ޒުވާން އާބާދީގެ 56 އިންސައްތަ އަކީ ވަޒީފާ އަދާނުކުރާ މީހުން

ރާއްޖޭގެ ޒުވާނުންގެ އާބާދީގެ 56 އިންސައްތައަކީ ވަޒީފާ ނެތް އަދި ތަޢުލީމީ ގޮތުންވެސް ޙަރަކާތްތެރި ނޫން ޒުވާނުންކަމަށް ތަފާސް ހިސާބުތަކުން ދައްކައިފިއެވެ.
މިއަހަރުގެ ޒުވާނުންގެ ދުވަހާ ގުޅިގެން ނޭޝަނަލް ބިއުރޯ އޮފް ސްޓެޓިސްޓިކްސްއިން ހާމަކޮށްފައިވާ ތަފާސް ހިސާބަށް ބަލާއިރު ރާއްޖޭގެ ޒުވާނުންގެ އާބާދީއަކީ 257215 އެވެ. މިއީ މުޅި އާބާދީގެ 45 އިންސައްތައެވެ. މިދިޔަ އަހަރާ އަޅާބަލާއިރު މިއީ ދެ އިންސައްތައިގެ ކުރިއެރުމެކެވެ. މީގެތެރޭގައި ހިމެނެނީ 188092 ފިރިހެނުންނާއި 69123 އަންހެނުންނެވެ.

މިއާބާދީގެ ތެރެއިން 41 އިންސައްތަ އަންހެނުން އަދި 15 އިންސައްތަ ފިރިހެނުންނަކީ ވަޒީފާ އަދާ ނުކުރާ އަދި ތަޢުލީމުވެސް ޙާސިލުކުރަމުން ނުދާ މީހުން ކަމަށް ސްޓެޓިސްޓިކްސް ބިއުރޯގެ ތަފާސް ހިސާބުން ދައްކައެވެ. އަންހެނުންގެ ނިސްބަތް މަތީގައި ހުރިކަމަށް ބެލެވެނީ ގޭތެރޭގައި ޢާއިލާގެ ޚިދުމަތުގައި ގިނަވަގުތު ހޭދަވެގެންދިޔުން ކަމަށް ސްޓެޓިސްޓިކް ބިއުރޯއިން ލަފާކުރެއެވެ.

މުޅި އާބާދީގެ ނިސްބަތުން ބަލާއިރު ޢާމްދަނީ ލިބޭ މަސައްކަތް ކުރަނީ 89956 ޒުވާނުންނެވެ. ޒުވާނުންގެ އާބާދީގެ ތަޢުލީމީ ފެންވަރަށް ބަލާއިރު 12 އިންސައްތަ ޒުވާނުންވަނީ މަތީ ތަޢުލީމު ޙާސިލުކޮށްފައެވެ. އަދި 77 އިންސައްތައަކީ ސާނަވީ އަދި މަތީ ސާނަވީ ޙާސިލުކޮށްފައިވާ މީހުންނެވެ.

ޒުވާނުންގެ ތައުލީމީ ފެންވަރަށް ބަލާއިރު އިނގިރޭސިބަހުން އަދި ދިވެހި ބަހުންވެސް ލިޔަންކިޔަން ދަންނަ ޒުވާނުންގެ ނިސްބަތް ފިރެހެނުންނަށްވުރެ އަންހެނުން ގިނައެވެ. ފިރެހެނުންގެ ތެރެއިން ދިވެހި ބަހުން ލިޔަންކިޔަން ދަންނަ ޒުވާނުންގެ އަދަދަކީ %97 އެވެ. އަދި އަންހެނުންގެ ނިސްބަތަކީ %99 އެވެ. އިނގިރޭސިބަހުން ލިޔަންކިޔަން ދަންނަ ފިރެހެންންގެ ނިސްބަތް%91 ގައި ހުރިއިރު އަންހެނުންގެ ތެރެއިން އިނގިރޭސިބަހުން ކިޔަން ކިޔަން ދަންނަ އާބާދީއަކީ %95 އެވެ.