ކުޑަކުދިންނަށް ފުލޫ ވެކްސިން ޖެހުން: ބެލެނިވެރިނަށް އެނގެންޖެހޭ ހުރިހާ ކަމެއް

އިންފުލުއެންޒާ އަކީ އަރިދަފުސް ރޯގާ ފަދަ އިން ވައިރަސް އެއްގެ ސަބަބުން، ނޭވާލާ ނިޒާމަށްޖެހޭ ވަރަށް ފަސޭހައިން ގައިންގަޔަށް އަރާ ބައްޔެކެވެ. އިންފުލުއެންޒާގެ ވައްތަރުތަކުގެ ތެރެއިން ކޮންމެ އަހަރަކު މޫސުމީ ސިފައެއްގައި ކުރިމަތިވާ އިންފުލުއެންޒާ އަށް މޫސުމީ އަރިދަފުސް ރޯގާ އޭ ކިޔައެވެ. އިންފުލުއެންޒާ އަށް އާންމުކޮށް ކިޔަނީ ފުލޫ  ނުވަތަ ރޯގާ އެވެ.

އިންފުލުއެންޒާ ޖައްސާ ވައިރަސް ތަކުގެ ވައްތަރުތައް ހަށިގަނޑަށް ވަދެ ނިކުމެ ހަދާ މައި ދޮރާއްޓަކީ ނޭވާލާ ނިޒާމުން ހަށިގަނޑުން ބޭރަށް ހުޅުވިފައިވާ ހުޅުވުން ނުވަތަ ދޮރުތަކެވެ. ހުރިހާ އުމުރު ފުރާއެއްގެ މީހުންނަށް ވެސް އިންފުލުއެންޒާ ޖެހެއެވެ.

advertisement

އާންމުގޮތެއްގައި މީހުންގިނަ ތޮށްޖެހިގެން މީހުން ދިރިއުޅޭ، ވައިބަދަލުނުވާނޭހެން ބެދިފައި ހުންނަ ތަންތަނުގައި، މިބަލި ފެތުރޭ މިންވަރު އަވަސްވެފައި އިތުރެވެ. އަދި ދެމޫސުން ދޭތެރެ އާއި، ފިނިމޫސުމާއި، ފިނި މާހައުލު ތަކުގައި ދިރިއުޅޭ މީހުންގެ މެދުގައި، ބަލި ފެތުރޭލެން އަވަސްވެފައި އާންމެވެ.

އިންފުލުއެންޒާ ޖެހެނީ އިންފުލުއެންޒާ ވައިރަސް ތަކުގެ ސަބަބުންނެވެ. އިންފުލުއެންޒާ ވައިރަސް ތަކުގެ ތެރޭގައި ފާހަގަކޮށްލެވޭ 3 ވައްތަރެއް ވެއެވެ. އެއީ އިންސާނުންނަށް ބަލި ޖައްސުވާކަމަށް ފާހަގަ ކުރެވިފައިވާ އިންފުލުއެންޒާ އޭ ވައިރަސް، އިންފުލުއެންޒާ ބީ ވައިރަސް އަދި އިންފުލުއެންޒާ ސީ ވައިރަސް އެވެ. މިއިން ކޮންމެ ވައްތަރެއްގެ ތަފާތު އެތަކެއް ސްޓްރެއިން ތަކެއް ހުންނަކަން ހަދާންކުރަން ޖެހެއެވެ. އިންފުލުއެންޒާ ސީ އިން އިންސާނުން ބަލިޖައްސަނީ ވަރަށް މަދުންނެވެ.

ވަރަށް ގިނަ މީހުންނަށް ނޭވާލާ ނިޒާމަށް ޖެހޭރޯގާ ދެވައްތަރު ކަމުގައިވާ ”އިންފުލުއެންޒާ” އާއި ”އަރިދަފުސް ރޯގާ“ އޮޅޭގޮތް ވެއެވެ. މިދެބައްޔަށް ބަލާއިރު އަރިދަފުސް ރޯގާ އަކީ ތަފާތު އެތަކެއް ވައިރަސް ތަކެއް ސަބަބުން ޖެހޭ ބައްޔެކެވެ. ނަމަވެސް އިންފުލުއެންޒާ ޖެހެނީ އިންފުލުއެންޒާ ވައިރަސްގެ ސަބަބުންނެވެ.

