ވެލާ ދަލުގައި ޖެހިގެން ގޮނޑުދޮށަށް ލައްގާ މޫސުން އަންނަނީ، މިހިރީ ރެސްކިއު ސެންޓަރުތައް

ވެލައަކީ ރާއްޖޭގައި ހިމާޔަތްކޮށްފައިވާ ބާވަތެކެވެ. ނަމަވެސް އިރުވައި މޫސުމުގައި މަސްބާނަން ޖަހަފައިވާ ދަލުގައި ޖެހިފައި ސަލާމަތްނުވެވި ތިބޭ ވެލާ ވަރަށް ގިނައިން ފެނެއެވެ. މިފަދަ ވެލައެއް ފެނިއްޖެނަމަ މިއަށް ރައްކާތެރިކަންދީ ސަލާމަތްކުރާނީ ކިހިނެތްހެއްޔެވެ؟

ތިމާވެއްޓާ ބެހޭ ޖަމިއްޔާއެއް ކަމުގައިވާ އޯޝަނޮހޮލިކް މޯލްޑިވްސް މިވަނީ މިކަމަށް ސަމާލުވުމަށް އެދި އަދި ވެލާ ރެސްކިއު ސެންޓަރުތައް ކޮމްޕައިލްކޮށްފައެވެ.

advertisement

މިފަދަ ވެލައެއް ފެނިއްޖެނަމަ އެންމެ ކައިރީގައި ހުރި ރެސްކިއު ސެންޓަރަކީ ކޮބައިކަން އެނގުމަކީ ވަރަށް މުހިންމު ކަމެކެވެ. އެގޮތުން ރާއްޖޭގެ 3 ސަރަހައްދެއްގައި ރެސްކިއު ސެންޓަރުތައް ހުރެއެވެ. އެއީ މާލެ އަތޮޅުގައި ފޯރ ސީޒަން ކުޑަހުރާގައި ހުންނަ މެރިން ސޭވަރސްއާއި، ޅ. ނައިފަރުގައި ހުންނަ އެޓޯލް މެރިން ސެންޓަރާއި، ބ. އަތޮޅު ދުނިކޮޅު ރިސޯޓްގައި ހުންނަ އޮލިވް ރިޑްލޭ ޕްރޮޖެކްޓެވެ.

ދަލުގައި ޖެހިފައިވާ ވެލައެއް ފެނިއްޖެނަމަ އެންމެ ފުރަތަމަ ކަމަކީ ރަނގަޅަށް ވިސްނުމެވެ. އެވެލާ ދަލުގައި ޖެހިފައި އޮތީ ކިހާ އިރަކު ކަމެއް ނޭންގޭނެއެވެ. އެހެންކަމުން ގިނައިރުވިއަސް ރަނގަޅު ގޮތަކީ ރައްކާތެރިކަމާއިއެކު އެ ވެލާ ސަލާމަތްކުރުމެވެ. އެންމެ ފުރަތަމަ ސަލާމަތްތެރިކަމާއިއެކު މޫދުން ވެލާ ނަގާށެވެ. ދާގަނޑު މާދިގުނަމަ ނުވަތަ ދާގަނޑުގައި އިތުރުވެލާ ޖެހިފައިވާނަމަ ވެލާތައް ވަކިކުރުމަށް ދާގަނޑު ބުރިކޮށްލާށެވެ. ނުވަތަ ގަލެއްގައި ދާގަނޑު ހައްޔަރުވެފައިވާނަމަވެސް ވަޅިއަކުން ދާގަނޑު ބުރިކޮށްލާށެވެ.

ދާގަނޑުގައި ހިފާފައި ވެލާ ނުއުފުލާށެވެ. އޭގެ ބަދަލުގައި ވެލާގެ ތޮށިގަނޑުގައި ދެކޮޅުން ހިފާފައި ވެލާ ހިއްލާލާށެވެ. ވެލައަށް މާބޮޑު ގެއްލުމެއް ލިބިފައި ނެތްނަމަ ވެލާ ދާގަނޑުން ސަލާމަތްކުރުމަށްފަހު މޫދަށް ދޫކޮށްލެވިދާނެއެވެ. ނަމަވެސް އެއަށް ގެއްލުންތަކެއް ވެފައިވާނަމަ އިތުރު ފަރުވާ ބޭނުންވާނެއެވެ.

ވެލާގެ ގައިގައި ފޮތިގަނޑެއް އަޅާށެވެ. މީގެ ސަބަބުން އެއަށް މާބޮޑަށް ހޫނުވުމުން ދުރުކޮށްދޭނެއެވެ. ވެލާ މާބޮޑަށް ތެޅޭނަމަ ތެތް ފޮތިކޮޅެއް އޭގެ ލޯމަތީގައި އަޅާލާށެވެ. މީގެ ސަބަބުން ވެލާގެ ސްޓްރެސް ކުޑަކޮށްދޭނެއެވެ. ވެލާގެ ތޮށިގަނޑު ދަށައްވާގޮތައް ނުބާއްވާށެވެ.  އަދި އިތުރު އެހީ ބޭނުންވާނަމަ އޭއެމްސީ މެރިން ބައޮލޮޖިސްޓް (7564516) އަށް ގުޅާލާށެވެ. އެއިރުން ނައިފަރަށް ގެންދިއުމުގެ ކަންކަން ހަމަޖެއްސޭނެއެވެ.