އުމުރާއި އެއްވަރަށް ދިގުނުވާ ކުދިން ރާއްޖޭގައި ގިނަ

ރާއްޖޭގައި އުމުރާއި އެއްވަރަށް ދިގުނުވާ ކުދިންގެ އަދަދު އިތުރުކަމަށް ދިރާސާއަކުން ދައްކައިފިއެވެ. ޑިމޮގްރަފިކް ހެލްތް ސާރވޭ 2017 އިން ދައްކާގޮތުގައި ރާއްޖޭގައި ކޮންމެ 100 ކުއްޖަކުން 15 ކުއްޖަކީ އުމުރާއި އެއްވަރަށް އިސްކޮޅު ދިގުނުވާ ކުދިންނެވެ.

އާންމުގޮތެއްގައި އުމުރާއި އެއްވަރަށް ދިގުނުވުމުގެ މައްސަލަ ދިމާވަނީ ހަށިގަނޑަށް ބޭނުންވާ މިންވަރަށް ނިއުޓްރިޝަން ލިބޭ މިންވަރު ދަށްވުމުގެ ސަބަބުންނެވެ. އަދި މާގިނައިން އިންފެކްޝަންގެ މައްސަލަތައް ދިމާވާ ނަމަވެސް ހެދިބޮޑުވުމުގައި މައްސަލަތަކެއް އުޅެދާނެއެވެ.

advertisement

މުޅި ދުނިޔޭގައިވެސް އުމުރާއި އެއްވަރަށް ހެދިބޮޑުވުމުގެ މައްސަލަ ގިނަ ކުޑަކުދިންނަށް ދިމާވެއެވެ. އެގޮތުން 2012 ވަނަ އަހަރު ހެދި ދިރާސާއަކުން ދައްކާގޮތުގައި މުޅި ދުނިޔޭގައި 162 މިލިއަން ކުޑަކުދިންނަކީ އުމުރާއި އެއްވަރަށް ހެދިބޮޑުވުމުގައި މައްސަލަ އުޅޭ ކުދިންނެވެ. އަދި މިފަދަ ކުދިން އެންމެ ގިނައީ އެފްރިކާ އަދި އޭޝިއާގައެވެ. ރާއްޖެވެސް ހިމެނެނީ އޭޝިއާގެ ޤައުމުތަކުގެ ތެރޭގައެވެ.

މިފަދަ ކުދިންނަށް ސިއްހީ އެހެން ގިނަ މައްސަލަތައްވެސް ދިމާވުން އެކަށީގެންވެއެވެ. އޭގެތެރޭގައި އެކިއެކި އެހެން ބަލިތައް ޖެހުމާއި، މެންޓަލް ޑިވެލޮޕްމަންޓުގައި ލަސްތަކެއް ދިމާވުމާއި، ސްކޫލްގައި އެންމެ އެކަށީގެންވާ ގޮތުގައި ފޯކަސް ނުކުރެވުން ހިމެނެއެވެ.

މިކަން ކުޑަކުރުމަށްޓަކައި ކުދިންނަށް ސިއްހަތައް ފައިދާހުރި ކާނާގެ ބާވަތްތައް ދޭންޖެހެއެވެ. އެގޮތުން ކުއްޖާގެ ފުރަތަމަ 6 މަސްދުވަހު ގާތުން ދިނުމާއި، އަދި އޭގެފަހުން ނިއުޓްރިޝަން ހިމެނޭ ބަވަތްތައް ކުއްޖާގެ ކެއުމުގައި ދިނުމަށް އިސްކަންދޭންޖެހެއެވެ. އަދި ބުއިމުގައި ރައްކާތެރި ފެން ބޭނުންކުރަންޖެހެއެވެ. ތައްޔާރީ ކާނާތައް ދިނުން މަދުކުރަން ޖެހެއެވެ.