މޫސުމީ ބަދަލުތަކުން ރާއްޖެ ސަލާމަތްކުރުމަށް ކުރަމުންދާ ޑިމާންޑްތައް އަދިވެސް ދަނީ ގިނަވަމުން

މޫސުމަށް އަންނަ ބަދަލުތަކުގެ ސަބަބުން ރާއްޖެއަށް ލިބެމުންދާ ގެއްލުންތަކުގެ ކަންބޮޑުވުން ފާޅުކޮށް މިކަންކަން ހައްލުކޮށްދޭން ސަރުކާރުގެ އިދާރާތަކަށް ގޮވާލައިފިއެވެ. ސޭވް މޯލްޑިވްސްއިން ބުނީ އެންމެފަހުން އެކުލަވާލެވުނު ތިރީގައިވާ ޑިމާންޑުތަކުގެ ލިސްޓު 10 އޮކްޓޫބަރު 2019 ވަނަ ދުވަހު ސަރުކާރުގެ އޮފީސްތަކަށާއި ރައްޔިތުންގެ މަޖިލިހުގެ އިދާރާއާއި އިސް ފަރާތްތަކަށް ފޮނުވާފައިވާނެކަމަށެވެ.

ދިވެހި ސަރުކާރުގެ ފަރާތުން މިހާރުން މިހާރަށް އަމަލުކުރުމަށް ގޮވާލާފައިވާ ކަންތައްތަކުގެ ތެރޭގައި ހިމެނެނީ:

1 – ރާއްޖޭގެ ނާޒުކު ތިމާވެށްޓާއި ދިރުންތައް އަންނަންއޮތް ޖީލުތަކަށް ރައްކާތެރި ގޮތުގައި ވާސިލުކުރުމަށް
މިހާރުން މިހާރަށް ފަރުފަޅު ހިއްކުން ހުއްޓާލާ މަހާޖައްރާފާ އެހެލުން

2 – ގައުމީތަރައްޤީގެ ޕްލޭން ތަކުގައި ރާއްޖޭގެ ވިލުންވެރިކަމަކީ އެންމެއިސްކަން ކަމުގައި ހިމެނުން

3 – ރިސޯޓުތައް ފެހިކުރަން ރަށްރަށުގެ ރުއްގަސް ވިއްކާ، ކޮނެނަގައިގެން ގެންދިއުން މިހާރުން މިހާރަށް ހުއްޓުވުން

4 – ކާބޯތަކެތީގެ ރައްކާތެރިކަމާ ޔަގީންކަން ކަށަވަރުކުރުމަށް ދަނޑުގޮވާންކުރެވޭ ބިންތައް ސުންނާފަތިކުރުން މިހާރުންމިހާރަށް ހުއްޓުވުން،
އަދި ރިސޯޓުހެދުމަށް އިތުރު ރަށްތައް ދޫކުރުން ހުއްޓާލުން

5 – ފެންލިބުން ކަށަވަރުކުރަން ވާރޭފެން ނެގުމުގެ ނިޒާމުއަލުން އާލާކޮށް ޑީސެލިނޭޝަނަށް ބަރޯސާވުން ކުޑަކުރުން

6 – އިންސިނަރޭޓަރު ތައާރަފުކުރުން ހުއްޓާލުމާއެކު ކުނިނައްތާލުމުގެ ލަނޑުދަނޑިއަކީ ޒީރޯވޭސްޓް ނިޒާމަކަށް އަމާޒުހިފުމަށް –
ހ) އެއްފަހަރު ބޭނުންކުރާ ޕްލާސްޓިކް މަނާކުރުން
ށ) އީ.ޕީ.އޭ ލޯގޯ ޖެހިޕްލާސްޓިކު މިހާރުންމިހާރަށް އަނބުރާގެންގޮސް، އާންމުންނަށް މައިކްރޯޕްލާސްޓިކްގެ ގެއްލުންތައް ހާމަކޮށްދިނުން
ނ) ޕްލާސްޓިކް ފުޅިތައްޔާރުކުރުން ހުއްޓާލައި ދެމެހެއްޓެނިވި އެހެންގޮތްތައް ތައާރަފުކުރުން

