އުފެއްދުންތެރި ކުދި ވިޔަފާރިތަކުގެ 61 އިންސައްތައަކީ އަންހެނުން

ކުދި ފަންތިއާއި މެދު ފަންތީގެ ވިޔަފާރިތަކަކީ ރާއްޖޭގެ އިޤްތިޞާދުގައި މުހިންމު ދައުރެއް އަދާކުރާ ވިޔަފާރިތަކެކެވެ. ކުދި ވިޔަފާރިތަކުގެ ތެރެއިން އެންމެ ބޮޑު އިންސައްތައެއް ހިއްސާކުރަނީ މެނިފެކްޓަރިން ސިނާއަތުގެ ވިޔަފާރިތަކެވެ. މި ސިނާއަތުގައި މަސައްކަތްކުރާ ވިޔަފާރިތަކުގެ އަދަދަކީ 16،029 އެކެވެ.

މެނިފެކްޗަރިންގ ސިނާއަތުގައި މަސައްކަތްކުރާ ވިޔަފާރިތަކުގައި ގިނައިން މަސައްކަތްކުރަނީ އަންހެނުންކަމަށް ތަފާސްހިސާބުތަކުން ދައްކައެވެ. އެގޮތުން މި ސިނާއަތުގައި މަސައްކަތްކުރާ މީހުންގެ %61 އަކީ އަންހެނުންނެވެ. ފިރެހެނުންގެ ނިސްބަތަކީ %13 އެވެ.

ރާއްޖޭގެ ކުދި ފަންތިއާއި މެދުފަންތީގެ ވިޔަފާރިތަކުގައި 2 ވަނައަށް އެންމެ ގިނައީ ތައުލީމީ ސިނާއަތުގައި ހަރަކާތްތެރިވާ ވިޔަފާރިތަކެވެ. ތައުލީމީ ދާއިރާގައި 5،011 ވިޔަފާރި އަންނަނީ ހަރަކާތްތެރިވަމުންނެވެ. ތައުލީމީ ދާއިރާގެ ވިޔަފާރިތަކުގައިވެސް ފިރެހެނުންނަށްވުރެ އަންހެނުން ހަރަކާތްތެރިވާ މިންވަރު އިތުރެވެ. މި ސިނާއަތުގައި ހަރަކާތްތެރިވާ އަންހެނުންގެ އަދަދަކީ %15 އެވެ. އަދި ފިރެހެނުންގެ އަދަދަކީ ހަމައެކަނި %1 އެވެ.

ނަމަވެސް ހޯލްސޭލް އަދި ރީޓެއިލް ވިޔަފާރިތަކުގައި ހަރަކާތްތެރިވާ އަންހެނުންނަށްވުރެ ފިރެހެނުންގެ އަދަދު އިތުރެވެ. މި ސިނާއަތުގައި ޖުމްލަ 4199 ވިޔަފާރި އަންނަނީ ހަރަކާތްތެރިވަމުންނެވެ. މީގެތެރެއިން ފިރެހެނުންގެ ނިސްބަތަކީ %24 އެވެ. އަދި އަންހެނުންގެ ނިސްބަތަކީ %9 އެވެ.