ނޭކުރެންދޫ ކަނޑޫފާ ސަލާމަތްކުރޭ: “އަޅުގަނޑުމެންނަށް ފެންނަނީ މިތަން ނެތިގެންދާތަން”

ހދ. ނޭކުރެންދޫ ކަނޑޫފާ ކަނޑޫފާ ސަލާމަތް ކުރުމަށް ސަރުކާރުން އެކަށޭނަ މަސައްކަތެއް ނުކުރާކަމަށް ބުނެ، ނޭކުރެންދޫ ކައުންސިލުން ކަންބޮޑުވުން ފާޅުކޮށްފިއެވެ. ހދ. ނޭކުރެންދޫ ކަނޑޫފާ މަރުވެ ނެތިވަމުންދާކަން ފާހަގަކުރެވުނުތާ އަހަރަކަށްވުރެ ގިނަ ދުވަސް ވަނީ ވެފައެވެ.

ނޭކުރެންދޫ ކަނޑޫފާއަކީ ރާއްޖޭގެ އެންމެ ބިޔަ ކަނޑޫފާއެވެ. މިދިޔަ އަހަރުގެ ޖޫން މަހު ނޭކުރެންދޫ ކައުންސިލުން ވަނީ އެރަށުގެ ކަނޑޫފަލުން ދިހަ ހާހެއްހާ ކަނޑޫގަސް މަރުވެފައިވާކަމަށް އަންދާޒާ ކޮށްފައެވެ.

advertisement

ތިމާވެށީގެ މުއްސަނދި މި ކަނޑޫފާ ނެތި ހިނގައިދާނެކަމުގެ ބިރާއެކު އަހަރަކަށްވުރެ ގިނަ ދުވަސް ހޭދަވެގެން ގޮސްފައި ވަނިކޮށް ނޭކުރެންދޫ ކައުންސިލުން، އެ ކައުންސިލްގެ ރަސްމީ ފޭސްބުކް ޕޭޖްގައި ކުރި ޕޯސްޓެއްގައި ވިދާޅުވެފައި ވަނީ، ނޭކުރެންދޫ ކަނޑޫފަލުގެ ގަސްތައް މަރުވެ ހަލާކުވެ ކަނޑޫފާ ނެތިދިއުމުގެ މަގުމަތީގައިވާއިރު، މިކަމަށް ހައްލެއް ހޯދަން ސަރުކާރުން އެއްވެސް ވަރަކަށް މަސައްކަތް ކުރާ ތަނެއް ނުފެންނަ ކަމަށެވެ.

ނޭކުރެންދޫ ކައުންސިލުން މި ކަންބޮޑުވުން ފާޅުކުރައްވާފައިވާއިރު، އެރަށް ހިމެނޭހެން އުތުރުގެ ބައެއް ރަށްރަށުގެ ކަނޑޫފާތައް މަރުވާ ސަބަބު ދެނެގަތުމަށް އީޕީއޭއިން މިދިޔަ އަހަރު ޖުލައި ކުރި ސާވޭއާއި ބެހޭ މައުލޫމާތު، އޭގެ އަހަރެއްހާ ދުވަސްފަހުން މިއަހަރުގެ ޖުލައި މަހުތެރޭ ވަނީ ހާމަކުރައްވާފައެވެ.

އެރަށު ކަނޑޫފާ ނެތިހިނގައިދާނެ ކަމުގެ ބިރު ހީވެފައިވާތީ އެރަށު ކައުންސިލުންނާއި، ރައްޔިތުން ކުރަމުން ދިޔަ މަސައްކަތްތަކުގެ ނަތީޖާއެއްގެ ގޮތުން އެރަށު ކަނޑޫފާގެ ކަނޑޫގަސްތައް މަރުވެ، ނެތިދާ ސަބަބު ހޯދުމުގެ މަސައްކަތް، އެރަށުގެ ރައްޔިތުންނާއި ސޭވް މޯލްޑިވްސް ގުޅިގެން 2020 ވަނަ އަހަރުގެ ޖޫން މަހުގެ 26 ވަނަ ދުވަހު ފެށިއެވެ.

މީގެއިތުރުން ނޭކުރެންދޫގެ ކަނޑޫފަލުން ގިނަ ޢަދަދެއްގެ ކަނޑޫ ގަސްތައް މަރުވާ ސަބަބު ދެނެގަތުމަށްޓަކައި އެންވަޔަރަމަންޓަލް ޕްރޮޓެކްޝަން އޭޖެންސީ (އީޕީއޭ)ގެ ޓީމެއްވެސް މިދިޔަ އަހަރުގެ ޖުލައިމަހު ވަނީ އެރަށަށް ގޮސް ސާވޭއެއް ކޮށްފައެވެ.

މިއަހަރުގެ ޖުލައި މަހުގެ 6 ވަނަ ދުވަހު، އީޕީއޭއިން ނެރުނު ނޫސްބަޔާނެއްގައި ބުނެފައި ވަނީ، މިދިޔަ އަހަރުގެ މާރޗްމަހުން ފެށިގެން، ރާއްޖޭގެ އުތުރުގައިވާ އެންމެ ބޮޑެތި ކަނޑޫފާތަކުން ގިނަ ޢަދަދަކަށް ގަސްތައް ގޮތްނޭގޭގޮތަކަށް މަރުވަމުންދިޔުމާއި ގުޅިގެން، އެ ގަސްތައް މަރުވަމުންދާ ސަބަބު ހޯދުމަށް، އެ އެޖެންސީން މަސައްކަތް ކުރަމުން އަންނަ ކަމަށެވެ.

މި ދިރާސާގެ ހޯދުންތަކުން ކަނޑޫފާތައް މަރުވަމުންދާ ސަބަބު ކަނޑައެޅިގެން ހޯދިފައިނުވާތީ، ކަނޑޫފާތައް މަރުވަމުން ދިޔުމަށް މެދުވެރިވި ސަބަބު ދެނެގަތުމަށް އިތުރު ތަހުލީލުތަކެއް ކުރަންޖެހޭތީ، ކަނޑޫފާ އެންމެ ބޮޑަށް މަރުވަމުންދާ ރަށްރަށުން، ނެގިފައިވާ ގަހުގެ ސާމްޕަލްތައް، އިންޑިއާގެ ކޮޗިން ޔުނިވަރސިޓީ އޮފް ސައިންސް އެންޑް ޓެކްނޮލޮޖީއަށް ފޮނުވި ތަޙްލީލްތަކެއް ކުރެވިފައިވާ ކަމަށް އެ އެޖޭންސީން ބުންޏެވެ.