7 – ވައި ތަޣައްޔަރުވުން ހުއްޓުވުމަށް ތެލުގެ ހަކަތަބޭނުންކުރުން ހުއްޓާލައި އިއާދަ ކުރުވަނިވި ހަކަތަ އުފައްދާ ޓެކްނޮލޮޖީތަކަށް ބަދަލުކުރުން

8 – ތެލަށް ބަރޯސާވާ އުޅަނދުތައް މަދުކޮށް، އުޅަނދުމަދުކުރުމުގެ ހައްދުކަނޑައަޅާ ސާފުހަކަތަ ބޭނުންކުރާ އާންމު ދަތުރުފަތުރުގެ ނިޒާމު ގާއިމުކުރުން

9 – ތިމާވެށްޓާއި ދިރުންތައް ނެތިދާފަދަ އެއާޕޯޓު މަޝްރޫއުތައް ހުއްޓާލާ އަންނަންއޮތް ޖީލުތަކަށް ގުދުރަތީވަސީލަތްތައް ވާސިލުކުރުން

10 – ގްރޭޓާ މާލެ ސަރަހައްދު ތޮއްޖެއްސުން މިހާރުން މިހާރަށް ހުއްޓާލާ އިންސާނުންނަށް ދުޅަހެއު ދިރިއުޅުމެއް އުޅެވޭނެފަދަ ވެއްޓެއް ގާއިމުކުރުމަށް ޚިދުމަތްތައް ލާމަރުކަޒުކުރަން ފެށުން

11 – މޫސުމަށް އަންނަ ބަދަލުތަކުން ދިމާވާނެ ކާރިސާތަކުގެ ގެއްލުން ކުޑަކޮށް ރައްކާތެރިވުމަށްޓަކައި ޤުދުރަތީ ދިފާއީ ނިޒާމުތައް ހިމާޔަތްކޮށް، ރައްކާތެރިކޮށް، މޫސުމަށް އަންނަ ބަދަލުތަކަށް ވިލުންވެރިކުރުމަށް ގުދުރަތީ ނިޒާމުތައް ދެމެހެއްޓުމަކީ އިސްކަންދޭންޖެހޭ ކަމެއްގޮތުގައި ކަނޑައަޅާ އަމަލުކުރުން

12 – އަންނަންއޮތް ޖީލުތައް މޫސުމަށް އަންނަ ބަދަލުތަކަށް ތައްޔާރުކޮށް އެމީހުންގެ ވިލުންވެރިކަން އިތުރުކުރުމަށް ސްކޫލްތަކުގެ މަންހަޖަށް މޫސުމަށް އަންނަބަދަލުތަކާއި ތިމާވެށި ދެނެގަތުމުގެ މައުލޫމާތު ލުމަށް މިހާރުންމިހާރަށް މަސައްކަތް ފެށުން

13 – މޫސުމަށް އަންނަ ބަދަލުތަކުގެ ސަބަބުން ރާއްޖޭގެ ރަށްރަށަށް ލިބިދާނެ ގެއްލުން ކުޑަކުރުމަށާއި، ރަށްރަށުގެ ވިލުންވެރިކަން އިތުރުކުރުމަށް ޕްރޮޖެކްޓުތަކާއި ޕްރޮގްރާމު ހިންގުމަށް ހޯދާ އެހީގެ ފައިސާގެ އަދަދާއި ޚަރަދުކުރި ގޮތުގެ ތަފްސީލީ މައުލޫމާތާއި އެޕްރޮޖެކްޓުތައް ހިންގުމަށް ޚިޔާރުކުރާ ތަންތަނާއި ތަންފީޒުކުރުމުގެ ކަންކަންނިންމިގޮތުގެ ފުރިހަމަ މައުލޫމާތު ހާމަކުރުމުގެ އިތުރުން، ޕްރޮޖެކްޓު ފަރުމާކުރަން ފެށިގެންނިމެންދެން ރަށުގެ ރައްޔިތުންގެ މައުނަވީ ބައިވެރިވުން އޮތުން

މޫސުމަށް އަންނަ ބަދަލުތަކުގެ ސަބަބުން ރާއްޖޭގެ ތިމާވެއްޓަށް އަންނަނީ އޭގެ ނޭދެވޭ އަސަރުތައް ކުރަމުންނެވެ. އަދި އެކިއެކި ޖަމިއްޔާތަކުން އަންނަނީ މިކަމުގެ ކަންބޮޑުވުން ފާޅުކުރަމުންނެވެ.