މަސައްކަތުގެ މާހައުލުގައި ބައިވަރު ގޮންޖެހުން ތަކެއް: އޯޓިސްޓިކް މީހެއްގެ ދުލުން

އޯޓިޒަމް އަކީ ނިއުރޮލޮޖިކަލް ޑިސްއޯޑަރ ނުވަތަ ސިކުނޑި މަސައްކަތް ކުރާ ގޮތުގައި ހުންނަ ތަފާތު ވުމެއްގެ ސަބަބުން ވާހަކަ ދެއްކުމާއި އިޖްތިމާއީ ގުޅުން ހީނަރުވެ އެހެނިހެން މީހުނާ މުޢާމަލާތު ކުރުމުގައި ދަތިތަކެއް ހުރުމެވެ. ބައެއް ކުދިންގެ ކިބައިން ވަރަށް ތުއްތު އިރުން ފެށިގެން އޯޓިޒަމްގެ އަލާމާތްތައް ފެންނަން ފަށާއިރު އަނެއްބައި ކުދިންގެ ކިބައިން މި އަލާމާތްތައް ފެންނަން ފަށާނީ ތަންކޮޅެއް ދޮށީ އުމުރުގައެވެ.

އޯޓިޒަމް ހުންނަ ކޮންމެ މީހަކީވެސް ތަފާތު ކުއްޖެކެވެ. ހަމަ އެ އުސޫލުން އޯޓިޒަމް ހުންނަ ކުދިންވެސް އެއްކުއްޖަކު އަނެއް ކުއްޖަކާ މުޅިން ތަފާތެވެ. ރާއްޖޭގައި ގިނަ މީހުންނަށް ގަބޫލުކުރެވިފައި އޮންނަނީ އޯޓިޒަމް ހުންނަނީ ކުޑަކުދިންގެ ކަމަށެވެ. ނަމަވެސް އޯޓިޒަމްއާއިއެކު އުމުރުން ދޮށީ މީހުންވެސް އެޅެމުން އެބަދެއެވެ.

advertisement

އުމުރުން 27 އަހަރުގެ މަރިޔަމް (އަސްލު ނަމެއް ނޫން) އަކީވެސް އޯޓިސްޓިކް މީހެކެވެ. ނަމަވެސް މުޖްތަމައުގައި އެހެން މީހުންނެކޭ އެއްފަދައިން އޭނާވެސް އަންނަނީ މަސައްކަތްކުރަމުންނެވެ. ނަމަވެސް އޯޓިޒަމްއާއިއެކު ދިރިއުޅެން ދަތިތަކެއް ހުރިކަމަށް އޭނާ ވަނީ ބުނެފައެވެ.

ކުޑައިރުގެ ދިރިއުޅުން މަރިޔަމް ބުނީ ކުޑައިރުގެ އޭނާގެ ދިރިއުޅުމަކީ އެހާ އުފާވެރި ދިރިއުޅުމެއް ނޫންކަމަށެވެ. އޯޓިޒަމްގެ ސަބަބުން އެހެންމީހުންނާއި އޭނާއާއި ތަފާތު ތަކެއް ހުރުމުގެ ސަބަބުން އާއިލާތެރޭގައި އެއިރު ކޮންމެވެސް ވަރަކަށް ދިމާކުރުންތައް ހުރިކަމަށެވެ.

މަރިޔަމްގެ އޯޓިޒަމް ހުންނަކަން ދެނެގަނެވިފައިވަނީ އޭނާގެ އުމުރުން 17 އަހަރުގައެވެ. އޭނާބުނީ އަންހެން ކުދިންނަށްވުރެ ފިރެހެންކުދިން އޯޓިޒަމްއަށް ޑައިގްނޯސްވުން އަވަސްކަމަށެވެ. އަންހެންކުދިންގެ ތަފާތުތަކެއް ހުރިނަމަވެސް އެއީ އޯޓިޒަމްކަން ދެނެގަތުމަށް އުނދަގޫކަމަށެވެ. އޭގެބަދަލުގައި ގިނަ ބަޔަކު ގަބޫލުކުރަނީ އެ ކުއްޖާ ބަސްއަހަނީކަމަށް އޭނާ ފާހަގަކުރިއެވެ.

އޯޓިޒަމްއާއިއެކު ދިރިއުޅުމުގެ ބައެއް ކަންކަން ކުރުމަށް އުނދަގޫތަކާއި ކުރިމަތިލާންޖެހިފައިވާކަމަށް  މަރިޔަމް ވަނީ ފާހަގަކޮށްފައެވެ. އޭގެތެރޭގައި މަސައްކަތުގެ މާހައުލުގައި ހުރި ދަތިތައް އޭނާ ފާހަގަކުރިއެވެ. އޭނާބުނީ މަސައްކަތުގެ މާހައުލުގައި އޯޓިޒަމް ހުންނަ ކުދިންނަށް ކުންފުނިތަކުން ފަހި މާހައުލެއް ގާއިމްކޮށްދޭންޖެހޭކަމަށެވެ.

