އެހެން އަހަރުތަކާ އަޅާ ކިޔާއިރު މި އަހަރު ޑެންގީ ހުން ޖެހިފައި މިންވަރު މަދު

އެހެން އަހަރުތަކާއި އަޅާބަލާއިރު މިއަހަރު ޑެންގޫ ޖެހޭ މިންވަރު ދަށްވެފައިވާކަމަށް އެޗްޕީއޭގެ ތަފާސްހިސާބުތަކުން ދައްކައިފިއެވެ. އެޗްފީއޭއިން އާންމުކޮށްފައިވާ ތަފާސްހިސާބުތައް ދައްކާގޮތުން ޑިސެމްބަރ 2020 ގައި ރިޕޯޓްކޮށްފައިވަނީ ޑެންގޫގެ 18 ކޭހެކެވެ. އަދި މިއަހަރުގެ ޖަނަވަރީ މަހު ރިޕޯޓްކޮށްފައިވަނީ 17 ކޭހެކެވެ.

2020 ވަނަ އަހަރުގެ ޑިސެމްބަރ ފަހު ހަފްތާގައި ޑެންގޫގެ 7 ކޭހެއް ރިޕޯޓްކޮށްފައިވާއިރު މިއަހަރުގެ ޖަނަވަރީ މަހުގެ ފުރަތަމަ ހަފްތާގައި ރިޕޯޓްކޮށްފައިވަނީ 2 ކޭސްކަމަށް ތަފާސްހިސާބުތަކުން ދައްކައެވެ.

advertisement

އެޗްޕީއޭއިން ވިދާޅުވީ، ވޭތުވެދިޔަ އަހަރުތަކަށް ބަލާއިރު މިއަހަރުގެ މިހާތަނަށް ޑެންގީ ހުން ޖެހިގެން ރިޕޯޓްކޮށްފައިވާ އަދަދު މަދުކަން ފާހަގަކުރެވޭކަމަށެވެ. މިދުވަސްވަރު މަދިރީގެ ސަބަބުން ފެތުރޭ ބަލިތައް މަދުނަމަވެސް ބަލިތަކުން ރައްކާތެރިވުމަށް ޙާއްސަ ސަމާލުކަމެއް ދިނުމަށް އެޗްޕީއޭއިން ވަނީ އިލްތިމާސްކުރައްވާފައެވެ.

އެގޮތުން މަދިރިން ރައްކާތެރިވުމަށް ހަށިގަނޑު ރަނގަޅަށް ނިވާކުރުމާއި، މަދިރި ލޯޝަން، ސްޕްރޭ އަދި މޮސްކިޓޯ ރެޕެލެންޓް ބޭނުންކުރުން ހިމެނެއެވެ. ފަތިސްގަޑީގައާއި އިރުއޮއްސޭ ވަގުތުގައި ދޮރުތައް ލެއްޕުމާއި، ހުސްފުޅި ދަޅު ފަދަ ފެންހަރުލާ ތަކެތި ގޯތިތެރެއާއި މަގުމައްޗަށް ނުއުކުމަކީ މަދިރިން ރައްކާތެރިވުމަށް ކުރެވިދާނެކަންކަމެވެ.