ރާއްޖޭގައި ފެނުގެ ރައްކާތެރިކަން ކަށަވަރު ނުކުރެވެނީ ބިން ނެތުމުން

އިރުވައި މޫސުމުގެ ހޫނު ދުވަސްތަކުގައި ރާއްޖޭގެ ބައެއް ރަށްރަށް ފެނަށްޖެހުމުގެ މައްސަލަތައް ދިމާވެއެވެ. ފެނަށް ޖެހޭ ރަށްރަށަށް ސަރުކާރުން ފެންވެސް ފޯރުކޮށްދެއެވެ. އަދި މި މައްސަލަ ހައްލުކުރުމަށް ގިނަ މަސައްކަތްތަކެއްވެސް ކުރެއެވެ. މިދިޔަ އަހަރުތަކުގެ ތެރޭގައިވެސް 80 އަށްވުރެ ގިނަ ރަށަކުން ވަނީ ބޯފެނަށް ޖެހިގެން ސަރުކާރަށް އެހީތެރިކަމަށް އެދިފައެވެ.

ދިރާސާއަކުން ދައްކާގޮތުން ހޫނު މޫސުމުގައި ރާއްޖޭގެ ރަށްރަށައް ވާރޭފެނަށް ޖެހުމުގެ މައްސަލަ ދިމާވަނީ މީހުން ދިރިއުޅޭ ރަށްރަށުގައި އެންމެ އެދެވޭގޮތުގައި ވާރޭފެން ރައްކާކުރާ ނިޒާމުތައް ޤާއިމްވެފައި ނެތުމުގެ ސަބަބުންނެވެ. މީހުން ދިރިއުޅޭ ގޭބީސީތަކުގައާއި އަދި ރަށު ފެންވަރުގައިވެސް ވާރޭފެން ރައްކާކުރެވޭނެ ނިޒާމްތައް ޤާއިމްކުރަންޖެހެއެވެ.

advertisement

ރައްކާތެރި ސާފު ބޯފެން ރައްކާކުރުމުގައި ރަށްރަށަށް ބޮޑެތި ދަތިތަކެއް ވަނީ ކުރިމަތިވެފައެވެ. ބައެއް ރަށްރަށަށް ކަޅު ހަން ފޯރުކޮށްދީފައިވީނަމަވެސް މިއީ މިމައްސަލައަށް އޮތް ދާއިމީ ޙައްލެއް ނޫނެވެ. ވާރޭ ފެން ރައްކާކުރުމުގައި ސަމާލުވާންޖެހޭ މިންވަރަށް ނުވުމުގެ ސަބަބުން ސިއްޙީ އެތައް މައްސަލަތަކެއް ކުރިމަތިވުމުގެ ކަންބޮޑުވުން ރައްޔިތުން އަންނަނީ ފާޅުކުރަމުންނެވެ. އެގޮތުން ރައްކާތެރިކަމަށް ބެލުމެއް ނެތި ނަގާ ވާރޭ ފެނުގެ ސަބަބުން ލޮލަށް ފެނުމުން މަޙުރޫމް ވުން ނުވަތަ ލޮލަށް ފެންނަ މިންވަރު ކޮންމެވެސް ވަރަކަށް ދަށްކޮށްލާ ޖަރާސީމު މިފެނުގައި އެކުލެވެއެވެ.

އަދި މިފަދަ ކޭސްތަކެއް ރާއްޖޭގެ ބައެއް ރަށްތަކުން ރިޕޯޓުކޮށްފައިވާކަމަށްވެސް ރައީސް އޮފީހުން ވިދާޅުވެއެވެ. ވާރެފެން ރައްކާކުރެވޭނެ ނިޒާމު ޤާއިމުކުރުމުގެ މަސައްކަތްވެސް ސަރުކާރުން ދަނީ ކުރަމުންނެވެ. މިމައްސަލަ ޙައްލުކުރުމަށް ދާއިމީ ގޮތެއްގައި މިހާތަނަށް މާބޮޑުކަމެއް ކުރެވިފައި ނުވިނަމަވެސް ވަގުތީ ޙައްލު ރައްޔިތުންނަށް ހޯދައިދިނުމަށް ދައުލަތުގެ ބަޖެޓުން ކޮންމެ އަހަރެއްގައިވެސް ބޮޑު ޚަރަދެއް މިކަމަށް ހިންގައެވެ. އެގޮތުން ވޭތުވެދިޔަ ކައިރި މާޒީގައި ގާތްގަނޑަކަށް ރާއްޖޭގެ މީހުން ދިރިއުޅޭ 188 ރަށުގެ ތެރެއިން 85 ރަށަށް ހޫނު މޫސުމުގައި ފެނަށް ޖެހި ސާފު ބޯފެން ފޯރުކޮށްދިނުމުގެ މަސައްކަތްކުރަންޖެހެއެވެ. ސަރުކާރުން ހާމަކުރައްވާ ގޮތުގައި މިރަށްރަށަށް ފެން ފޯރުކޮށްދިނުމަށް ވޭތުވެދިޔަ އަހަރުތަކުގައި އަހަރެއްގެ މައްޗަށް ގާތްގަނޑަކަށް 10 މިލިއަން ރުފިޔާ ދައުލަތުން ޚަރަދުކުރެއެވެ.