ރާއްޖޭގައި ކޮންމެ 10 މީހުން ތެރެއިން އެކަކީ ނުކުޅެދުންތެރިކަން ހުންނަ މީހެއް

ރާއްޖޭގެ އާބާދީގައި ނުކުޅެދުންތެރިކަން ހުންނަ މީހުންގެ ނިސްބަތް އިތުރެވެ. ދިވެހި އާބާދީއަށް ބަލާއިރު %9 އަކީ ނުކުޅެދުންތެރިކަން ހުންނަ މީހުންނެވެ. މިއީ ކޮންމެ 10 މީހުންގެ ތެރެއިން އެކަކެވެ.

އުމުރުން 5 އަހަރާއި 17 އަހަރާއި ދެމެދުގެ ކުދިންނަށް ބަލާއިރު ނުކުޅެދުންތެރިކަން ހުންނަ ކުދިންގެ ނިސްބަތަކީ %4 އެކެވެ. އުމުރުން ދުވަސްވާ ވަރަކަށް ނުކުޅެދުންތެރިކަން އިތުރުވާކަމަށް ތަފާސްހިސާބުތަކުން ދައްކައެވެ. ރާއްޖޭގައި އުމުރުން 75 އަހަރުން މަތީގެ މީހުންގެ މެދުގައި ނުކުޅެދުންތެރިކަން ހުރި މިންވަރަކީ %58 ކެވެ.  އުރުމުން ދުވަސްވީ މީހުންގެ ތެރޭގައި ނުކުޅެދުންތެރިކަން ހުންނަ މީހުންގެ ތެރޭގައި އެންމެ ގިނައީ ހިނގާ ބިނގާވެ ނޫޅެވޭ މީހުންނެވެ.

advertisement

އެއްބާވަތައްވުރެ ގިނަ ބާވަތުގެ ނުކުޅެދުންތެރިކަން ހުންނަ މީހުންގެ ނިސްބަތްވެސް ރާއްޖޭގައި ގިނައެވެ. އެގޮތުން ރާއްޖޭގެ އާބާދީގެ %35 މީހުންނަކީ އެއްބާވަތައްވުގެ ގިނަ ބާވަތުގެ ނުކުޅެދުންތެރިކަން ހުންނަ މީހުންނެވެ. އަންހެނުންނަށްވުރެ ފިރެހެނުންގެ މެދުގައި އެއްބާވަތައްވުރެ ގިނަ ބާވަތުގެ ނުކުޅެދުންތެރިކަން ހުންނަ މިންވަރު އިތުރުކަމަށް ތަފާސްހިސާބުތަކުން ދައްކައެވެ.

ނުކުޅެދުންތެރިކަން ހުންނަ މީހުންނަށް ރާއްޖޭގައި ވަނީ ފަހި ތައުލީމުގެ ފުރުސަތުތަކެއް ފަހިކޮށްދީފައެވެ. އެގޮތުން އުމުރުން 5 އަހަރުން މަތީގެ ނުކުޅެދުންތެރިކަން ހުންނަ އާބާދީގެ  %91 ކުދިން ސްކޫލަށްދެއެވެ. އަދި އުމުރުފުރާ މަތިވާ ވަރަކަށް ސްކޫލަށްދާ ކުދިންގެ އަދަދު ދަށްވާކަމަށްވެސް ތަފާސްހިސާބުތަކުން ދައްކައެވެ.

10 އަހަރުން މަތީގެ ނުކުޅެދުންތެރިކަން ހުންނަ މީހުންގެ އާބާދީގެ %90 މީހުން ދިވެހިބަހުން ލިޔަން ކިޔަން ދަނެއެވެ. އިނގިރޭސިބަހުން ލިޔަންކިޔަން އިނގެނީ މި އާބާދީގެ ތިންބައިކޮށްފަ އެއްބައި މީހުންނަށެވެ.

ނުކުޅެދުންތެރިކަން ހުންނަ މީހުންގެ އާބާދީގައި ގިނައީ އިންފޯމަލް ސެކްޓަރގައި މަސައްކަތްކުރާ މީހުންކަމަށް ތަފާސްހިސާބުތަކުން ދައްކައެވެ.