ވިޓަމިން ޑީ ނުލިބެނީ ނަމަ ކެލްޝިއަމް ކިތަންމެ ވަރަކަށް ނެގިޔަސް ހަށިގަނޑަކަށް ނުލިބޭނެ

ކެލްޝިއަމްއަކީ ހަސިގަނޑަށް ބޭނުންވާ ވަރަށް މުހިންމު ބާވަތެކެވެ. ކެލްޝިއަމްގެ ސަބަބުން ކަށިތަކާއި، މަސްތައް އަދި ހިތުގެ މަސައްކަތް ރަނގަޅުވެ ވަރުގަދަވެއެވެ.

ހަށިގަނޑަށް ބޭނުންވާ ކެލްސިއަމް ލިއްބައިދިނުމަށް ކިރު ފަދަ އެއްޗެހި ބޯން އަހަރުމެން ކައިރީ މީހުން ބުނާތި އަބަދުވެސް އަޑު އަހަމެވެ. ނަމަވެސް ކިތައްމެ ވަރަކަށް ކެލްސިއަމް ނެގިޔަސް ހަށިގަނޑުގައި ވިޓަމިން ޑީ ނެތިއްޖެ ނަމަ ހަށިގަނޑަށް ކެލްސިއަމް އެއް ނުދަމާނެ އެވެ. ސަބަބަކީ ވިޓަމިން ޑީ އަކީ ކެލްސިއަމް ހަށިގަނޑަށް ނަގައިގަތުމަށް އެހީތެރިވާ މާއްދާ ކަމަށް ވާތީ އެވެ.

advertisement

ހަށިގަނޑަށް ބޭނުންވާ މިންވަރަށް ކެލްޝިއަމް އަދި ވިޓަމިން ޑީ ނުލިބޭނަމަ ކަށިތައް ހީނަރުވެ އަވަހަށް ބިނދުމުގެ ފުރުސަތު އޮވެއެވެ. ވަކިން ޚާއްސަކޮށް އުމުރުން ދުވަސްވާވަރަކަށް ކަށީގެ މައްސަލަތައް ކުރިމަތިވެއެވެ. އެހެންކަމުން އުމުރުގެ ހަގުއިރުގައި ހަށިގަނޑަށް ބޭނުންވާ މިންވަރަށް ކެލްޝިއަމް އަދި ވިޓަމިން ޑީ ހޯދުމަކީ ވަރަށް މުހިންމު ކަމެކެވެ. މީގެ ސަބަބުން ކަށިތައް ވަރުގަދަވެ އަވަހަށް ބިނދުމުން ސަލާމަތްކޮށްދެއެވެ.

އުމުރާއި އެއްވަރަށް ކެލްޝިއަމް އަދި ވިޓަމިން ޑީ ބޭނުންވާ މިންވަރު:

1 އަހަރާއި 3 އަހަރު:

• ދުވާލަކަށް 700 މިލިގްރާމްގެ ކެލްޝިއަމް
• ދުވާލަކަށް 600 އިންޓަނޭޝަނަލް ޔުނިޓް

4 އަހަރާއި 8 އަހަރު:

• ދުވާލަކަށް 1000 މިލިގްރާމްގެ ކެލްޝިއަމް
• ދުވާލަކަށް 600 އިންޓަނޭޝަނަލް ޔުނިޓް

9 އަހަރާއި 18 އަހަރު:

• ދުވާލަކަށް 1300 މިލިގްރާމްގެ ކެލްޝިއަމް
• ދުވާލަކަށް 600 އިންޓަނޭޝަނަލް ޔުނިޓް

19 އަހަރާއި 50 އަހަރު:

• ދުވާލަކަށް 1000 މިލިގްރާމްގެ ކެލްޝިއަމް
• ދުވާލަކަށް 600 އިންޓަނޭޝަނަލް ޔުނިޓް

ފިރެހެނުން 51 އަހަރާއި 70 އަހަރު:

• ދުވާލަކަށް 1000 މިލިގްރާމްގެ ކެލްޝިއަމް
• ދުވާލަކަށް 600 އިންޓަނޭޝަނަލް ޔުނިޓް

އަންހެނުން 51 އަހަރާއި 70 އަހަރު:

• ދުވާލަކަށް 1200 މިލިގްރާމްގެ ކެލްޝިއަމް
• ދުވާލަކަށް 600 އިންޓަނޭޝަނަލް ޔުނިޓް

71 އަހަރުން މަތީގެ މީހުން:

• ދުވާލަކަށް 1200 މިލިގްރާމްގެ ކެލްޝިއަމް
• ދުވާލަކަށް 800 އިންޓަނޭޝަނަލް ޔުނިޓް

ބައެއް މީހުންނަށް އެކަށީގެންވާ މިންވަރަށް ކެލްޝިއަމް ލިބުނު ނަމަވެސް ވިޓަމިން ޑީ ނުލިބޭ ފަހަރު އާދެއެވެ. ކާއެއްޗެހީގެ ސަބަބުން ކެލްޝިއަމް ލިބުނު ނަމަވެސް ވިޓަމިންޑީ އާންމުގޮތެއްގައި ލިބެނީ އިރުގެ އަވީގެ ސަބަބުންނެވެ. އެހެންކަމުން ވިޓަމިންޑީ ލިބޭނީ އަވީގައި އުޅުމުންނެވެ. ވަކިން ޚާއްސަކޮށް އިރުއަރައިގެން އަންނަ ވަގުތުގައެވެ.