ކަންކަން މާދަމާއަށް ފަސްނުކޮށް ވަގުތުގައި ކުރަން އާދަކުރޭ

ކޮންމެ ކަމެއް މާދަމަޔަށް ފަސްކުރުމަކީ ބައެއް މީހުންގެ ކަށީގައި ހިފާފައިވާ އާދައެކެވެ. ކިޔަވާކުއްޖާ ފިލާވަޅު ދަސްކުރުން ވިއަސް ނުވަތަ ދިރިއުޅުމަށް ކުރާ މަސައްކަތުގައި ނުނިމި ފުނި ޖެހިފައި ހުރި މަސައްކަތްތަކެއް ނިންމުން ވެސް ފަސްކުރެވޭތަން އާދެއެވެ.

ޝެފީލްޑް ޔުނިވާރސިޓީގެ ސައިކޮލޮޖީ ޕްރޮފެސަރެއް ކަމުގައިވާ ޑރ ފޫޝިއާ ސިރޮއިސް ބުނާ ގޮތުގައި މީހުން މާދަމާކުރުމުގައި ދެމި ތިބެނީ ކުރަންޖެހޭ ކަންތައް ހިތަށް އެރުމުން މޫޑު ގޯސްވެ އެ މޫޑު ހަމައަކަށް ނޭޅުވޭތީ އެވެ.

advertisement

އެއްބަޔަކު މަސައްކަތް ފަސްކުރަމުން ގެންދަނީ އެންމެ ފުރިހަމަ އެންމެ ހިތްހަމަޖެހޭ މޫޑު އަންނަން ދެނެވެ. ނަމަވެސް އެއީ ދުވަހަކު ވެސް އަންނަ މޫޑަކަށް ނުވެ އެވެ. ގިނަފަހަރަށް އެކަމެއް ކުރަން ފެށެނީ ސުންގަޑި ހަމަވާން ކައިރިވެ އިތުރު އެއްވެސް ކަމެއް ކުރަން މޫޑު ނުހުންނަން ފަށާ ހިސާބުންނެވެ.

ކުރަން ޖެހޭ މުހިންމު ކަންތައްތައް މާދަމަޔަށް ފަސްކޮށްލެވޭ މައިގަނޑު ސަބަބަކީ ކުރަން ޖެހިފައި ހުރި ކަންކަން ހިތައް އެރުމުން މޫޑަށް އަންނަ ބަދަލުތަކާއި ކުރެވޭ ނުރަނގަޅު އިހުސާސްތަކެވެ. މިސާލަކަށް ކުރަން ޖެހޭ ކަންތައް ކުރެވިދާނެ ކަމާ މެދު ޝައްކު އުފެދުމެވެ. މަސައްކަތުގައި ފެއިލް ވެދާނެތީ ޖެހިލުންވުމެވެ. ކުރަން ޖެހޭ މަސައްކަތް ގިނަކަމާއި ބުރަކަމާއި އުނދަގޫކަން ހިތަށް އެރުމެވެ. ކުރާ މަސައްކަތަކީ އެއްވެސް އުނިކަމެއް ނެތް އެންމެ ފުރިހަމަ މަސައްކަތަކަށް ނުވެދާނެތީ ޖެހިލުން ވުމެވެ. އަދި ބައެއް މީހުންނަށް ކުރަން ޖެހޭ މަސައްކަތްތައް ފަސްކޮށްލެވެނީ ތިމާގެ ނަޒަރުގައި ތިމާ އަކީ ދަށް މީހެއް ކަމުގައި ދެކެން ބޭނުންނުވާތީ އެވެ.

އެތައް ދުވަހެއް ވާނދެން ނުނިމި ފުނިޖެހިފައި ހުރި މަސައްކަތްތަކެއް ކުރުމަކީ އެކަންކަން ކުރާ ގަޑީގައި ހިތްހަމަ ޖެހުން ލިބޭނެ ކަމަކަށް ނުވެދާނެ އެވެ. ކުރާ މަސައްކަތުގައި އުނިކަމެއް ހުރެދާނެތީ މާދަމާކުރެވޭނަމަ އަބަދުވެސް އޮންނާނީ މަސައްކަތްތައް ފުނިޖެހި ނުނިންމިފައެވެ. އެހެންކަމުން މިއަދު ކުރަންހުރި މަސައްކަތެއް މިއަދަށް ނިންމުމަށް އަޒުމުކަނޑައަޅާށެވެ. މީގެސަބަބުން އަމިއްލަ ނަފްސަށްވެސް ހަމަޖެހުން ލިބޭނެއެވެ.