މުޖުތަމައުގައި ފިރިހެނުންނާ މެދު ދެކޭ ގޮތުގެ ސަބަބުން ގެވެށި އަނިޔާ ރިޕޯޓުކުރުމަށް ފަސްޖެހޭ

ގެވެށި އަނިޔާގެ މައްސަލަތައް ރިޕޯޓްކުރުމަށް ފިރެހެނުން ފަސްޖެހެނީ މުޖްތަމައުގެ ތެރޭގައި އޮތް ވިސްނުމެއްގެ ސަބަބުންކަމަށް ފެމެލީ ޕްރޮޓެކްޝަން އޮޓޯރިޓީގެ ޗީޕް އެގްޒެކިއުޓިވް އޮފިސަރ އިބްރާހިމް ތައްޔިބު ވިދާޅުވެއްޖެއެވެ.

އެމްވީ ޕްލަސްއަށް ދެއްވި ޙާއްސަ އިންޓަވިއުއެއްގައި އިބްރާހިމް ތައްޔިބު ވިދާޅުވީ، ފިރެހެނުންނަށް ލިބޭ އަނިޔާގެ ވާހަކަތައް ދެކެވޭ މިންވަރު މަދީ މުޖްތަމައުގެ ތެރޭގައި ދެކޭ ގޮތުގެ ސަބަބުންކަމަށް ގަބޫލުކުރެވޭ ކަމަށެވެ. އެގޮތުން މި ވިސްނުމަކީ ކުޑައިރުން ފެށިގެން ކުއްޖާއަށް ބުނެދެވިފައިވާ ވާހަކަތަކެއްކަން އޭނާ ފާހަގަކުރެއްވިއެވެ. މިސާލަކަށް އެންމެ ކުޑައިރުވެސް ތަނަކުން ވެއްޓުނު ނަމަވެސް އަންހެން ކުއްޖަކާއި ފިރެހެން ކުއްޖަކާއި މެދު ގެންގުޅޭ ތަފާތުކުރުންތައް އޭނާ ފާހަގަކުރެއްވިއެވެ. ފިރެހެން ކުއްޖަކު ނަމަ އެއީ އެއްވެސް ކަމެއް ނޫންކަމަށާއި، ތަދު ނުވާނެއޭ ފަދަ ބަސްތައް ބުނެވޭކަމަށެވެ. އެހެންކަމުން އެފަދަ ކަންކަމުގެ ސަބަބުން ފިރެހެނުންނަކީ އަނިޔާ ވެގެންވާނެ ބައެއް ނޫނޭ ނުވަތަ ތަދު ވެގެންވެސް ވާނެ ބައެއް ނޫނޭ ހީވެއެވެ. މިއީ ބަދަލުކުރަންޖެހޭ ކަމެއްކަން އޭނާ ފާހަގަކުރެއްވިއެވެ.

advertisement

“ސްޕެސިފިކަލީ ފިރެހެނުންނަށް ލިބޭ އަނިޔާގެ ވާހަކަތައް ނުދެއްކުމުގެ ނުވަތަ އެކަންތައްތައް ރިޕޯޓް ނުކުރުމުގައި ސޮސައިޓަލް ޕަރސެޕްޝަން ސިގްނިފިކެންޓް ދައުރެއް އަދާކުރާކަމަށް ގަބޫލުކުރެވޭ. މިސާލަކަށް މުޖްތަމައުގެ ތެރޭގައި ފިރެހެން ކުއްޖަކު ބައްޓަން ކުރެވިގެންދާ ގޮތާއި އަދި ފިރެހެނުންނާއިމެދު މުޖްތަމައު ދެކޭ ގޮތުގެ ސަބަބުން އެބައާދޭ އެފަދަ ވާހަކަތައް ދެއްކުމަށް ކޮންމެވެސް ވަރެއްގެ ހުރަސްތަކެއް އެޅިގެން. މިސާލަކަށް ފިރެހެން ކުއްޖަކު ކުޑައިރުވެސް ވެއްޓިގެން ތަނަކަށް ތަދުވި ކަމުގައިވީނަމަވެސް ވަރަށް ގިނަ ފަހަރު ބުނެލެވޭނެ ވަރަށް ގިނަ ފަހަރު ޕޭރަންޓްސްއަށްވެސް ފިރެހެން ކުދިންނަކަށް ތަދެއް ނުވާނެއޭ. ތިއީ އެއްވެސް ކަމެއްނޫނޭ. ނުރޯށޭ، މިފަދަ ބަސްތައް ބޭނުންކުރެވޭތަން އާދޭ އަންހެން ކުދިންނާއި ހިލާފަށް.” އިބްރާހިމް ތައްޔިބު ވިދާޅުވިއެވެ.

އޭނާ ވިދާޅުވީ، ގެވެށި އަނިޔާގެ މައްސަލަތައް މިހާރު ލިބެނީ ހަމައެކަނި ރިޕޯޓްކުރާ މައްސަލަތައްކަމަށެވެ. ނަމަވެސް ރާއްޖޭގައި ކިހާ މިންވަރަކަށް ގެވެށި އަނިޔާ ފެތުރިފައި އޮތްތޯ ބެލުމަށް މުޅި ރާއްޖެ ހިމެނޭހެން ސަރވޭއެއް ކުރަމުންދާކަމަށެވެ.