އަދިވެސް ފިރިހެން ކުދިންނަށް ވުރެ ގިނައިން އަންހެނު ކުޑަކުދިން ގޭތެރޭ އެހީވެދޭ

ގޭތެރޭގެ މަސައްކަތްތަކަކީ އަންހެން ކުދިންނާއި އަންހެނުންނަށް ޙާއްސަ މަސައްކަތްތަކެކޭ ވިސްނުމަކީ އިހު ޒަމާނުގައި ގެންގުޅެވުނު ވިސްނުމެކެވެ. ނަމަވެސް މިހާރު މި ވިސްނުން މަޑުމަޑުން އަންނަނީ ބަދަލުވަމުންނެވެ. ގޭތެރޭގައި މަންމައަށް ނުވަތަ އާއިލާއަށް ފިރެހެންކުދިންވެސް މިހާރު އެހީވެދީ އުޅެއެވެ.

ކޯވިޑް19 ގެ ދަނޑިވަޅުގައި ގޭތެރޭގައި ތިބެންޖެހުމާއި އެކު ފިރެހެންކުދިން ގޭތެރޭގެ މަސައްކަތްތަކުގައި އެހީތެރިވެދޭ މިންވަރު އިތުރުވެގެންވެސް ދިޔައެވެ. ނަމަވެސް އަދިވެސް ގޭތެރޭގެ މަސައްކަތްތަކުގައި ގިނައިން އެހީތެރިވެދީ އުޅެނީ އަންހެންކުދިންނެވެ. ޔުނިސެފްއާއި ނޭޝަނަލް ބިއުރޯ އޮފް ސްޓެޓިސްޓިކްސްއިން ލޮކްޑައުންގެ ތެރޭގައި ކުޑަކުދިންގެ ދިރިއުޅުނުގޮތުގެ މައްޗަށް ކޮށްފައިވާ ދިރާސާއެއްގައި މިކަން ވަނީ ހާމަވެފައެވެ. މި ދިރާސާއިން ދައްކާގޮތުން އާއިލާއަށް އެހީތެރިވެދިނުމާއި ގޭތެރޭގެ މަސައްކަތްތަކުގައި އުޅޭ އަންހެންކުދިންގެ ނިސްބަތަކީ %42 އެވެ. އަދި ފިރެހެންކުދިންގެ ނިސްބަތަކީ %22 އެވެ.

advertisement

ގޭތެރޭގެ މަސައްކަތްތައް ފިރެހެންކުދިންނަށް ދަސްކޮށްދީ މިކަންކަން ފިރެހެންކުދިން ލައްވާ ކުރުވުމަކީ ވަރަށް މުހިންމު ކަމެކެވެ. ތިރީގައި މި ހިމަނާލަނީ ގޭތެރޭގެ މަސައްކަތްތައް ފިރެހެން ކުދިން ލައްވާ ކުރުވުން މުހިންމު ބައެއް ސަބަބުތަކެވެ.

މިއީ ދިރިއުޅުމުގެ ބައެއް

ތަށިދޮވުމާއި، އަންނައުނު ދޮވުމާއި، ގޭތެރެ ފޮޅާ ސާފުކުރުން ފަދަ ކަންކަމަކީ އަންހެން ކުއްޖަކަށްވިއަސް އަދި ފިރެހެން ކުއްޖަކަށްވިއަސް ކުރަންޖެހޭ ދިރިއުޅުމުގެ މުހިންމު މަސައްކަތެކެވެ.

ވަކި ޖިންސެއް އިސްތިސްނާ ވާކަށް ނުޖެހޭ

ފިރެހެން ކުއްޖަކަށްވުމަކީ ގޭތެރޭގެ މަސައްކަތްތައް ކުރުމުން އިސްތިސްނާ ވާންޖެހޭ ކަމެއްނޫނެވެ. ދަރިފުޅު ހާނުވަންވީ މިގޮތަށެވެ. ގޭތެރޭގެ މަސައްކަތްތައް އަންހެންކުދިންނާއި ފިރެހެންކުދިން ކުރުމަށެވެ.

މިއީ ގިނަ ކަންކަން ދަސްވާނެ ކަމެއް

ގޭތެރޭގެ މަސައްކަތްތައް ކުރުމުގެ ތެރެއިން ދަރިފުޅަށް ގިނަ ކަންކަން ދަސްވެގެންދާނެއެވެ. އަދި މިއީ އެހެންމީހުންނާއި މެދު ވިސްނުމަށްވެސް ދަރިފުޅަށް ހުޅުވިގެންދާނެ މަގެކެވެ.

ޒިންމާ ނަގަން ދަސްވުން

އާއިލާގެ އެންމެން އެކުގައި ގޭތެރޭގެ މަސައްކަތްތައް ކުރުމަކީ އާއިލީ ގުޅުން ބަދަހިވެ މަސައްކަތްތަކަށްވެސް ލުއި ލިބިގެންދާނެކަމެކެވެ. އަދި މިއީ ދަރިފުޅަށް ޒިންމާ ނަގަންވެސް ދަސްވެގެންދާނެކަމެކެވެ.