މަރިޔަމް އަކީ މާގަދަ އަޑުތަކާއި އަދި އައްޔަށް އުނދަގޫވާ ކުއްޖެކެވެ. މީގެ ސަބަބުން ގިނަ ތަންތަނުގައި މަސައްކަތްކުރުމަށް އޭނާ އަށް އުނދަގޫކަމަށް އޭނާ ފާހަގަކުރިއެވެ. ނަމަވެސް ކޮންމެ އޯޓިސްޓިކް ކުއްޖެއްގެވެސް ތަފާތު ހުނަރެއް ހުންނައިރު މިކަންކަން ދެނެގަނެ މަސައްކަތުގެ މާހައުލުގައި ގިނަ އޯޓިސްޓިކް ކުދިންނަށް ފުރުސަތުދީ އެކުދިންނަށް މަސައްކަތްކުރެވޭނެ މާހައުލެއް ގާއިމްކޮށްދިނުމަކީ މުހިންމު ކަމެއްކަމަށް ވަނީ ފާހަގަކޮށްފައެވެ.

އެކި ކުދިންގެ އޯޓިޒަމް ހުންނަނީ އެކި ލެވެލް އަށެވެ. އެހެން ކަމުން އޯޓިޒަމް އަށް އޯޓިޒަމް ސްޕެކްޓްރަމް ޑިސްއޯޑާރ އޭ ކިޔައެވެ. އޯޓިޒަމްގެ އެންމެ މައިގަނޑު ސިފަތައް ނެތްކަމުގައި ވިޔަސް ބައެއް ސިފަތައް ހުރި ކަމުގައި ވާނަމަ މި ސްޕެކްޓްރަމް ތެރޭ ހިމެނޭނެއެވެ. އަދި ތަފާތު ތެރަޕީ ތައް ދީގެން ވަރަށް ބޮޑުތަން ރަނގަޅު ކުރެވިފާވެސް އެބަހުއްޓެވެ.

އޯޓިޒަމް ހުންނަ ކުދިންނާއި މީހުންނަށް މާނަވީ ގޮތެއްގައި އެހެން ކުދިންނާ މުޢާމަލާތުކޮށް ވާހަކަ ދައްކާ އުޅެން ދަތިވެއެވެ. މި ސަބަބައްޓަކާ އެމީހުންނަށް ރައްޓެހިން ހޯދާ އެކުވެރި ގުޅުމެއް ގާއިމު ކުރަން އުނދަގޫ ވެއެވެ. މިކަން މަރިޔަމްވެސް ވަނީ ފާހަގަކޮށްފައެވެ. އޭނާ ބުނީ އޯޓިޒަމްއާއިއެކު ރަހުމަތްތެރިންނާއިއެކު މިހާރު އުޅެން ދަސްވެފައިވާކަމަށެވެ. ނަމަވެސް ކުރިން މީހުންގެ މޫނުމަތިން އިމޯޝަން ދެނެގަންނަން އޭނާއަށް އުނދަގޫކަމަށެވެ. މީގެ ސަބަބުން އެކުވެރިއެއް ދެރަ ވެފައި، ނުވަތަ ރުޅިއައިސްފައި ހުރުމުން ނޭންގުމުގެ ސަބަބުން މަރިޔަމް އަކީ އަމިއްލަ އެދުން ބޮޑު މީހެއްގެ ގޮތުގައި ބައެއް ރަހުމަތްތެރިން އެއިރު ބުނާކަމަށް އޭނާ ވަނީ ފަހަގަކޮށްފައެވެ.

އޯޓިޒަމް ހުންނަ ވަރަށް އުމުރުން ދޮށީ މީހުންވެސް އެބައުޅެއެވެ. އަދި ބައެއް މީހުން އޮޓިޒަމް ހުރެ އެކަން ދެނެނުގަނެވިވެސް އެބަހުރެއެވެ. އާންމުގޮތެއްގައި އުމުރުން ހަގު ކުދިން ޑައިގްނޯޒްކުރެވުނަސް އުމުރުން ދޮށީ މީހުން ޑައިގްނޯޒް ކުރަން އުނދަގޫތަކެއް ހުރެއެވެ. ނަމަވެސް އުމުރުން ދޮށީ މީހުންނަށްވެސް ޑައިގްނޯޒް ކުރެވޭނެ ފުރުސަތުތައް ފަހިވެފައި އޮންނަންޖެހެއެވެ.