މާބަނޑުއިރު މޭވާކާނަމަ ދަރިފުޅުގެ ވިސްނުން ތޫނުވޭ

މާބަނޑު ދުވަސްވަރުގައި މައިމީހާ ކާތަކެތީގެ ސަބަބުން ދަރިފުޅަށް އެކަމުގެ އަސަރު ކުރާމަށް ދިރާސާތަކުން ދައްކައެވެ. އެހެންކަމުން ޑޮކްޓަރުންވެސް އިރުޝާދުދެނީ މާބަނޑު ދުވަސްވަރުގައި ރަނގަޅު ކާނާ ކެއުމަށެވެ.

މާބަނޑު އިރު ގިނައިން މޭވާ ކާނަމަ ދަރިފުޅުގެ ވިސްނުން ތޫނުވާކަމަށް ދިރާސާއަކުން ވަނީ ދައްކާފައެވެ. މި ދިރާސާ ކުރީ މާބަނޑުއިރު ގިނައިން ދޮންކޭލާއި ބެރީޒް އާއި ތަފާތު ވައްތަރުގެ މޭވާ ގިނައިން ކޭ މައިންނަށް ލިބިފައިވާ ދަރިންނަށް އެއް އަހަރު ވުމަށްފަހު އެކުދިންގެ ވިސްނުމުގެ ހުނަރު މޮނިޓަރކޮށްގެންނެވެ. މި ޓެސްޓުގެ ނަތީޖާ ދެއްކިގޮތުން އެހެން ކުދިންނާ އަޅާބަލާއިރު މިކުދިން ޓެސްޓުން މާ މަތި ހޯދި އެވެ.

advertisement

ނަމަވެސް މި ކުދިން އުފަންވުމަށް ފަހު، އެކުދިންނަށް ކާން ދީފައިވާ މޭވާގެ އަދަދުން އެކުދިންގެ ވިސްނުމަށް އެއްވެސް ބަދަލެއް އައިސްފައި ނުވާކަން ދިރާސާ ކުރި ފަރާތުން ފާހަގަކުރެ އެވެ.

އީބައޯމެޑިސިލް ޖާނަލްގައި ޝާއިއުކޮށްފައިވާ މި ދިރާސާ ކުރުމަށް ކެނެޑާގެ ސައިންސްވެރިން ވަނީ އުމުރުން 12 މަހުގެ 808 ކުއްޖަކު ޓެސްޓުކޮށްފަ އެވެ. މިކުދިންގެ މައިންނަކީ މުޅި އެ ގައުމަށް ހުޅުވާލައިގެން ވަރަށް ފުޅާ ދާއިރާއެއްގައި ހެދި ހެލްތު ސްޓަޑީއެއްގެ ބައިވެރިންނެވެ. މި އެންމެންވެސް ވަނީ މާބަނޑު ދުވަސްވަރު އެމީހުން ކޮންމެ ދުވަހަކު ކެއުމާއި އެހެނިހެން އާދަތައް ގެންގުޅުނު ގޮތް ރެކޯޑްކޮށްފަ އެވެ.

މި ޓެސްޓްގެ ނަތީޖާތައް އަޅާ ކިޔާލިއިރު މި ހެލްތު ސްޓަޑީގައި ބައިވެރިވި މާބަނޑު މީހުންގެ ތެރެއިން އެންމެ ގިނައިން މޭވާ ކޭ ކަމަށް ރެކޯޑް ކުރެވިފައިވާ މީހުންނަށް ލިބިފައިވާ ދަރިންގެ ހަނދާން ގަދަވުމާއި ދަސްކުރުމުގެ ހުނަރު މާ މަތިކަން ވަނީ ހާމަވެފަ އެވެ. މިތަނުން ކޮންމެ މަޔަކު މާބަނޑު ދުވަސްވަރު ކޭ ކޮންމެ މޭވާ ޕޯޝަނަކަށް އެމީހުންނަށް ލިބުނު ދަރިން ލައްވާ ހެދި ޓެސްޓްގެ ނަތީޖާ 2.38 ޕަސެންޓް މަތިވެފައިވެ އެވެ.