އެޑިކްޝަނުން ރިކަވަރ ކުރާ މީހުންނަށް އެޅި ހާފްވޭ ހައުސްގައި އެތަށް މައްސަލަތަކެއް

ހާފްވޭ ހައުސްއާއި ގުޅޭގޮތުން ގިނަ މައްސަލަތަކެއް އެބަހުރިކަމަށް ރައްޔިތުންގެ މަޖިލީހުގެ ޕެޓިޝަން ކޮމިޓީން ހެދި “ޗޭންޖް އެންޑީއޭ ޕެޓިޝަން 2020، ކޮމިޓީން ދިރާސާކޮށް ނިންމި ގޮތުގެ ރިޕޯޓުން ދައްކައިފިއެވެ.

މިއަދު ރާއްޖެއަށް ދިމާވެފައިވާ އެންމެ ބޮޑު މައްސަލައަކީ މަސްތުވާތަކެތީގެ މައްސަލައެވެ. ކޮންމެ 100 މީހަކުން 57 ދިވެހިންނަކީ ސީދާގޮތުންނާއި ނުސީދާގޮތުން މަސްތުވާތަކެތީގެ ވަބާގައި ޖެހިފައިވާ މީހުންކަން “ޗޭންޖް އެން.ޑީ.އޭ ޕެޓިޝަނުގައި ވަނީ ފާހަގަކޮށްފައެވެ.

advertisement

ހާފްވޭ ހައުސްއަކީ މިފަދަ މީހުން އަނބުރާ މުޖްތަމައުއަށް ގެނައުމަށް އެންމެ މުހިންމު އެއް ތަނެވެ. ފަރުވާދޭ މަރުކަޒުތަކުން ފަރުވާ ލިބުމަށްފަހު ހާފްވޭ ހައުސްގައި ތިބެގެން ވޮކޭޝަނަލް ޓްރެއިނިންގ ދިނުމާއި، އާއިލާތަކާއި ހީނަރުވެފައިވާ ގުޅުން ރަނގަޅުކުރުމާއި، ރަހުމަތްތެރިން ހޯދުމާއި، ވަޒީފާއަށްދާން ބާރުއަޅާދޭ ތަނަކަށް ހާފްވޭ ހައުސްވަނީ ވެފައެވެ.

މިއަހަރުގެ އޭޕްރިލް މަހުގެ 5 ވަނަ ދުވަހު ހުޅުމާލޭގައި ޤާއިމްކޮށްފައިވާ ހާފްވޭ ހައުސްއަށް ކުރި ޒިޔާރަތާއި ގުޅޭގޮތުން މަޖިލީހަށް ލިބިފައިވާ މައުލޫމާތުގައި މިތަންތަނުގައި ގިނަ މައްސަލަތަކެއް ހުރިކަން ވަނީ ފާހަގަވެފައެވެ. އޭގެތެރޭގައި ހާފްވޭ ހައުސް ހުޅުވިއިރުވެސް މުޅި އިމާރާތައް ފެންފައިބާ ކަމާއި، އަދި 2018 ވަނަ އަހަރު ނިމުނުއިރު އިމާރާތުން ފެން ފޭބުމުގެ މައްސަލަ ބޮޑުވެ ތަން ހުސްކުރަން ޖެހުނުކަމާއި، އަދި ހިއުމަން ރައިޓްސް ކޮމިޝަނުން މި އިމާރާތް ބަލައި ފާސްކުރުމަށްފަހު މީހުން ބެލެހެއްޓުމަށް އެކަށީގެންވާތަނެއް ނޫންކަމަށް އަންގާފައިވާކަމަށް ވަނީ ބުނެފައެވެ.

ޙިދުމަތް ލިބިގަންނަން އަންނަ މީހުންނަށް ޙިދުމަތް ފޯރުކޮށްދިނުމަށް ބޭނުންވާ މުވައްޒަފުން އެކަށީގެންވާ ވަރަށް ނެތްކަމާއި، މިކަމުގެ ސަބަބުން މަސައްކަތް ކުރަން ތިބި މުވައްޒަފުންގެ މަސައްކަތް އިތުރުވެފައިވާކަމަށް ވަނީ ބުނެފައެވެ. ޙިދުމަތް ދިނުމަށް އެންމެ ބޮޑު ރޯލެއް އަދާކުރަނީ ކައުންސުލަރުންކަމާއި އެންޑީއޭގައި ކަނޑައަޅާފައިވާ ސްޓޭންޑާރޑްގައި ކޮންމެ ކައުންސެލަރަކަށް 19 ކްލައިންޓުން ތިބެންޖެހޭކަން ބަޔާންކޮށްފައިއޮތް ނަމަވެސް މިއީ ބޮޑު އަދަދެއްކަމަށާއި ކޭހެއް ނެގުމަށްފަހު އެ ކޭހުގެ މަސައްކަތްކުރުމާއި އަދި ކޮންމެ މަހަކު ޑްރަގް ކޯޓަށް ފޮނުވަންޖެހޭ ރިޕޯޓްތަކަށް ބަލާއިރު އެއީ ބޮޑު އަދަދެއްކަމަށް ވަނީ ބުނެފައެވެ.

މީގެއިތުރުންވެސް މުވައްޒަފުން ހަރުދަނާކުރުމަށް ޓްރެއިނިންގ ޕްރޮގްރާމްތައް ރާވާ ހިންގަމުން ނުދާކަން ވަނީ ފާހަގަކޮށްފައެވެ. އެގޮތުން ވޭތުވެދިޔަ އަހަރުތަކުގެ ބަޖެޓްގައި ކެޕޭސިޓީ ބިލްޑް ކުރުމަށް ޕްރޮގްރާމްތައް ހިމަނާފައި ނުވާތީ އެތަނުގައި މަސައްކަތްކުރާ މުވައްޒަފުންނަކީ ހަމައެކަނި ބޭސިކް ކޯހެއް ފުރިހަމަ ކުރުމަށްފަހު މަސައްކަތްކުރާ މުވައްޒަފުންނެވެ. މީގެއިތުރަށް މުވައްޒަފުންނަށްދޭ މުސާރަވެސް ކުޑަކަމަށް ވަނީ ރިޕޯޓްގައި ފާހަގަކޮށްފައެވެ.