ޕްރޮޓީން އެކަށީގެންވާ ވަރަށް ކެވޭތަ؟

ދުޅަހެޔޮ ހަށިހެޔޮ މީހަކަށްވުމަށް ޕްރޮޓީންއަކީ ވަރަށް މުހިއްމު ރޯލެއް އަދާކުރާ އެއްޗެކެވެ. އެގޮތުން ބަލާއިރު ހަށިގަނޑުގެ ހުރިހާ ސެލޯށި (ޓިޝޫ)ތަކާއި، ދިރު (ސެލް)ތަކާއި ލޭފަދަ މުހިއްމު ހުރިހާ ދިޔަވަރުތަކެއް ހެދިފައިވަނީ ޕްރޮޓީން އެކުލެވިގެންނެވެ. މީގެ އިތުރުން އެންޒައިމްއާއި ހޯމޯންގެ ގޮތުގައި އުފެދިފައިވާ ޕްރޮޓީންތައް ހަށިގަނޑުގެ އެކި ގުނަވަންތައް ހިންގުމުގެ މަސައްކަތުގައި ހަށިގަނޑުގެ ހުރިހާ ދިމާއެއްގައި ހަރަކާތްތެރިވަމުން ގެންދެއެވެ.

ހަށިގަނޑަށް ބޭނުންވާ ޕްރޮޓީންގެ މިންވަރު ބިނާވެފައިވަނީ އެމީހެއްގެ އުމުރާއި، ޖިންސާއި، ސައިޒާއި އެމީހެއް ކެއުމުގައި ބޭނުންކުރެވޭ ކާނާގެ ބާވަތްތަކުގެ މައްޗަށެވެ. ހަށިގަނޑުގެ ބަރުދަނުގެ ކޮންމެ ޕައުންޑަކަށް 1.0-0.7 ގްރާމާއި ދެމެދުގެ އަދަދަކަށް ޕްރޮޓީން ބޭނުންވެއެވެ. މާނައަކީ 150 ޕައުންޑް ނުވަތަ 68 ކިލޯ ހުންނަ މީހަކަށް 150-105 ގްރާމްގެ ޕްރޮޓީން ކޮންމެ ދުވަހަކު ބޭނުންވާކަމެވެ. ވީއިރު އެމިންވަރަށް ޕްރޮޓީން ހަށިގަނޑަށް ލިއްބައިދޭ ފަދަ ކާނާކެއުމަކީ މުހިންމުކަމެކެވެ.

advertisement

ކެއުމުގައި ބަލަންވީ ތިމާ ކެއުމަށް ބޭނުންކުރާ ބާވަތްތަކަކީ އޭގައި ކިހާ މިންވަރަކަށް ޕްރޮޓީންގެ ބައި ހިމެނޭ ކާނާއެއްތޯއެވެ. ސަބަބަކީ ޕްރޮޓީން އެކުލެވިގެންވާ ގިނަކާނާތަކަކީ ސެޗުރޭޓެޑް ފެޓްސް އޭގައި ގިނައަދަދަކަށް އެކުލެވިގެންވާ ކެއުންތަކަށް ވުމުންނެވެ. އެއީ އޭގެ ސަބަބުން ހަށިގަނޑުގައި ކޮލެސްޓްރޯލް އިތުރުވެ ހިތުގެ ބަލިތަކާއި ސްޓްރޯކް ޖެހުމުގެ ފުރުސަތު ބޮޑުކޮށްދޭ އެއްޗެއްވެސް މެއެވެ. މިކަމުގައިވެސް އެންމެ ބުއްދިވެރި ގޮތަކީ ތައްޔާރީ ކާނާއާއި ސަޕްލިމެންޓު ނުވަތަ ޕައުޑަރަށް ބަރޯސާވުމަށްވުރެ ބޮޑަށް ފަސޭހައިން ލިބެންހުންނަ ކާނާތަށް ޚިޔާރު ކުރުމެވެ.

ރާއްޖެއިން ފަސޭހަކަމާއި އެކު ލިބެން ހުންނަ ޕްރޮޓީން ލިބެން ހުންނަ ބާވަތްތައް:

• އެއްގަމު މަހާއި ކަނޑު މަހާއި ފަރުމަހުގެ ބާވަތްތައް
• ކިރާއި ކިރުގެ އުފެއްދުން: ކޮޓޭޖް ޗީޒް އަދި ޔޯގަޓް
• ގޮވާމާއި ފަލަމަޑި: މުގުގެ ބާވަތްތައް، ހިމެރި، ތޮޅިއާއި އޮށުގެ ބާވަތްތައް، މަދުގެ ބާވަތްތައް