މީހާ ސްޓްރެސްވާ ކަން ބައެއް މީހުންނަކަށް ނޭންގޭ

ސްޓްރެސް އަކީ އިހުސާސެކެވެ. އެއީ ތިމާގެ ވަށައިގެންވާ މާހައުލުގައި ހިނގާ ކަންކަމުގެ ތެރެއިން ތިމާ ފިޔަވަޅެއް އަޅަންޖެހޭ ނުވަތަ ސަމާލުކަން ދޭންޖެހޭ ކަންކަމާމެދު ތިމާގެ ހަށިގަނޑު ދޭ ފުރަތަމަ ރައްދެވެ. ގިނަ ފަހަރު އެ އިހުސާސް ޓްރިގާ ވަނީ އައު ކަމެއް ތަޖުރިބާ ކުރަން ޖެހުމުންނާއި، ނުރައްކަލެއް ކުރިމަތިވުމުން ނުވަތަ ހާލަތުގެ މައްޗަށް ކޮންޓްރޯލް ނެތްކަމުގެ އިހުސާސް ކުރެވުމުންނެވެ.

ސްޓްރެސްވެގެން އުޅޭކަން އެނގޭނީ ކިހިނެއް؟

ހާސްވުމާއި ބިރުގަތުމާއި ރުޅިއާއި ދެރަވުމަކީ ސްޓްރެސް ވެއްޖެކަން ބުނެދިނުމަށް ހަށިގަނޑު ހަރަކާތްކުރާ ގޮތެވެ. ރޭނިދި ނުނިދި، މީހުންނާ ވާހަކަ ދައްކާ ހިތްނުވެ، އެކަނި ވަގުތު ހޭދަކޮށްލަން ބޭނުންވުމާއި އަދި މީހުންނާ މުއާމަލާތު ކުރުމުގައި ހަރުކަށި ވެވުމަކީ ސްޓްރެސް ވެއްޖެކަމުގެ އަލާމާތެވެ.

advertisement

ސްޓްރެސް ވުމަކީ ހަމައެކަނި ނަފްސާނީ ގޮތުން ބަލިވުމެއްވެސް ނޫނެވެ. ސްޓްރެސްއާ ގުޅިފައިހުރި ޖިސްމާނީ ބަލިތައްވެސް އިންތިހާއެވެ. އެގޮތުން ފަލަވާ ބަލި، ހިތުގެ ބަލި، ހަކުރު މަތިވުން، އަދި ނޭވާ ހިއްލުން ފަދަ ބަލިތައް ޖެހުމުގައިވެސް ސްޓްރެސްވުން އެއީ ސަބަބެކެވެ.

ސްޓްރެސްގެ އިހުސާސާ އެއްކޮށް ދުރުވެގަތުމަކީ އެއްވެސް މީހަކަށް ކުރެވޭނޭ ކަމެއް ނޫނެވެ. އެހެންނަމަވެސް ކުރެވިދާނޭ ކަމަކީ ސްޓްރެސް މެނޭޖް ކުރުމެވެ. މާބޮޑަށް ސްޓްރެސް ވާނަމަ އެހެން ކަމަކަށް ފޯކަސް ކުރެވިދާނެއެވެ. ބްރޭކެއް ނެގިދާނެއެވެ. ނުވަތަ ތިމާ ކުރާހިތްވާ ކަމެއް ކޮށްލެވިދާނެއެވެ.