ބުލީ ކުރުން ފެށެނީ ގޭގެ މާހައުލުން

ބްލީކުރަން ފެށެނީ މުޖްތަމައުއާއި އަދި ގޭތެރޭގެ މާހައުލުންކަމަށް ރެހެންދި ސްކޫލްގެ ޕްރިންސިޕަލް ނާޒިމް އަބްދުﷲ ވިދާޅުވެއްޖެއެވެ.

އެމްވީ ޕްލަސްއަށް ދެއްވި ޙާއްސަ އިންޓަވިއުއެއްގައި ނާޒިމް އަބްދުﷲ ވިދާޅުވީ، ސްކޫލްތަކުގައި ބްލީގެ ކޭސްތައް ގިނަކަމަށެވެ. ނަމަވެސް ބުލީކުރަން އެންމެ ފުރަތަމަ ފެށެނީ ސްކޫލްގެ މާހައުލުން ނޫންކަމަށެވެ.

advertisement

މުޖްތަމައުގެ ތެރޭގައި އެކަކު އަނެކަކާއި ގިނަ ދުވަސްތައް ބައްދަލުނުވެ ހުރެ ބައްދަލުވާއިރު އެންމެ ފުރަތަމަވެސް ބުނެވޭނީ ހާދަ ހިތްކޭ ނުވަތަ ހާދަ ފަލައޭކަމަށެވެ. މިއީ ކުދިންނަށް ބްލީކުރަން ފެށޭ ހިސާބުކަމަށް އޭނާ ވިދާޅުވިއެވެ.

ސްކޫލެއްގެ ތެރޭގައި 32 ކުދިން އުޅޭއިރު މިއިން ކޮންމެ ކުއްޖަކީވެސް ތަފާތު މުޖްތަމައަކުން، ތަފާތު އާއިލާތަކުން އައިސްތިބޭ ތަފާތު ބެކްގްރައުންޑްގެ ކުދިންކަމަށެވެ. މިކުދިންނަށް ފެނިފައި ހުންނަ މަންޒަރުތަކާއި މިކަންތައްތައް ސްކޫލްތެރޭގައި އެޕްލައިކުރުމަކީ އޮންނާނެކަމެއްކަމަށް އޭނާ ވިދާޅުވިއެވެ.

“ސްކޫލްތަކުގައި ބްލީގެ ކޭސްތައް ގިނަ. ތެދުތެދައް ބުނާނަމަ ބްލީގެ ކޭސްތައް ފެށިގެން މިއަންނަނީ އަޅުގަނޑު ނުދަންނަވާނަން ސްކޫލް ތެރެއިންނެކޭ. އަޅުގަނޑުމެންގެ މުޖްތަމައުގެ ތެރޭގައިވެސް ހަމަ އޮންނަކަމެއް އެހެންނޫންތޯ. މިސާލަކަށް އެކަކު އަނެކަކަށް ނުފެނި ގިނަދުވަސްކޮށްފަ ދިމާވާއިރު ބުނާނެ ހާދަ ފަލަމީހެކޭ. ހާދަ ހިކިއްޖެޔޭ. ހާދަ ތަފާތޭ މިހާރު. މިއީ ހަޤީގަތުގައި ފެށުން އެހެންނޫންތޯ ބުލީގެ. މިގޮތައް މުޖްތަމައުގެ ތެރޭގައި ގޭތެރޭގައި ކުދިންނަށް އެބަ އަޑުއިވޭ.”

ނާޒިމް ވިދާޅުވީ، ބްލީކުރުން ސްކޫލްތަކުގައިވެސް އޮންނަކަމަށެވެ. އެގޮތުން ރެހެންދި ސްކޫލްގައިވެސް ބްލީކުރުން އޮންނަކަމަށެވެ. އެހެންނަމަވެސް އަދި ސީރިއަސް ކޭސްއެއްގެ ގޮތުގައި ފާހަގަވާ ވަރަށް މިދިޔަ އަހަރުތެރޭގައި ބްލީކުރުން އެ ސްކޫލްގައި ނެތްކަމަށް އޭނާ ވިދާޅުވިއެވެ. ބްލީކުރުމާއި ދެކޮޅަށް ކުދިންނަށް ނަސޭހަތްތެރިވާކަމަށާއި އަދި ސެސަންތައްވެސް އެ ސްކޫލުން ނަގައިދޭކަމަށް އޭނާ ވިދާޅުވިއެވެ. ބްލީކުރުމުގެ ކަމެއް ކުޑަކޮށްވެސް ފާހަގަކުރެވިއްޖިއްޔެނަމަ އެ ސްކޫލުން ވަރަށް އަވަހަށް އެކަމަކަށް އެޓެންޑްވާކަމަށް އޭނާ ވިދާޅުވިއެވެ.