“މިރަށު އަންހެނުން ރިސޯޓުގައި ކުރިން މަސައްކަތް ކުރި، މިހާރު އެރިސޯޓުން ގެންނަނީ ބިދޭސީން”

ވަޒީފާގެ މާހައުލުގައި އޮންނަ ޖިންސީ ތަފާތު ކުރުންތަކުގެ ވާހަކައަކީ އަބަދުވެސް ދެކެވޭ ވާހަކަތަކެކެވެ. އެގޮތުން ވަޒީފާގެ މާހައުލުގައި ދިމާވާ ތަފާތުކުރުންތަކާއި ވަޒީފާ ދިނުމުގައި ހުންނަ ތަފާތުކުރުންތައް ހިމެނެއެވެ. ރާއްޖޭގެ އާބާދީގެ އެންމެ ގިނަ މީހުން ވަޒީފާ އަދާކުރާ އެއް ސިނާއަތަކީ ފަތުރުވެރިކަމުގެ ސިނާއަތެވެ. ފަތުރުވެރިކަމުގެ ސިނާއަތަކީ ރާއްޖެއަށް އެންމެ ގިނައިން އާމްދަނީވެސް ލިބޭ ސިނާއަތެވެ. ނަމަވެސް މި ސިނާއަތުގައިވެސް ދިވެހި އަންހެނުންނަށް ވަޒީފާ ނުލިބޭ ކަމުގެ ޝަކުވާތައް ގިނައެވެ.

ފެމިލީ ލީގަލް ކްލިނިކްއިން ކޮށްފައިވާ ޓުވިޓެއްގައި ބުނެފައިވަނީ ރާއްޖޭގެ ދެނުނަށް ނިސްބަތްވާ އުމުރުން 50 އަހަރުން މަތީގެ ފިރެހެނަކު ބުނެފައިވާ ގޮތުގައި އެރަށުގެ އަންހެނުން ކުރިން ރިސޯޓްތަކުގައި މަސައްކަތް ކުރިނަމަވެސް މިހާރު އެ ވަޒީފާތައް ބިދޭސީންނަށް ދީފައިވާކަމަށެވެ. ކޯވިޑް19 އާއިއެކު ރިސޯޓްތަކުގައި މަސައްކަތްކުރާ ގިނަ މީހުންގެ ވަޒީފާތައް ވަނީ ގެއްލިފައެވެ. މިހާރު މަޑުމަޑު ވަޒީފާތަކަށް މީހުން ނަގަމުން ދިޔަނަމަވެސް ދިވެހިންގެ ބަދަލުގައި ބިދޭސީން އެ ވަޒީފާތަކަށް ނަގާކަމުގެ ޝަކުވާތައް ވަނީ ގިނަވެފައެވެ.

ޤާނޫނު ބުނާގޮތުން ޕްރައިވެޓް އަދި ޕަބްލިކް ކުންފުނިތަކުންވެސް “ޖެންޑަރ ކޮމިޓީ” އެއް އޮންނަންޖެހެއެވެ. މި ކޮމިޓީއަކީ ވަޒީފާގެ މާހައުލުގައި ދިމާވާ ޖިންސުގެ ތަފާތުކުރުންތައް މަދުކުރުމަށް އުފައްދާ ކޮމެޓީއެކެވެ.

2019 ވަނަ އަހަރު ކޮށްފައިވާ ޓޫރިސްޓް ރިސޯޓް އެންޕްލޯއިމަންޓް ސަރވޭ ރިޕޯޓުން ދައްކާގޮތުންވެސް ރާއްޖޭގެ ރިސޯޓްތަކުގައި މަސައްކަތްކުރާ ބިދޭސީ އަންހެނުންނަށްވުރެ ދިވެހި އަންހެނުންގެ ނިސްބަތް މަދެވެ. މިސަރވޭއިން ދައްކާގޮތުން ރާއްޖޭގެ ރިސޯޓްތަކުގައި މަސައްކަތްކުރާ ބިދޭސީ އަންހެނުންގެ ނިސްބަތަކީ %7 އެވެ. އަދި ދިވެހި އަންހެނުންގެ ނިސްބަތަކީ އެންމެ %3 އެވެ.