އަވަސް އަވަހަށް ކުޑަކަމުދާން ޖެހޭ ނަމަ އަވަހަށް ޑޮކްޓަރަށް ދައްކާ

އޯވަރ އެކްޓިވް ބްލެޑަރ ހުރުމަކީ މާގިނައިން ކުޑަކަމުދާންޖެހުމެވެ. ނުވަތަ ކުޑަކަމުދާން ޖެހުމުން ނުހިފެއްޓުމެވެ. މި ހާލަތް އާންމުކޮށް ދިމާވަނީ ސިކުނޑިއާއި ބްލެޑަރ ރަނގަޅަށް މުއާމަލާތު ނުކުރެވުމުގެ ސަބަބުންނެވެ. ސިކުނޑިންދޭ ސިގްނަލް ބްލެޑަރއަށް ނުލިބުމަކީވެސް މިކަން ދިމާވެދާނެ ހާލަތެކެވެ.

އޯވަރ އެކްޓިވް ބްލެޑަރގެ އަލާމާތްތަކުގެ ތެރޭގައި:

advertisement

• މާއަވަސްއަވަހަށް ކުޑަކަމުދާންޖެހުން
• ރޭގަނޑުގެ ވަގުތުގައި ނިދާފައި އޮންނައިރު 2 ފަހަރު ނުވަތަ 3 ފަހަރު ފާހާނާއަށްދާން ހޭލަންޖެހުން
• ކުއްލިއަކަށް ކުޑަކަމުދާންޖެހުން
• ކުޑަކަމުދާން ޖެހުމުން ނުހިފެއްޓި ކުޑަކަމުދެވުން

އޯވަރ އެކްޓިވް ބްލެޑަރ ހުންނަ މީހަކު ކުޑަކަމުދިއުމާއިއެކު އަނެއްކާވެސް ކުޑަކަމުދާންޖެހިދާނެ ކަމުގެ އިހްސާސްކުރެވެއެވެ. މިފަދަ މީހުންނަށް ސިއްހީ ބައެއް އެހެން މައްސަލަތައްވެސް ދިމާވުމުގެ ފުރުސަތު އޮވެއެވެ. އޭގެތެރޭގައި:

• ނާރުތަކުގެ މައްސަލަތައް
• ޔޫރިން އިންފެކްޝަން
• ބްލެޑަރއަށް ކެންސަރުޖެހުން
• ބްލެޑަރގައި ހިލަ އުފެދުން

މިފަދަ ކަމެއް ދިމާވާނަމަ ވީހާވެސް އަވަހަށް ޑޮކްޓަރުންގެ އެހީ ހޯދުމަކީ މުހިންމު ކަމެކެވެ. އެގޮތުން ރޭގަނޑު ފާހާނާއަށް ދިއުމަށް މާގިނައިން ހޭލެވޭނަމަ، ދުވާލަކު މާގިނައިން ކުޑަކަމުދެވޭނަމަ، ނުވަތަ ގަޔަށް ކުޑަކަމުދެވޭނަމަ ޑޮކްޓަރަކަށް ދެއްކުމަކީ އެންމެ ރަނގަޅުގޮތެވެ.