ރާއްޖޭގައި ފުރަތަމަ ފަހަރަށް ޖީން ސީކުއެންސިން ޓެސްޓު މެޑިފްލެކްސް އިން ހަދަނީ

ރާއްޖޭގައި ފުރަތަމަ ފަހަރަށް ޖީން ސީކުއެންސިން ޓެސްޓު ހެދުމަށް، މެޑިފްލެކްސް އިން ތައްޔާރުވެއްޖެ އެވެ. މިކަމަށްޓަކައި މެޑިޕްލެކްސްގެ މުވައްޒަފުންވެސް މިހާރު ވަނީ ތަމްރީންކޮށްފައެވެ.

ރާއްޖޭގައި ފުރަތަމަ ފަހަރަށް ޖީން ސީކުއެންސިން ޓެސްޓު ހެދުމަށް، މެޑިފްލެކްސްއިން ތައްޔާރުވެފައިވާއިރު މެޑިފްލެކްސްއިން މި މަސައްކަތް ކުރަނީ އެމެރިކާގެ އެންމެ ވަރުގަދަ ކުންފުނި، އިލުމިނާއާ ގުޅިގެންނެވެ. މެޑިފްލެކްސްއިން ބުނީ އެ ކުންފުނީގެ ސީކުއެންސިން ލެބޯޓްރީ ޑިޒައިންކޮށްފައިވަނީ އިލުމިނާއާގެ ސްޓޭންޑާރޑްތަކާއި އެއްގޮތައް ކަމަށެވެ.

advertisement

މެޑިފްލެކްސްއަކީ މެޑްޓެކްގެ ސަބްސިޑަރީ ކުންފުންޏެކެވެ. ކޯވިޑް19 އަށް ޓެސްޓް ކުރުމަށް ރާއްޖޭގައި ގިނަ ލެބްތަކެއް އެބަހުއްޓެވެ. ނަމަވެސް މިއިން އެއްވެސް ލެބްއަކުން އެއީ ކޮން ވޭއިއަންޓެއްކަމެއް ނޭންގެއެވެ. އެކަން ކުރުމަށް ޖީން ސީކުއެންސިން ޓެސްޓް ހަދަންޖެހެއެވެ. މިހާރު ރާއްޖެއިން މިކަން ދެނެގަތުމަށް ސާންޕަލް ފޮނުވަނީ ރާއްޖެއިން ބޭރަށެވެ. ނަމަވެސް މެޑިފްލެކްސްއިން މި ޓެސްޓް ހަދަން ފެށުމުން ރާއްޖޭގައިވެސް އެއީ ކޮން ވޭރިއަންޓެއްކަން ދެނެގަނެވޭނެއެވެ. މިހާރު ރާއްޖެއިން ބޭރަށް ސާންޕަލް ފޮނުވައިގެން ޓެސްޓުގެ ނަތީޖާ ލިބުމަށް ދެ ހަފުތާ ނަގައެވެ. ނަމަވެސް މެޑިފްލެކްސްއިން މި ޓެސްޓް ހަދަން ފެށުމުން ތިން ދުވަހުގެ ތެރޭގައި ނަތީޖާ ލިބިގެންދާނެކަމަށް އެ ކުންފުނިން ބުނެއެވެ.

އާއްމު ލެބޯޓްރީއެއްގައި ހަދާ ހުރިހާ ޓެސްޓެއް މެޑިފްލެކްސް އިން ހެދެ އެވެ. ސަރުކާރުގެ މައި ހޮސްޕިޓަލް، އައިޖީއެމްއެޗްގެ ލެބޯޓްރީގައި ވެސް ޓެސްޓުތައް ހެދުމަށް އެ ކުންފުނިން އެހީތެރިކަން ދެ އެވެ. މެޑިފްލެކްސްއިން ބުނީ ހެލްތު މިނިސްޓްރީގެ ހުއްދަ ލިބުމުން ޖީން ސީކުއެންސިން ޓެސްޓު ރަސްމީކޮށް ހަދަން ފަށާނެކަމަށެވެ.