ކުޑަކުދިންނަށް ޖެހޭ ކެންސަރުގެ އަލާމާތްތައް ދެނެގަތުން މުހިއްމު

ކެންސަރަކީ މިހާރު ރާއްޖޭގައި ވަރަށް އާންމު ބައްޔެކެވެ. އެކި އުމުރު ފުރާގެ މީހުންނަށް އަންނަނީ ކެންސަރު ބަލި ޖެހެމުންނެވެ. ކުޑަކުދިންނަށްވެސް ރާއްޖޭގައި ކެންސަރު ޖެހޭ މިންވަރު އަންނަނީ އިތުރުވަމުންނެވެ. ބަލީގެ ކުރީކޮޅު ދެނެގަނެވިއްޖެނަމަ މިކަމުން ސަލާމަތްވުމުގެ ފުރުސަތު އޮވެއެވެ.

ކުޑަކުދިންނަށް ޖެހޭ ކެންސަރުގެ ބައެއް އަލާމާތްތަކުގެ ތެރޭގައި ހިމެނެނީ:

advertisement

• އިންޕެކްޝަނެއްގެ އެއްވެސް އަލާމާތަކާއިނުލައި ނުވަތަ ހުމުގެ އަސަރެއްވެސްނެތި ގަނޑުލުން ނުވަތަ ދުޅަވުން
• ލޮލަށް އަންނަ ބަދަލުތައް. ލޮލުގެ ކަޅި ހުދުވުން، ލޯ އަވަރުކޮށްގެން ބަލަން ފެށުން، ލޮލުގެ ފެނުން ދަށްވުން، ލޯކައިރި ނޫފައިގަނެ ރަތްވުން، ދުވަޅުން.
• ބޮލުގައި ރިއްސުން. އާދަޔާ ހިލާފަށް ދިގުދެމިގެން ދިއުން ނުވަތަ މާބޮޑަށް ރިއްސުން، ހޮޑުލުން (ހާއްސަކޮށް ހެނދުނު ގަޑީގައި ހޮޑުލެވުން ނުވަތަ ހޮޑުލެވުން އިތުރުވުން)
• ބޯއެނބުރުން، ކާލިއެޅުން.
• ބަނޑު ދުޅަވުން
• ދޮންފޫޑުވުން، ގައިގެ ހަމުގެ ތަންތަން ރަތްވުން، ނޫފައިގަތުން، ލޭއައުން، ކަށީގައި ރިއްސުން.
• އެއްވެސް އަނިޔާއެއްނުވެ، އިންޕެކްޝަނެއްގެ އަލާމާތެއްނެތި ދުޅަވުން ނުވަތަ އަތާއި ފައިގައި ނުވަތަ ކަށީގައި ރިއްސުން.
• އަނަރޫފަވުން، ކެއްސުން، ނޭވާ ކުރުވުން، ރޭގަނޑު ދާހިތްލުން.
• ވަރުބަލިވުން، ނެގިމަޑުވުން، އުޅުމަށް ބަދަލުއައުން.

މަތީގައިވާ އެއްވެސް އަލާމާތެއް ކުޑަކުއްޖާގެ ކިބައިގެން ފެނިއްޖެނަމަ ނުވަތަ ދިގުދެމިގެންދާނަމަ ވީހާވެސް އަވަހަށް ޑޮކްޓަރަށް ދެއްކުމަކީ މުހިންމު ކަމެކެވެ. ޑޮކްޓަރަށް ދައްކައި ހަދާ ފުރަތަމަ ޓެސްޓުގައި މައްސަލައެއް ފެންނަން ނެތަސް އިތުރު އަލާމާތެއް ފެނިއްޖެނަމަ އަވަހަށް ޑޮކްޓަރަށް ދައްކައި ޑޮކްޓަރުގެ ލަފާ ހޯދުމަކީ ވަރަށް މުހިންމު ކަމެކެވެ.