އިންފްލޫއެންޒާގައި ބޮޑެތި މީހުންނާއި ކުޑަކުދިންނަށްވެސް ފެންނަނީ ހަމަ ދާދި އެއްގޮތް އަލާމާތްތަކެކެވެ. ބައެއްފަހަރު ކުޑަކުދިންނަށް ފެންނަ އަލާމާތްތައް ކުޑައެވެ. އެގޮތުން ބައެއް އަލާމާތްތަކުގެ ތެރޭގައި ގައިގެ މަސްތަކުގައި ރިއްސުން، ހުންއައުން، ބޮލުގައި ރިއްސައި ވަރުބަލިވުން، ކެއްސުން، ކަރުގައި ރިއްސުން، ނިދަން އުނދަގޫވުން، ބަނޑުގައި ރިއްސުން، އަދި ހޮޑުލެވުމަކީވެސް މީގެ އަލާމާތްތަކެވެ.

އާންމުގޮތެއްގައި އިންފްލޫއެންޒާގެ ސަބަބުން ކުޑަކުދިންނަށް ފެންނަ އަލާމާތްތައް މަދުވިނަމަވެސް ބައެއް ސިއްހީ ހާލަތްތައް ހުންނަ ކުދިންނަށް މީގެ އަސަރު ކުރާލެއް ބޮޑުވެއެވެ. އަދި ރިސްކު ހައިވެ ހޮސްޕިޓަލްގައިވެސް އެޑްމިޓްކުރަން ޖެހެއެވެ.

ކުޑަކުދިންނަށް އިންފުލޫއެންޒާ ވެކްސިން ދެނީ ނޭފަތައް ސްޕްލޭކޮށްގެންނެވެ. ވެކްސިން ދޭވަގުތުގައިވެސް ކުއްޖާއަށް ނޭވާލެވޭނެއެވެ. ކޮންމެހެން ފުންކޮށް ނޭވާލާކަށް ނުޖެހޭނެއެވެ. ނަމަވެސް ވެކްސިން ޖެހުމަށްފަހުގައި އެހެން ބައެއް ސައިޑް އެފެކްޓްސް ދިމާވެދާނެއެވެ. އޭގެތެރޭގައި:

ނޭފަތް ބޮލޮކްވުން، ނުވަތަ ރޯގާޖެހުން

• ބޮލުގައި ރިއްސުން
• ގައިގައި ރިއްސުން
• ބައެއް ކުދިންނަށް ހުންއައުމަކީވެސް އެކަށީގެންވާ ކަމެކެވެ.

އިންފުލުއެންޒާ ނުވަތަ މޫސުމީ އަރިދަފުސް ރޯގާ އިން ރައްކާތެރިވުމަށް ކުރެވޭނެ އެއް މުހިއްމު އެއްކަމަކީ ކޮންމެ އަހަރަކު ވެސް ފުލޫ ވެކްސިން ޖެހުމެވެ. ކޮންމެ ވެކްސިނަކީވެސް އޭގެ ސަބަބުން ކުއްޖާއަށް ގެއްލުން ނުލިބޭނެކަން ޔަޤީންކުރުމަށް ޓެސްޓިން މަރުހަލާ ނިމި ބޭނުންކުރަމުންދާ ވެކްސިން ތަކެކެވެ. އެހެންކަމުން މި ވެކްސިން ކުޑަކުދިންނަށް ޖެހުމަށް ބިރުގަންނާކަށް ނުޖެހެއެވެ.

ބައެއް ކުދިންނަށް މި ވެކްސިން ނުޖެހިދާނެ ސަބަބުތަކުގެ ތެރޭގައި އެލަރޖީގެ މައްސަލަތައް ހުރުމާއި، ނޭވާހިއްލުމުގެ ކަންކަން ހުރުމާއި، ބައެއް ބޭސްތައް ނެގުމާއި، ދިފާއީ ނިޒާމު ބަލިކަށިވުން ހިމެނެއެވެ. ކޮންމެ ވެކްސިނެއްވެސް ޖަހަންވާނީ ޑޮކްޓަރުގެ އިރުޝާދުގެ ދަށުންނެވެ.