މެމްބަރުން އަދިވެސް ބޭނުންވަނީ ވީއައިޕީ ސާވިސް: ރާއްޖޭގައި އަދިވެސް ކްލާސް ސިސްޓަމް

ރައްޔިތުންގެ މަޖިލީހުގެ މެންބަރުންނަށް އެކަށީގެންވާ އިމްތިޔާޒްތައް ނުލިބޭކަމަށްބުނެ ބައެއް މެންބަރުން ޝަކުވާކޮށްފިއެވެ. މި ޝަކުވާތައް ކޮށްފައިވަނީ އެމްޑީޕީގެ ބައެއް މަޖިލިސް މެންބަރުން އެ ޕާޓީގެ ޕާލިމަންޓްރީ ވްޓްސއެޕް ގުރޫޕްގައެވެ.

މި ޝަކުވާތައް ފަށާފައިވަނީ މަޖިލީހުން ހަރަދު ކުރާ ގޮތަށް މެންބަރުންގެ ރައްޓެހިންނަށް ވެސް އެއާޕޯޓުގެ ވީއައިޕީ ލައުންޖުން ހިދުމަތް ލިބޭ ގޮތަށް އާންމު ކޮމިޓީން ނިންމި ނިންމުން ތަންފީޒު ނުކުރާނެ ކަމަށް ރިޔާސަތުން ބުނެފައި ވަނިކޮށެވެ. ސާފް ޗެންޕިއަންޝިޕްގައި  ރާއްޖެ ކުޅުނު ފުޓުބޯޅަ މެޗްގައި މެންބަރުންނަށް ރޮސްޓްރަމް އިން ޖާގަ ނުލިބުމުންވެސް ބައެއް މެންބަރުންގެ މެދުގައި ހިތްހަމަނުޖެހުން ވަނީ އުފެދިފައެވެ. އޭގެ އިތުރުން މެޗަށް ވަންނަން ކިއުގައި ޖެހިގެން ޓިކެޓް ނަގަން ޖެހުމަކީ ވެސް އެ މެންބަރުންގެ ކަންބޮޑުވުމެކެވެ.

advertisement

އެމްޑީޕީ ވަޓްސްއެޕް ގުރޫޕްގައި އެންމެ ފުރަތަމަ ޝަކުވާ ކުރެއްވީ ދިއްޤަރު ދާއިރާގެ މެންބަރު އިކްރާމް ހަސަންއެވެ. އޭނާ ވިދާޅުވީ، މަޖިލިސް ޖަލްސާގައި މެންބަރުންގެ ކުރިއަށް “އިއްޒަތްތެރި” ކީނަމަވެސް ހަގީގީ މާނައިގައި އެ އިއްޒަތްތެރި ނުލިބޭކަމަށެވެ.

އިކްރާމްގެ ވާހަކަތަކަށް އުނގޫފާރު ދާއިރާގެ މެންބަރު އިސްމާއިލް އަހުމަދު ތާއީދު ކުރެއްވި އެވެ. ވިދާޅުވީ، އިކްރާމްގެ ވާހަކަތަކަކީ “ތެދު ބަސް” ކަމަށެވެ. އޭގެ އިތުރުން މަޖިލިސް ހަރަދުގައި އެއާޕޯޓު ވީއައިޕީ ލައުންޖު މެންބަރުންގެ ރަށްޓެހިންނަށް ވެސް ބޭނުން ކުރެވޭ ގޮތަށް ނިންމި ނިންމުން މަޖިލީހުގެ ރިޔާސަތުން ތަންފީޒު ނުކުރުމަށް ނިންމި ނިނުމަށް ވެސް ނުސީދާކޮށް އޭނާ ނުރުހުން ފާޅު ކުރެއްވި އެވެ.

ރައްޔިތުންގެ މަޖިލީހުގެ މެންބަރުންގެ ރައްޓެހިންނަށް އެއާޕޯޓް ވީއައިޕީ ހިދުމަތް ދިނުމަށް މަޖިލީހުގެ ނައިބުރައީސް އީވާ އަބްދުﷲ ވަނީ ދެކޮޅުހައްދަވާފައެވެ. މިހާރުވެސް ވިއައިޕީ ލައުންޖުން މެންބަރުންގެ އަނބިކަނބަލުންނަށް ނުވަތަ ފިރިކަލުންނަށާއި ދަރިންނަށް އަދި މައިންބަފައިންނަށްވެސް ހިދުމަތް ލިބެއެވެ.