ފިރިހެން ދަރިންނަށްވެސް ޕީރިއަޑް ވާހަކަ ކިޔައިދީ

ބޮޑުވެގެން އަންނަ ދަރިފުޅަށް ބެލެނިވެރިން ކިޔައިދޭންޖެހޭ ވާހަކަތައް ވަރަށް ގިނައެވެ. ނަމަވެސް ބައެއް ވާހަކަތައް ދަރިފުޅަށް ކިޔާދިނުމަށް ބެލެނިވެރިން ލަތުވެތިވެއެވެ. މިސާލަކަށް ބުނާނަމަ އަންހެންކުދިންނަށް ދިމާވާ ޕީރިއަޑްގެ ކަންކަން ފިރެހެން ދަރިއަކަށް ކިޔާދިނުމަކީ ބެލެނިވެރިން ވަރަށް ބޮޑަށްވެސް ލަދުވެތިވާ ކަމެކެވެ. ނަމަވެސް މިއީ ކޮންމެހެންވެސް ކިޔާދޭންޖެހޭ ވާހަކައެކެވެ.

ސްކޫލްދައުރުގައި އުޅޭއިރު އަންހެންކުދިން ޕީރިއަޑްވުމުން ބައެއް ފިރެހެންކުދިން މަލާމާތްކުރާ ފަހަރު އާދެއެވެ. އެއީ ލަތުވެތިކަމެއްގެ ގޮތުގައި ސިފަކޮށް މުޅި ކްލާހުގައި އެ ކުއްޖާ ބަދުނާމުކޮށްލައެވެ. ނަމަވެސް މިވާގޮތް ބެލެނިވެރިން ފިރެހެން ކުދިންނަށް ކިޔާދޭނަމަ މިކަންކަން ނުވާނެއެވެ. އެހެންކަމުން ފިރެހެން ދަރިފުޅަށް ޕީރިއަޑްގެ ވާހަކަތައް ކިޔާދޭނީ ކިހިނެތް ހެއްޔެވެ؟

advertisement

އުމުރުގެ ކުރިން މިވާހަކަތައް ކިޔައިދީ

ދަރިފުޅުގެ އުމުރުގެ ކުރީބައިގައި މިވާހަކަތައް ކިޔާދިނުމަކީ އެންމެ މުހިންމު ކަމެވެ. ފިރެހެން ދަރިފުޅުގެ ކްލާހުގައި އުޅޭ އަންހެންކުދިން ޕީރިއަޑް ވުމުގެ ކުރިން މިވާހަކަތައް ދަރިފުޅަށް ކިޔާދިނުމަކީ އެންމެ މުހިންމު ގޮތެވެ. މިވާހަކަތައް ކިޔާދޭއިރު ބޮޑުވަމުން އަންނަ އަންހެން ކުދިންނާއި ފިރެހެން ކުދިން އެއްގޮތް ކަންތައްތަކެއް ތަޖުރިބާކުރާކަމަށް ބުނާށެވެ. އެގޮތުން އިސްކޮޅު ދިގުވުމަކީ ކޮންމެ ޖިންސެއްގެ ކުއްޖަކުވެސް ތަޖުރިބާކުރާކަމެއްކަމަށް ބުނާށެވެ. މީގެއިތުރުން އަންހެންކުދިންނާއި ފިރެހެން ކުދިންވެސް ތަފާތު ކަންތައްތަކެއް ތަޖުރިބާކުރާނެކަމަށް ބުނާށެވެ.

ޕީރިއަޑްވުމުން އަންހެންކުދިން ބޭނުންކުރާ ތަކެތި ކިޔާދިނުން

ޕީރިއަޑްވުމުން އަންހެން ކުދިން ބޭނުންކުރާ ޕެޑް، ޓެންޕޯންސް ފަދަ ތަކެތި ފިރެހެން ކުދިންނަށް ކިޔާދެވިދާނެއެވެ. އަދި މިތަކެތި ބޭނުންކުރަނީ ކިހިނެތްކަން ބުނެދެވިދާނެއެވެ.

އަންހެންކުދިން ތަހައްމަލްކުރާ ކަންކަން ބުނެދީ

ޕީރިއަޑްވުމުން އަންހެންކުދިން ގިނަ ކަންކަން ތަހައްމަލްކުރެއެވެ. އަދި ބައެއް އަންހެންކުދިންނަށް މިދުވަސްކޮޅު ތެދުވެ އުޅުމަކީވެސް އުނދަގޫކަމެކެވެ. އެގޮތުން ބޮލުގައި ރިއްސުމާއި، ބަނޑުގައި ރިއްސުން، އުނަގަނޑުގައި ރިއްސުން ފަދަ ކަންކަން ތަހައްމަލް ކުރެއެވެ. މިކަންކަން ފިރެހެން ދަރިފުޅަށް ކިޔާދެވިދާނެއެވެ.