ނިދަން ދާ ވަގުތާއި ހިތުގެ ބަލިތަކާ ހުރީ ކޮން ގުޅުމެއް؟

ހިތުގެ ބަލިތައް ތަހައްމަލު ކުރަމުން ދާ 520 މިލިއަނެއްހާ މީހުން ދުނިޔޭގެ އެކި ކަންކޮޅުތަކުގައި އެބަތިއްބެވެ. ތަފާސްހިސާބުތައް ދައްކާގޮތުން ހިތުގެ ބަލިތަކުގައި އަހަރަކު، 18.6 މިލިއަން މީހުންގެ ފުރާނަ ގެއްލެއެވެ. އަދި ކޮވިޑް-19ގެ ބަލިމަޑުކަމުގެ ސަބަބުން ހިތުގެ ބަލި ހުންނަ ޕޭޝަންޓުންގެ ހިތްތަކަށް އިތުރުނުތަނަވަސްކަމާއި އުނދަގޫތައް ވެރިވި ކަމަށް ވެސް ވަނީ ދައްކާފަ އެވެ.

ހިތުގެ ބައްޔާއި ގުޅުންހުރި ގިނަ ކަންކަން ހުރެއެވެ. ނަމަވެސް ނިދުމުގެ ޝެޑިއުލް ނުވަތަ ނިދަންދާ ވަގުތުގެ ސަބަބުންވެސް ހިތުގެ ބަލިތަކަށް މަގުފަހިވެއެވެ. ދިރާސާއިން ދައްކާގޮތުން ހަމަނިދި ނުލިބުމުގެ ސަބަބުންވެސް ގިނަ މީހުންނަށް  ހިތުގެ ބަލިތަކާއި ކުރިމަތިލާން ޖެހެއެވެ. މި ދިރާސާގައި 88،026 މީހުން ވަނީ ބައިވެރިވެފައެވެ. މީގެތެރެއިން %58 މީހުންނަކީ އަންހެނުންނެވެ.

advertisement

ދިރާސާގައި ބައިވެރިވި މީހުންނާއި ކޮށްފައިވާ ސުވާލުތަކުގެ ތެރޭގައި އުމުރާއި، ޖިންސު، ދުވާލެއްގެ މައްޗަށް ނިދި ލިބޭ ވަގުތާއި، ނިދަން އުނދަގޫވާ މިންވަރު ފަދަ ސުވާލުތައް ވަނީ ކޮށްފައެވެ. ދިރާސާގައި ބައިވެރިވި މީހުންގެ ނިންޖާއި ބެހޭ މައުލޫމާތު ހަފްތާއެއް ވަންދެން ވަނީ ބަލާފައެވެ.

ދިރާސާގައި ބައިވެރިވި މީހުންގެ ތެރެއިން %3.6 ނުވަތަ 3172 މީހުންގެ ހިތުގެ އެކިއެކި މައްސަލަތައް ހުރިކަން ވަނީ ދެނެގަނެވިފައެވެ. އަދި އަންހެނުންނާއި ފިރެހެނުންގެ ރިސްކުވެސް ތަފާތެވެ. އަންހެނުންގެ ތެރެއިން ރޭގަނޑު 10:00 އިން 10:59 އާއި ދޭތެރޭގައި ނިދަންދާ މީހުންނަށް ހިތުގެ ބަލިތައް ޖެހުމުގެ ފުރުސަތު ކުޑަކަމަށް ދައްކައެވެ. އަދި 11:00 އިން 11:59 އަކަށް ނިދަންދާ މީހުންނަށް %12 ހިތުގެ މައްސަލަތައް ދިމާވުމުގެ ފުރުސަތު އޮވެއެވެ.

މި ދިރާސާއިން ދައްކާގޮތުން ދަންވަރު 12 ގެ ފަހުން ނިދަންދާ މީހުންނަށް ހިތުގެ ބަލިތައް ޖެހުމުގެ ފުރުސަތު %25 އަށް އިތުރުވެއެވެ. އަދި 10:00 ގެ ކުރިން ނިދާ މީހުންނަށްވެސް މި ފުރުސަތު އޮވެއެވެ.