ދަމާލާ ވޭޕުން ސިއްހީ އެތައް މައްސަލައެއް

ވޭޕަކީ ސިނގިރޭޓު ބޯ މީހުން އެކަމުން ދުރުހެލިކުރުވުމަށް ބާރު އެޅުމުގެ ގޮތުން 2003 ވަނަ އަހަރު ޗައިނާގެ ފާމަސިސްޓެއް ކަމަށްވާ ހޮން ލިންކު އުފައްދާފައިވާ އެއްޗެކެވެ. ނަމަވެސް ވޭޕް ބޭނުން ކުރުމަކީ ދުންފަތުގެ އިސްތިއުމާލު ކުރުމުން މީހާ ދުރުކޮށްދޭ ކަމެއް ނޫން ކަން ދިރާސާތަކުން ދައްކަ އެވެ. ދުނިޔޭގެ ސިއްހަތު ޖަމިއްޔާއިން 2008 ވަނަ އަހަރު ނެރެފަވާ ބަޔާނެއްގައި ބުނެފަވާ ގޮތުގައި ވޭޕަކީ ސިނިގިރޭޓް ބުއިމުން މީހާ ދުރުކޮށްދޭ ކަމެއްކަން ހާމަވާ އެއްވެސް ހެއްކެއް ފެންނާކަށް ނެތެވެ.

ވޭޕް ބޭނުންކުރާ މީހުންގެ އަދަދު މިހާރު މުޅި ދުނިޔޭގައިވެސް ވަނީ އިތުރުވެފައެވެ. ރާއްޖޭގައިވެސް ގިނަ އަދަދެއްގެ ޒުވާނުން މިހާރު އަންނަނީ ވޭޕް ބޭނުންކުރަމުންނެވެ. ޒުވާނުންގެ އިތުރުން ފުރާވަރުގެ ކުދިންގެ ވޭޕް ބޭނުންކުރާ މިންވަރު އަންނަނީ އިތުރުވަމުންނެވެ.

advertisement

ވޭޕްގައި ވެސް ކޮންމެވެސް ވަރަކަށް ދުންފަތުގެ އަސަރު ހުރެއެވެ. ދުންފަތަކީ މީހާ އެކަމަށް ދެވި ހިފާ އެއްޗަކަށް ވުމާއެކު ވޭޕް ބޭނުންކުރާ މީހުން ދުންފަތާއި ދިމާއަށް ދިޔުމުގެ ފުރުސަތު ބޮޑުކަން އެމެރިކާގައި ކުރެވުނު ދިރާސާއަކުންވެސް ހާމަވެފައިވެއެވެ.

ވޭޕް ބޭނުންކުރުމަކީ އޭގެ ސަބަބުން މީހާއަށް ސިއްހީ އެތައް މައްސަލައަކާއި ކުރިމަތިލާންޖެހޭ ކަމެކެވެ. ސިއްހީ މާހިރުން ވިދާޅުވާ ގޮތުގައި ވޭޕްގެ ސަބަބުން ހަށިގަނޑުގެ ދިފާއީ ނިޒާމް ބަލިކަށިވެއެވެ. މީގެއިތުރުން ވޭޕްގެ ސަބަބުން ޓިއުމަރު ސެލްތައް އިތުރުވެ ކެންސަރު ޖެހުމަށްވެސް މަގުފަހިވާ ކަމަށް އެންވައިޔޫގެ ދިރާސާއަކުން ވަނީ ހާމަވެފައެވެ.

ހާވާޑް ޔުނިވާސިޓީން ކޮށްފައިވާ ދިރާސާއަކުން ހާމަވެފައިވާ ގޮތުގައި އީ ސިނގިރޭޓުގައި ހުންނަ ވެނީލާ އާއި، މޭޕަލް އަދި ކޮކޮނަޓްފަދަ ތަފާތު ފްލޭވާތައް ގެނައުމަށްޓަކައި ބޭނުން ކުރެވޭ މާއްދާއެއް ކަމަށްވާ ޑައިއެސެޓައިލްގެ ސަބަބުން ނުރައްކާތެރި ޕޮޕްކޯން ލަންގް ބަލި ޖެހުމަށް މަގުފަހިވެއެވެ. ޕޮޕްކޯން ލަންގްސް އަކީ ނޭވާލުމުގެ ނިޒާމަށް ކުރިމަތިވާ ނުރައްކާތެރި ބައްޔެކެވެ. މިބަލީގެ ސަބަބުން ކެއްސުމާއި ނޭވާލާން އުނދަގޫވުމާއި ނޭވާކުރުވުން ފަދަ މައްސަލަތައް ކުރިމަތިވެއެވެ. މީގެއިތުރުރުން ވޭޕް ބޭނުންކުރުމަކީ މީހާއަށް ހިތުގެ އެކިއެކި މައްސަލައަކާއިވެސް ކުރިމަތިލާންޖެހޭ ކަމެކެވެ.