ޖަނަވާރުންގެ ހައްޤުތައް: ދުނިޔެ އަކީ އިންސާނުންގެ ތަރިކަ މުދަލެއް ނޫން، ބުޅާ ވެސް އުޅެން ޖެހޭނެ

ޖަނަވާރުންނަށް ގެއްލުން ދިނުމުގެ އެކިއެކި ވާހަކަތަކަކީ ދޭތެރެދޭތެރެއިން ސޯސަލް މީޑިއާގައި ދެކެވޭ ވާހަކަތަކެކެވެ. މަގުމަތީގައި އުޅޭ ޖަނަވާރުން މެރުމާއި އެތަކެއްޗަށް އަނިޔާކުރުމުގެ ފޮޓޯތަކާއި ވީޑިއޯތައްވެސް ދައުރުވެއެވެ. މިކަމުގެ ކަންބޮޑުވުން ފާޅުކޮށް ބައެއް މީހުން ޝުއޫރުވެސް ފާޅުކުރެއެވެ.

އާންމުގޮތެއްގައި މިގޮތައް ދެކެވޭ ވާހަކަތަކުގައި ބުޅަލަށް ގެއްލުން ދިނުމުގެ ވާހަކަތައް ވަރަށް ގިނައިން ދެކެވެއެވެ. ބުޅަލަކީ ގިނަ މީހުން ގޭގައި މިހާރު ޕެޓްގެ ގޮތުގައިވެސް ގެންގުޅޭ އެއްޗެކެވެ. މާލޭގައި ބުޅާ ގިނަވެ މީހުންނަށް އޭގެ އުނދަގޫ ބޮޑުވެ އެވާހަކަވެސް ދައްކައެވެ. މިކަމާއިހެދި ބައެއް މީހުން ބުޅާތަކަށް ގެއްލުންވެސްދެއެވެ. އަނިޔާވެރިކޮށް ބުޅާ މަރާ މައްސަލަ ފުލުހުންގެ ސަމާލުކަމަށް ގެނެސް އެމައްސަލަ ސީރިޔަސް މައްސަލައެއްގެ ގޮތުގައި ފުލުހުން ބަލަންވެސް ބަލާފައިވެ އެވެ. ނަމަވެސް އެއްވެސް ޖަނަވާރަކަށް ގެއްލުން ދިނުމަކީ އެކަމުގެ ހައްލެއް ނޫނެވެ.

މާލޭގައި ދޫވެގެން މަގުތަކުގައި މިއުޅޭ ބުޅާތައް ގިނަވާ ސަބަބުގެ ތެރޭގައި އެކަށީގެންވާ ގޮތުގައި މިތަކެތި ނުބެލެހެއްޓުން ހިމެނެއެވެ. ބުޅަލުގެ މައްސަލައަކީ މާލެއަށް މިހާރު ވަރަށް ބޮޑުވެފައިވާ މައްސައެއް ކަމަށްވުމާއެކު، އަމިއްލަ ހަރަދުގައި މާލޭގައި ބުޅާ ގެންގުޅޭނެ ފެސިލިޓީއެއް ހަދައިދޭނެ ބަޔަކު ހޯދަން ވަރަށް އަވަހަށް އިއުލާނު ކުރާނެ ކަމަށް މާލޭ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒުވެސް ދާދިފަހުން ވަނީ ވިދާޅުވެފައެވެ.

މަގުމަތީގައި އުޅޭ ބުޅަލަށާއި އަދި އެހެންވެސް ޖަނަވާރުތަކަށް މީހުން ގެއްލުން ދޭއިރު މިތަކެއްޗަށް އަނިޔާކުރާ މީހުން އެކަންކަން ކުރުން ހުއްޓުވުމަށް ގާގޫނުތައް ބޭނުންވެއެވެ. ނަމަވެސް މިފަދަ ގާނޫނުތައް އަދި ހެދިފައި ނެތުމަކީ ހިތާމަކުރަންޖެހޭ ކަމެކެވެ.