ގިނަ މީހުން ބޭނުންވަނީ މިނިމަމް ވޭޖް 10،000 އާ 12،000 ދެމެދު: ދިރާސާ

ގިނަ މީހުން ބޭނުންވަނީ މިނިމަމް ވޭޖްގެ ގޮތުގައި 10،000 ރުފިޔާއާއި 12،000 ރުފިޔާއާއި ދެމެދުގެ އަދަދެއްކަމަށް ދިރާސާއިން ދައްކައިފިއެވެ.

އެންމެ ކުޑަ އުޖޫރައާއި ގުޅޭގޮތުން އެމްވީޕްލަސް ޕަބްލިކް އޮޕީނިއަންއިން ވަނީ އާންމުންގެ ހިޔާލު ހޯދުމަށް ސަރވޭއެއް ކުރިއަށްގެންގޮސްފައެވެ. އެގޮތުން މިނިމަމް ވޭޖްގެ ގޮތުގައި 4000 ރުފިޔާއާއި 6000 ރުފިޔާދޭން ބޭނުންވާކަމަށް ބުނެފައިވަނީ %7.50 މީހުންނެވެ. %25.83 މީހުން ބުނެފައިވަނީ މިނިމަމް ވޭޖްގެ ގޮތުގައި ދޭން ފެންނަނީ 6000 ރުފިޔާއާއި 8000 ރުފިޔާއާއި ދެމެދުގެ އަދަދެއްކަމަށެވެ.

advertisement

8000 ރުފިޔާއާއި 10،000 ރުފިޔާއާއި ދެމެދުގެ އަދަދެއް ދޭން ފެންނަކަމަށް ވޯޓުދީފައިވަނީ %32.50 މީހުންނެވެ. އަދި ވޯޓުގައި ބައިވެރިވި އެންމެ ގިނަ މީހުން ބުނެފައިވަނީ މިނިމަމް ވޭޖްގެ ގޮތުގައި ދޭން ފެންނަނީ 10،000 ރުފިޔާއާއި 12،000 ރުފިޔާއާއި ދެމެދުގެ އަދަދެއްކަމަށެވެ. މިގޮތައް ބުނެފައިވަނީ ވޯޓުގައި ބައިވެރިވި %34.17 މީހުންނެވެ.

ރާއްޖޭގައި ދެވޭ އެންމެ ކުޑަ އުޖޫރައިގެ ގޮތުގައި 5،700 ރުފިޔާ ކަނޑައެޅުމަށް މިނިމަމް ވޭޖް އެޑްވައިޒަރީ ބޯޑުން ފާސްކޮށް މިހާރު ވަނީ އިކޮނޮމިކް މިނިސްޓަރަށް ފޮނުވާފައެވެ. އިކޮނޮމިކް މިނިސްޓްރީން ވިދާޅުވީ، އުޖޫރައިގެ ޢަދަދާ ގުޅޭގޮތުން މިނިމަމް ވޭޖް އެޑްވައިޒަރީ ބޯޑުން އިކޮނޮމިކް މިނިސްޓަރަށް އަރުވާފައިވާ ލަފާ، ދިރާސާކުރަމުންގެންދާކަމަށެވެ.
އެންމެ ކުޑަ އުޖޫރަ ނުވަތަ މިނިމަމް ވޭޖުގެ ގޮތުގައި ކަނޑައަޅާފައިވާ 5،700 ރުފިޔާއަކީ ކުދި ވިޔާފާރިތަކުގައި ދުވާލަކު 8 ގަޑިއިރު މުވައްޒަފަކު މަސައްކަތް ކުރުމުން މަހެއްގެމައްޗަސް ދޭންޖެހޭނެ މިންވަރެވެ. މިނިމަމް ވޭޖް އެޑްވައިޒަރީ ބޯޑުން ފާސްކޮށްފައިވާ ގޮތުން މެދު ފަންތީގެ ވިޔަފާރިތަކުގައި ދުވާލަކު 8 ގަޑިއިރު މަސައްކަތްކުރުމުން މަހެއްގެ މައްޗަށް މުވައްޒަފުންނަށް 7،000 ރުފޔާ މުސާރައިގެ ގޮތުގައި ދޭންވާނެއެވެ.
މީގެ އިތުރުން ބޮޑެތި ވިޔަފާރިތަކުގައި މަސައްކަތްކުރާ މުވައްޒަފުންނަށް ދުވާލަކު 8 ގަޑިއިރު މަސައްކަތްކުރުމުން، މަހަކު 8900 ރުފިޔާ ދިނުމަށްވެސް ވަނީ ކަނޑައަޅާފައެވެ. ސަރުކާރުގެ އެންމެ މުވައްޒަފުން ގިނަ ސިވިލް ސަރވިސްގެ މުވައްޒަފުންނަށް ލިބޭނެ އެންމެ ކުޑަ އުޖޫރަ ނުވަތަ މުސާރައިގެ ގޮތުގައި މިނިމަމް ވޭޖް އެޑްވައިޒަރީ ބޯޑުން ކަނޑައަޅާފައިވަނީ، 7000 ރުފިޔާއެވެ.