާޅުވީ، ވަޒީފާއަދާކުރާ މާހައުލުގެ ސަބަބުން ކެންސަރުޖެހުން ހުއްޓުވުމަށްޓަކައި ކުރެވިދާނެ ކަންތައްތަކެއް އެބަހުރިކަމަށެވެ. އޭގެތެރޭގައި މަސައްކަތްކުރާ ތަނެއްގައި ދުންފަތުގެ އިސްތިއުމާލު ނުކުރުމާއި އަދި ދުފާއެއްޗެހި ނުބެހެއްޓުން ހިމެނެއެވެ. މިކަންކަމަކީ މަސައްކަތްކުރާ މީހުންނާއި އަދި ވަޒީފާދޭ މީހުންވެސް މިކަމަށް ސަމާލުވުން މުހިންމު ކަމެއްގެ ގޮތުގައި ޑޮކްޓަރ ވަނީ ފާހަގަކުރައްވާފައެވެ.