ޑިޖިޓަލް ޒަމާނުގައި އަންހެން ކުދިން ކުރިއަށް ދިޔުމަށް ފުރުސަތު

ޒަމާނަށް އައި ބަދަލާއިއެކު ޑިޖިޓަލް ޓެކްނޮލޮޖީއަށް އޮތް ޑިމާންޑްވެސް ވަނީ އިތުރުވެފައެވެ. ކޮންމެކަމެއްވެސް ޑިޖިޓަލްކޮށް ކުރެވޭނެ އިންތިޒާމްތައް މިހާރު ވަނީ ހަމަޖެހިފައެވެ. ކިޔެވުމާއި، ވަޒީފާ އަދާކުރުމުގެ ހުރިހައި ކަމެއްވެސް މިހާރު ވަނީ ޑިޖިޓަލްކޮށް ކުރެވޭނެ އިންތިޒާމް ހަމަޖެހިފައެވެ.

އިއްޔެއަކީ ބައިނަލްއަޤްވާމީ އަންހެން ކުދިންގެ ދުވަހެވެ. ޑިޖިޓަލް ޓެކްނޮލޮޖީއާއިއެކު އަންހެން ކުދިންނަށްވެސް ވަނީ ގިނަ ފުރުސަތުތަކެއް ފަހިވެގެންގޮސްފައެވެ. ދުވަހާއި ގުޅިގެން ޔޫއެންޑީޕީ މޯލްޑިވްސްއިން ބުނެފައިވަނީ މުޅި ރާއްޖެއަށް އަމާޒުކޮށްގެން ސްޓެމް އެޑިޔުކޭޝަންއާއި ގުޅޭ ސެޝަންތަކެއް ކުރިއަށްގެންދާކަމަށެވެ. މީގެ މައިގަނޑު ބޭނުމަކީ މިދާއިރާގައި އަންހެންކުދިންނަށް ހުރި ގޮންޖެހުންތައް ނައްތާލައި ދާއިރާގައި އަންހެން ކުދިންނަށް އިތުރު ފުރުސަތުތައް ފަހިކޮށްދިނުމެވެ.

މިއަހަރުގެ އަންހެން ކުދިންގެ ދުވަހުގެ ޝިއާރަކީ ” ޑިޖިޓަލް ޖެނެރޭޝަން، އަވަރ ޖެނެރޭޝަން” އެވެ. ދުވަހާއި ގުޅުވައިގެން ޔޫއެންޑީޕީ މޯލްޑިވްސްއިން ބުނެފައިވަނީ އަންހެންކުދިންނަކީ އެކުދިން ޑިޖިޓަލް ޓެކްނޮލޮޖީގެ ދާއިރާއިން ކުރިއަށް ދާންވީ މަހު އެނގޭ ބައެއްކަމަށެވެ. އެހެންކަމުން މުޖްތަމައުން އެކުދިންނަށް ކުރިއަށްދިއުމުގެ މަގު ފަހިކޮށްދޭންޖެހޭކަމަށެވެ.

ދުވަހާއި ގުޅުވައިގެން ވިމެން އިން ޓެކް މޯލްޑިވްސްއިން ބުނެފައިވަނީ ޑިޖިޓަލް ދާއިރާއިން އަންހެން ކުދިންނަށް ހުރި ހުރަސްތައް ނައްޓާލުމަކީ މިދާއިރާގައި އޮންނަ ޖިންސުގެ ތަފާތުކުރުންތައް ނައްތާލުމަށް މުހިންމުކަމެއްކަމަށެވެ.