ގެވެށި އަނިޔާގެ ޝިކާރައަށް ވާ މީހުންނަށް ދައުލަތުން ސޭފް ހައުސިންގ ދޭން ޖެހެންވީ ކީއްވެ؟

ގެވެށި އަނިޔާއަކީ ރާއްޖޭގައި ބޮޑުވެފައިވާ މައްސަލައެކެވެ. ގެވެށި އަނިޔާ ލިބޭ މީހުންގެ ނިސްބަތް އިތުރުކަމަށް ތަފާސްހިސާބުތަކުންވެސް ދައްކައެވެ. ޖެންޑަރ މިނިސްޓްރީގެ މިދިޔަ މަހުގެ ތަފާސްހިސާބުތަކަށް ބަލާއިރު ގެވެށި އަނިޔާގެ 23 މައްސަލައެއް މިދިޔަ މަހު އެކަނިވެސް ވަނީ އެ މިނިސްޓްރީއަށް ހުށައަޅާފައެވެ.

ގެވެށި އަނިޔާ ލިބޭ މީހުންނަށް ބޭނުންވާ ފުރިހަމަ އަޅާލުން ދޭންޖެހެއެވެ. ޚާއްސަކޮށް ގެވެށި އަނިޔާގެ ޝިކާރައަކަށްވާ މީހުންނަށް ދައުލަތުގެ ފަރާތުން ސޭފް ހައުސިންގ ހަމަޖައްސައިދިނުމަކީ ވަރަށް މުހިންމު ކަމެވެ.

advertisement

2022 ވަނަ އަހަރުގެ ބަޖެޓުގައި ސަރުކާރުން ވަނީ މިފަދަ މީހުންނަށް ބޭނުންވާ ތަންތަން ގާއިމްކުރުމަށް ބަޖެޓްކޮށްފައެވެ. އެގޮތުން ނުކުޅެދުންތެރިންކަން ހުންނަ މީހުންނަށް ބޭނުންވާ ރިހެބިލިޓޭޝަން ޚިދުމަތްދޭ މަރުކަޒުތަކާއި، ޑޮމެސްޓިކް ވައިލެންސް ޝެލްޓަރ ހިންގުމަށް 2.3 މިލިއަން ރުފިޔާ އަންނަ އަހަރުގެ ދައުލަތުގެ ބަޖެޓްގައި ވަނީ ހިމަނާފައެވެ.

ގެވެށި އަނިޔާ ލިބޭ މީހުންނަށް މިފަދަ ތަންތަން މުހިންމު ވަނީ ކީތްވެ؟

ގެވެށި އަނިޔާ ލިބޭ މީހާ ހުންނަނީ ޖިސްމާނީ ގޮތުންނާއި ނަފްސާނީ ގޮތުން ވަރަށް އެހެންކަހަލަ ހާލަތެއްގައެވެ. އެފަދަ މީހުންނަށް ކައުންސިލިންނާއި އަދި އެނޫންވެސް އެހީތެރިކަން ބޭނުންވާނެއެވެ. އެހެންކަމުން އެމީހުންނަށް ލިބެންޖެހޭ އެންމެ ފުރިހަމަ ރައްކާތެރިކަމާއި އެހީތެރިކަން ފޯރުކޮށްދިނުމަށް މިފަދަ ތަންތަނަކީ މުހިންމު ތަންތަނެވެ.

ގޭތެރޭގެ މާހައުލާއި އަދި މުޖްތަމައުގެ ފަރާތުން ގެވެށި އަނިޔާ ލިބޭ މީހާއަށް ގިނަފަހަރު ފުރައްސާރަ ކުރިމަތިވެއެވެ. އެހެންކަމުން މިކަންކަމަށް މީހާ ތައްޔާރުވުމަށްވެސް ޑޮމެސްޓިކް ވައިލެންސް ޝެލްޓަރތައް މުހިންމު ދައުރެއް އަދާކުރެއެވެ.