ކުޅިވަރުގައި ޖިންސީ ތަފާތުކުރުމަށް ޤާނޫނު ބުނާނީ ކީކޭ؟

މުޖްތަމައުގެ އެކިއެކި ކަންކަމުގައި ޖިންސުގެ ތަފާތު ކުރުންތަކުގެ ވާހަކައަކީ އަބަދުވެސް ދެކެވޭ ވާހަކައެކެވެ. ނަމަވެސް ޖިންސުގެ ތަފާތު ކުރުންތައް ނައްތާލުމަށް ޤާނޫނުގައިވެސް ވަނީ އަންހެނުންނާއި ފިރެހެނުންނަށް ހަމަހަމަ ފުރުސަތުތަކެއް ހޯދައިދީފައެވެ. އެގޮތުން ކުޅިވަރުގެ ހަރަކާތްތަކުގައިވެސް ހަމަހަމަ ފުރުސަތުތަކެއް ފަހިކޮށްދީފައިވާކަން ފާހަގަކޮށްލެވެއެވެ.

ޖެނޑަރ އިކުއަލިޓީ ޤާނޫނު ބުނާގޮތުން މުޖްތަމައުގެ ހުރިހައި ކަމެއްގައިވެސް އަންހެނުންނާއި ފިރެހެނުންނަށް ހަމަހަމަ ފުރުސަތުތަކެއް ފަހިކޮށްދޭންޖެހެއެވެ. މީގެތެރޭގައި ކުޅިވަރުވެސް ހިމެނެއެވެ. މީގެ މާނައަކީ ކުޅިވަރުގެ އެކިއެކި ހަރަކާތްތަކުގައި ބައިވެރިވުމުގެ ފުރުސަތުވެސް ފިރެހެނުންނެކޭ އެއްގޮތައް އަންހެނުންނަށް ލިބެންޖެހޭކަމެވެ. އަދި ކުޅިވަރުގެ އެކިއެކި ހަރަކާތްތަކުގައި ޓްރެއިނިން ލިބުމުގެ ފުރުސަތުވެސް ފިރެހެނުންނެކޭ އެއްފަދައިން އަންހެނުންނަށްވެސް ހޯދައިދޭންޖެހޭކަމެވެ.

އަދި ކުޅިވަރުގެ ހަރަކާތްތަކުގައި ބައިވެރިވާ އަންހެނުންނަށް އެކަމުގެ ސަބަބުން ދިމާވެދާނެ ޖިންސީ ފުރައްސާރައާއި އަންހެނަކަށްވީތީ އެކަމުގައި ދިމާވެދާނެ އެންމެހައި ފުރައްސާރައިން ސަލާމަތްވުމަށް މަގުފަހިކޮށްދޭންޖެހެއެވެ. އަދި ފިރެހެނުންނެކޭ އެއްފަދައިން އަންހެނުންނަށްވެސް ކުޅިވަރުގެ މައިދާނުގައި އެންމެ އުހުގައި ޤައުމު ރަމްޒުކޮށްދިނުމުގެ ފުރުސަތު ފަހިކޮށްދޭންޖެހޭކަމަށް މި ޤާނޫނުގައި ވަނީ ބުނެފައެވެ. މިއަދުގެ މުޖްތަމައުއަށް  ބަލާލާއިރު ކުޅިވަރުގެ މައިދާނުގައި އަންހެނުން ހަރަކާތްތެރިވެ ޤައުމަށް ފަހުރުވެރި ވަނަތައްވެސް އަންނަނީ ހޯދައިދެމުންނެވެ. ނަމަވެސް އަދިވެސް މިދާއިރާތަކުން އަންހެނުންނަށް ގޮންޖެހުންތަކެއް ހުރިކަމަށް ބައެއް ފަރާތްތަކުން ގަބޫލުކުރެއެވެ.