ސިއްހީ ފަރުވާ އަކީ ކޮންމެ މީހަކަށް ލިބޭ ހައްގެއް، ގައިދީންނަށް ވެސް ލިބެން ޖެހޭނެ

ދިވެހިރާއްޖޭގެ ޤާނޫނުއަސާސީ ބުނާގޮތުން ރަނގަޅު ފެންވަރެއްގެ ސިއްހީ ފަރުވާއާއި، ދިރިހުރުމުގެ ހައްގާއި، އަމިއްލަ މިނިވަންކަމާއި، ނަފްސު ރައްކާތެރިކުރުމަކީ ކޮންމެ ދިވެއްސަކަށްމެ ލިބިގެންވާ ހައްގެކެވެ. ނަމަވެސް މިފަދަ ހައްގުތައް ބައެއް މީހުންނަށް އުނިވުމުގެ ޝަކުވާތައް ކުރެއެވެ. އޭގެތެރޭގައި ގައިދީން ހިމެނެއެވެ.

ރާއްޖޭގެ ހިއުމަން ރައިޓްސް ކޮމިޝަނަށް ހުށައަޅާ މައްސަލަތަކުގައިވެސް ގިނަ އަދަދެއްގެ ގައިދީންނަށް މިފަދަ އަސާސީ ހައްގުތައް އުނިވުމުގެ ޝަކުވާތައް ކުރެއެވެ. އެޗްއާރްސީއެމްގެ ރިޕޯޓުން ދައްކާގޮތުން ކޯވިޑްގެ ތެރޭގައި އައިސޮލޭޝަން އަދި ކަރަންޓީން ފެސިލިޓީތަކުގައި ތިބި ބައެއް ފަރާތްތަކަށް އެމީހުންގެ ސިއްހީ ހާލަތައް ރިއާޔަތްކޮށް ކާބޯތަކެތި ފޯރުކޮށްނުދޭކަމަށްބުނެ އެ ކޮމިޝަނަށް ވަނީ މައްސަލަތައް ހުށައަޅާފައެވެ. އަދި މި މައްސަލަތަކާއި ގުޅިގެން އެކަން އެޗްއާރްސީއެމް އިން ބެލުމަށްފަހުގައި އެގޮތައް އެކަން ހިނގާކަން ނޭޝަނަލް ޑީޒާސްޓަރ މެނޭޖްމަންޓް އޮޓޯރިޓީގެ ސަމާލުކަމަށް ގެނެސް ކުރި މަސައްކަތުން މިފަދައިން ތިބި ފަރާތްތަކަށް ކާބޯތަކެތި ލިބުމުގައި ހުރި ދަތިތަކަށް ހައްލު ލިބިފައިވާކަމަށް އެ ކޮމިޝަނުން ވަނީ ބުނެފައެވެ.

advertisement

މީގެއިތުރުން މޯލަޑިވްސް ކަރެކްޝަނަލް ސަރވިސަސްގެ ބެލުމުގެ ދަށުގައި ތިބޭ ފަރާތްތަކަށް ޑޮކްޓަރުގެ އިރުޝާދާއި އެއްގޮތައް ކާބޯތަކެތި ފޯރުކޮށްނުދޭކަމަށް ބުނެ އޭސީސީއަށް ހުށައަޅާފައިވާ މައްސަލަތަކާއި ގުޅިގެން ކޮމިޝަނުން މިކަން ބެލިބެލުމުން ބަންދުކޮށްފައިވާ ފަރާތްތަކަށް ޑޮކްޓަރުގެ އިރުޝާދާއި އެއްގޮތައް ކެއުން ފޯރުކޮށްނުދޭކަން ފާހަގަކުރެވިފައިވާކަމަށް އޭސީސީން ބުނެއެވެ. އަދި މިކަމަށް ހައްލު ހޯދުމަށް މޯލްޑިވްސް ކަރެކްޝަނަލް ސަރވިސްއާއިއެކު ކުރެވުނު މަސައްކަތައްފަހު މިކަމަށް ހައްލު ލިބިފައިނުވާތީ ބަންދުގައިވާ ފަރާތްތަކަށް ޑޮކްޓަރުގެ އިރުޝާދާއި އެއްގޮތައް ކެއުން ފޯރުކޮށްދިނުމަށް ކަރެކްޝަންގެ މައްޗަށް އޭސީސީން ވަނީ އަމުރުނެރެފައެވެ. އަދި މި އަމުރަށް ކަރެކްޝަނުން އިޖާބަދީފައިނުވާތީ ކޮޓު މެދުވެރިކޮށް މައްސަލައަށް ހައްލު ހޯދުމުގެ ގޮތުން މިދިޔަ އަހަރުގެ ތެރޭގައި މި މައްސަލަ ވަނީ މަދަނީ ކޯޓަށް ހުށައަޅާފައެވެ. އެހެންނަމަވެސް މިހާތަނަށްވެސް މި މައްސަލައަށް ހައްލު ލިބިފައިނުވާތީ އޭސީސީން މަސައްކަތް ކުރަމުންދާކަމަށް އެ ކޮމިޝަނުން ބުނެއެވެ.

މީގެއިތުރުންވެސް މިފަދަ ގިނަ މައްސަލަތަކެއް އެޗްއާރްސީއެމް އަށް ވަނީ ހުށައަޅާފައެވެ. އެގޮތުން ކަރެކްޝަންގެ ބެލުމުގެ ދަށުގައި ހުރި ފަރާތެއް އޮޕަރޭޝަންގެ ކަންކަން ކުރިއަށްގެންގޮސްފައިނުވާކަމަށްބުނެ ހުށައަޅާފައިވާ މައްސަލައެއް ޑޮކްޓަރުގެ އިރުޝާދާއި އެއްގޮތައް އޭނާއަށް އަވަސް ފަރުވާ ލިބެންޖެހޭކަމަށް ތަހުގީގަށް ފާހަގަކުރެވިގެން ޑޮކްޓަރު ދެއްވާފައިވާ އިރުޝާދާއި އެއްގޮތައް އަވަސް ފުރުސަތެއްގައި އޮޕަރޭޝަންގެ ކަންކަން ހަމަޖައްސާ ގައިދީންނާއި ބަންދުގައި ތިބޭ ފަރާތްތަކަށް ބޭނުންވާ ސިއްހީ ފަރުވާގެ ކަންކަން އަވަސް ފުރުސަތެއްގައި ޑޮކްޓަރުގެ އިރުޝާދާއި އެއްގޮތައް ހަމަޖައްސައިދިނުމަށް އެދި ކަރެކްޝަނަށް އަންގާފައިވާކަމަށް އެޗްއާރްސީއެމްގެ ރިޕޯޓުގައި ވަނީ ބުނެފައެވެ.

ގައިދީންނާއި އަދި ބަންދުގައިތިބޭ މީހުންނަށްވެސް އެހެން މީހުންނެކޭ އެއްފަދައިން އަސާސީ ހައްޤުތައް ކަށަވަރުކޮށްދޭންޖެހޭނެއެވެ. އެއީ ގާނޫނުއަސާސީން ކޮންމެ މީހަކަށްމެ ލިބެންޖެހޭނެކަމަށް ކަނޑައަޅާފައިވާ ހައްގެކެވެ.