ތަފާތުކުރުމެއްނެތި މިނިމަމް ވޭޖްގައި ބިދޭސީންގެ މުސާރަވެސް ހިމަނަން އަނެއްކާވެސް ގޮވާލަނީ

މިނިމަމް ވޭޖްގައި ބިދޭސީން ހިމަނާފައިނުވާތީ އެކަމުގެ ކަންބޮޑުވުން ފާޅުކޮށްފިއެވެ. މި ކަންބޮޑުވުބްތައް ފާޅުކޮށްފައިވަނީ މިޝަން ފޯރ މައިގްރެންޓް ވޯކާރސް މޯލްޑިވްސްއާއި ޓްރާންސްޕޭރެންސީ މޯލްޑިވްސްއިންނެވެ.

މިކަމާއި ގުޅިގެން ނެރެފައިވާ ބަޔާނެއްގައި ބުނެފައިވަނީ 2021 ވަނަ އަހަރު ނިމުމުގެ ކުރިން މިނިމަމް ވޭޖް ކަނޑައެޅުމަށް ސަރުކާރުން ނިންމަވާފައިވާކަމަށެވެ. ބިދޭސީ މަސައްކަތްތެރިންނަށް މިނިމަމް ވޭޖް ދޭނެ މުއްދަތަކަށް ކުރިން 2 އަހަރު ކަނޑައަޅާފައިވީނަމަވެސް މިހާރު މި މުއްދަތު ވަނީ 5 އަހަރަށް އިތުރުކޮށްފައިކަން ފާހަގަކުރައްވައި މިކަމުގެ ސަބަބުން ވަނީ ކަންބޮޑުވުން ފާޅުކޮށްފައެވެ.

advertisement

މިޝަން ފޯރ މައިގްރެންޓް ވޯކާރސް މޯލްޑިވްސްއާއި ޓްރާންސްޕޭރެންސީ މޯލްޑިވްސްއިން ނެރެފައިވާ ބަޔާނުގައި ބުނެފައިވަނީ މީގެ ސަބަބުން ކުޑަ މުސާރައެއްގައި ވަޒީފާތަކަށް ބިދޭސީ މަސައްކަތްތެރިން ނެގުން އިތުރުވެގެންދާނެކަމަށެވެ. މީގެ ސަބަބުން ދިވެހިންނަށް ވަޒީފާ ލިބުމުގައި ދަތިތަކެއް ހުރެދާނެކަން ވަނީ ފާހަގަކޮށްފައެވެ.

ރާއްޖޭގައި މިހާރުވެސް ހިއުމަން ޓްރެފިކިންގެ މައްސަލަތައް އެބައޮތެވެ. މިޝަން ފޯރ މައިގްރެންޓް ވޯކާރސް މޯލްޑިވްސްއާއި ޓްރާންސްޕޭރެންސީ މޯލްޑިވްސްއިން ބުނެފައިވަނީ މިނިމަމް ވޭޖްގައި ބިދޭސީ މަސައްކަތްތެރިން ނުހިމެނުމުގެ ސަބަބުން ހިއުމަން ޓަރެފިކިން ގެ މައްސަލަތައް އިތުރުވުމުގެ ބިރު އެބައޮތްކަމަށެވެ.

އެންމެ ކުޑަ އުޖޫރަ ނުވަތަ މިނިމަމް ވޭޖުގެ ގޮތުގައި ކަނޑައަޅާފައިވާ 5،700 ރުފިޔާއަކީ ކުދި ވިޔާފާރިތަކުގައި ދުވާލަކު 8 ގަޑިއިރު މުވައްޒަފަކު މަސައްކަތް ކުރުމުން މަހެއްގެމައްޗަސް ދޭންޖެހޭނެ މިންވަރެވެ. މިނިމަމް ވޭޖް އެޑްވައިޒަރީ ބޯޑުން ފާސްކޮށްފައިވާ ގޮތުން މެދު ފަންތީގެ ވިޔަފާރިތަކުގައި ދުވާލަކު 8 ގަޑިއިރު މަސައްކަތްކުރުމުން މަހެއްގެ މައްޗަށް މުވައްޒަފުންނަށް 7،000 ރުފޔާ މުސާރައިގެ ގޮތުގައި ދޭންވާނެއެވެ.

މީގެ އިތުރުން ބޮޑެތި ވިޔަފާރިތަކުގައި މަސައްކަތްކުރާ މުވައްޒަފުންނަށް ދުވާލަކު 8 ގަޑިއިރު މަސައްކަތްކުރުމުން، މަހަކު 8900 ރުފިޔާ ދިނުމަށްވެސް ވަނީ ކަނޑައަޅާފައެވެ. ސަރުކާރުގެ އެންމެ މުވައްޒަފުން ގިނަ ސިވިލް ސަރވިސްގެ މުވައްޒަފުންނަށް ލިބޭނެ އެންމެ ކުޑަ އުޖޫރަ ނުވަތަ މުސާރައިގެ ގޮތުގައި މިނިމަމް ވޭޖް އެޑްވައިޒަރީ ބޯޑުން ކަނޑައަޅާފައިވަނީ، 7000 ރުފިޔާއެވެ.