ޚަބަރު

ޑިޕްރެޝަންގެ އަލާމަތްތައް ފިރިހެނުންގެ ތަފާތު

27 އޮކްޓޯބަރ 2021 - 14:03

ޑިޕްރެޝަންއަކީ މިހާރު އައު ބަހަކަށް ނުވާނެއެވެ. ފަހަރުގައި ޑިޕްރެޝަންގައި ފެންނަ އަލާމާތްތަކަކީވެސް އާންމުކޮށް މިހާރު އެންމެންނަށްވެސް އިނގޭ އަލާމާތްތަކަކަށް ވެދާނެއެވެ. ނަމަވެސް ޑިޕްރެޝަންގައި އަންހެނުންނާއި ފިރެހެނުންގެ އަލާމާތްތައް ތަފާތުކަން އިނގޭ ހެއްޔެވެ؟

ޑިޕްރެޝަންގައި އުޅޭ އަންހެނެއްގެ ކިބައިން އާންމުކޮށް ދެރަވުން ފެނެއެވެ. ނަމަވެސް ޑިޕްރެޝަންގައި ހުންނަ ފިރެހެނެއްގެ ކިބައިން ދެރަވުމަށްވުރެ ބޮޑަށް ފެންނާނީ ރުޅިވެރިކަމާއި އެގްރެޝަންއެވެ. އާއިލާގެ މެންބަރުން ނުވަތަ ރަހުމަތްތެރިންނަށް ގިނަފަހަރު މިއީ ޑިޕްރެޝަންކަން ނޭންގިދާނެއެވެ.

advertisement

ޑިޕްރެޝަންގައި އަންހެނުންނާއި ފިރެހެނުންގެ އަލާމާތްތައް ތަފާތުވި ނަމަވެސް ބައެއް އަލާމާތްތަކަކީ އަންހެނުންނާއި ފިރެހެނުންގެ ކިބައިންވެސް ފެންނަ އަލާމާތްތަކެކެވެ. އޭގެތެރޭގައި:

  • މާބޮޑަށް ވަރުބަލިވުން
  • ނިދަން އުނދަގޫވުން ނުވަތަ މާގިނައިން ނިދުން
  • ކުރިން ކުރަމުންއައި ކަންކަން ކުރުމަށް އުނދަގޫވުން ނުވަތަ އެކަންކަމަށް ޝައުގުވެރިކަން ގެއްލުން
  • ދެރަވުން ނުވަތަ އުންމީދެއްނެތްކަމުގެ އިހްސާސްކުރެވުން
  • މިއީ ޑިޕްރެޝަންއަށް ގޮސްފައިވާ އަންހެނެއް ނުވަތަ ފިރެހެނެއްގެ ކިބައިން ފެނިދާނެ އެއްގޮތް އަލާމާތްތަކެވެ. މީގެއިތުރުންވެސް ފިރެހެނުންގެ ކިބައިން ފެނިދާނެ އެހެން ބައެއް އަލާމާތްތަކުގެ ތެރޭގައި:
  • އާންމު ދިރިއުޅުމުގެ ކަންކަމުން ރެކެން މަސައްކަތްކުރުން

އާންމު ދިރިއުޅުމުގައި ދިމާވާ ކަންކަން ނުވަތަ ކުރަންޖެހޭ ކަންކަމުން ސަލާމަތްވުމަށް ޑިޕްރެޝަންގައި އުޅޭ މީހަކު މަސައްކަތްކުރާނެއެވެ. މިގޮތުން ފައިސާއާއި ވަގުތު ހޭދަކޮށްފާނެއެވެ. މިސާލަކަށް މާގިނަވަގުތު ވީޑިއޯ ގޭމްކުޅުމާއި ފިލްމު ބެލުމާއި، ކުޅިވަރުގެ އެހެންވެސް ކަމެއްގައި ވަގުތު ހޭދަކޮށްފާނެއެވެ.

ސިއްހީ ބައެއް މައްސަލަތައް ކުރިމަތިވުން

ޑިޕްރެޝަންގައި އުޅޭ ފިރެހެނަކަށް ސިއްހީ މައްސަލަތައް ކުރިމަތިވުމަކީ އަލާމާތެކެވެ. މިސާލަކަށް ބުނާނަމަ ކުރިން ދިމާނުވާ މައްސަލަތައް ހިމެނެއެވެ. އެގޮތުން އާދަޔާ ހިލާފަށް ބޮލުގައި ރިއްސުމާއި، ގޭސްޓްރިކްގެ މައްސަލަތަކާއި، ކުއްލިއަކަށް މާބޮޑަށް ބަރުދަން ލުއިވުމާއި، ނުވަތަ ބަރުދަން އިތުރުވުމާއި، އަބަދު ވަރުވަލިވުމާއި، ހިތުގެ ތެޅުން އަވަސްވުން ފަދަ ކަންކަން ހިމެނެއެވެ.

އިހްސާސްތައް ކިޔާނުދީ އަމަލުތަކުން ދެއްކުން

ޑިޕްރެޝަންގައި އުޅޭ އަންހެނެއްގެ ކިބައިން އާންމުކޮށް ފެންނާނީ ހިތްދަތިކަމެކެވެ. އަދި އެނާއަށް ކުރެވޭ އިހްސާސްތައް ފިރެހެނުންނަށްވުރެ ބޮޑަށް އަންހެނުން އެހެން މީހުންނަށް ކިޔާދެއެވެ. ނަމަވެސް ޑިޕްރެޝަންގައި އުޅޭ ފިރެހެނަކު އެމީހާގެ އިހްސާސްތައް ކިޔާދިނުމުގެ ބަދަލުގައި އަމަލުތަކުން ދައްކައެވެ. މިސާލަކަށް ރުޅިގަދަވުން، ނުވަތަ ކުރިއާއި ހިލާފަށް މާއަވަހަށް ރުޅިއައުމަކީ މީގެ އަލާމާތެކެވެ.

ރިސްކީ ކަންތައްތައް ކުރުން

ޑިޕްރެސް ވެފައިވާ އަންހެނަކާއި ހިލާފަށް ފިރެހެނަކު ރިސްކީ ކަންތައްތައް ކުރާނެއެވެ. މިސާލަކަށް ކާރު ނުވަތަ ސައިކަލު ނުރަކާތެރި ގޮތްގޮތައް ދުއްވުން، މަސްތުވާތަކެތި ބޭނުންކުރުން، ފައިސާ ހަރަދުކޮށްގެން ކުޅޭ ގޭމްތައް ކުޅުން، ނުވަތަ އެނޫންވެސް ގޮތަކަށް ފައިސާތައް ބޭކާރުގޮތުގައި ހަރަދުކުރުން ހިމެނެއެވެ.

ރިއެކްޝަންސް
4
6
7
45
8
1
2