ބައިނަލްއަޤްވާމީ އަހިންސަ ދުވަސް ފާހަގަ ކުރި އިރު ފުލުހުން އަތުން ލިބޭ އަނިޔާގެ ވާހަކަ ނުދައްކާ

އިއްޔެ އަކީ ބައިނަލްއަޤްވާމީގޮތުން ފާހަގަކުރާ އާހިންސަ ދުވަހެވެ. ބައިނަލްއަޤްވާމީ އަހިންސަ ދުވަހަކީ ނަފްރަތާއި، އަނިޔާއާއި ދެކޮޅު، އަހިންސަ މުޖުތަމަޢުއަކަށް ބާރުއެޅުމުގެ ގޮތުން ފާހަގަކުރާ ދުވަހެކެވެ. މިދުވަސް ފާހަގަކުރާއިރު އެކިއެކި އަނިޔާތަކާއި ދެކޮޅަށް ވާހަކަދައްކަން ޖެހެއެވެ. އެގޮތުން ބައިނަލްއަޤްވާމީ އާހިންސަ ދުވަހެއް ފާހަގަކުރާއިރު ފުލުހުންގެ އަތުން ލިބޭ އަނިޔާގެ ވާހަކަވެސް ދައްކަންޖެހެއެވެ.

އަހިންސަ ދުވަހާއި ގުޅުވައިގެން ކޮމިޝަނަރ އޮފް ޕޮލިސް މުހައްމަދު ހަމީދު ކުރެއްވި ޓްވިޓެއްގައި ބުނީ ކުއްތައް ޓެކަލް ކުރުމުގެ ދާއިރާއަކީ އަދިވެސް ފޯކަސް ކުރަންޖެހޭ ދާއިރާއެއްކަމަށެވެ. މިދިޔަ އަހަރުތަކުގެ ތެރޭގައި ކުއްކުރުން މަދުވެފައިވާކަމަށް ފުލުހުންގެ ތަފާސްހިސާބުތަކުން ދައްކާކަމަށް އޭނާ ވިދާޅުވިއެވެ.

މިދުވަސް ފާހަގަކުރާއިރު އެކިއެކި މުޒާހަރާތަކާއި އެކިއެކި ކަންކަމުގައި ފުލުހުންގެ ފަރާތުން ލިބޭ އަނިޔާތަކުގެ ވާހަކަވެސް ދައްކަންޖެހެއެވެ. ދާދިފަހުން ހުޅުމާލޭގެ “ފިޔަވަތި” ގައި ހިނގަމުންދާ ކަންކަމާ ދެކޮޅަށް ކުރި މުޒާހަރާ ރޫޅައިލުމުގެ ތެރޭގައި އާންމުންނާއި ބައެއް ނޫސްވެރިންނަށް ވެސް ފުލުހުން އަނިޔާ ކޮށްފައިވާ ކަމަށް ބައެއް މީޑިއާތަކުން ތުހުމަތު ވަނީ ކޮށްފައެވެ. އެ މުޒާހަރާ ރޫލައިލުމުގެ ތެރޭގައި ފުލުހުން އާދަޔާ ހިލާފަށް ބާރުގެ ބޭނުންކޮށް، ޝީލްޑުން ކޮއްޕައި ބައެއް މީހުންނަށް “ގަސްދުގައި އަނިޔާކުރި” ކަމަށް މުޒާހަރާގެ ބައެއް ބައިވެރިން އެއިރު ވަނީ ބުނެފައެވެ.

މީގެއިތުރުންވެސް އެކިއެކި މުޒާހަރާތަކާއި އެއްވުންތަކުގައި ފުލުހުންގެ އަމަލުތައް ހުންނަ ގޮތުން އާންމުންގެ ބައެއް މީހުންނާއި ނޫސްވެރިންނަށް ގިނަ ފަހަރު ގެއްލުން ލިބެއެވެ.