ރިޕޯޓް: ހޯމްސްޓޭ ޓޫރިޒަމް- ފަންސާސް އަހަރަށްފަހު ޓޫރިޒަމަށް އިންގިލާބީ ބަދަލެއް

މީހުން ދިރިއުޅޭ ރަށްރަށުގައި ގެސްޓް ހައުސްތައް ހެދުމުގެ ވާހަކަ ދައްކަން ފެށުމުން ބަޔަކު އެކަމާ ކަންބޮޑުވެ ދެކޮޅަށް އަޑު އުފުލިއެވެ. އޭގެ ސަބަބުން ދިވެހިންގެ އާދަކާދަތަކަށް ބުރޫއަރާނެ ވާހަކަ އާއި ދީނާ ހިލާފް ކަންކަން މުޖުތަމައުގެ ތެރެއަށް ވަދެ އިސްލާމްދީން ރާއްޖެއިން ފުހެވިގެންގޮސް ރަލުގެ ކޯރުތަކުން ރާއްޖޭގެ ރަށްރަށް ފުރިގެންދާނެކަށާއި މިހެން ގޮސް ނުކިޔާކަށް އެއްޗެއް ނެތެވެ. ނަމަވެސް އެމްޑީޕީގެ ސަރުކާރުގައި ކުރީގެ ރައީސް މުހައްމަދު ނަޝީދުގެ ވެރިކަމުގައި ގެސްޓް ހައުސް ޓުއަރިޒަމްގެ ގަވާއިދު ހަދައި ހުއްދަދިނުމާއެކު މަންޒަރު ބަދަލުވިއެވެ. އެކަން ވެގެން ދިޔައީ އެތައް ގޮތަކުން އާންމު މީހާގެ ދިރިއުޅުމަށް ގިނަގުނަ އެތައް ފައިދާތަކެއް ލިބިގެންދިޔަ ކަމަކަށެވެ. މިއަދު 100 އަށް ވުރެ ގިނަ ރަށެއްގައި ކާމިޔާބު ކަމާ އެކުގައި ޓުއަރިޒަމް އިންޑަސްޓްރީގެ ބޮޑު ހިއްސާއަކަށް ލޯކަލް އައިލެންޑް ޓޫރިޒަމް ވިޔަފާރި ވެއްޖެއެވެ.

އޭގެ ދިހަ އަހަރު ފަހުން, މިސަރުކާރުން “ހޯމްސްޓޭ” ޓޫރިޒަމަށް ހުއްދަ ދިނުމާއެކު ވަކި ބަޔަކު ވަނީ އެކަމާ ކަންބޮޑުވެ ހާސްބޮޑުވެފައެވެ. “ހޯމް ސްޓޭ” ނުވަތަ އަމިއްލަ ގޭގައި ޓުއަރިސްޓް މީހާ އަށް ހުރެވޭނެ ގޮތަށް ފުރުސަތު ހުޅުވާލުމުގެ ވާހަކަ މިހާރު ވެސް ބައެއް މީހުންނަށް ހަޖަމްކުރަން ދައްޗެވެ. މިހާރު ވެސް ދައްކަނީ ގެސްޓް ހައުސް ވިޔަފާރިއާ ބެހޭ ގޮތުން ވެސް ދެއްކި ވާހަކަތަކެވެ. ގޭތެރޭގައި ބަނގުރާ ކެންޓީނުތައް އުފެދޭނެ ވާހަކައެވެ. ދީނާ ދުރު އާދަތައް ދިވެހިންނަށް ދަސްވެ އިސްލާމްދީން ނެތިގޮސް ޓުއަރިޒަމް ފުޑުފުޑުވެގެން ހިނގައިދާނެ ވާހަކައެވެ.

މިއީ އާ ވާހަކައެއް ނޫނެވެ. ގެސްޓް ހައުސްގެ ވިޔަފާރި ތައާރަފްކުރަން އުޅުމުން ވެސް ދެއްކީ މި ވާހަކަތަކެވެ. ނަމަވެސް ހަގީގަތަކީ މަސްތުވާތަކެތީގެ ހަބަކަށް ރާއްޖެވުމާއި, ކުޑަކުދިންނަށް ޖިންސީ ގޯނާކުރުމާއި، ވައްކަންކުރުމާއި، ކުޑަކުދިންނާއި ކައިވެނިކުރުން ފަދަ ކަންކަމަކީ ޓުއަރިސްޓުން ދަސްކޮށްދިން ކަންކަން ހެއްޔެވެ؟. ދިވެހިންގެ ތެރޭގައި ހުރި ނުބައި އާދަތައް ދިވެހިންނާ ހަމައަށް ފޯރީ ރަށްރަށުގެ ގެސްޓް ހައުސްތަކަކުން ނޫނެވެ. އަނެއްކޮޅުން ޓުއަރިސްޓުންނަކީ ހަމައެކަނި ޣައިރު ދީނުގެ މީހުން އެކަންޏެއް ނޫނެވެ. މުސްލިމް އެތައް ބަޔަކު ވެސް ޓުއަރިސްޓުންގެ ގޮތުގައި ކޮންމެ އަހަރަކު ރާއްޖެ އާދެއެވެ. އަދި ކިއެއްތަ, ހޯމްސްޓޭ މިއީ ދުނިޔޭގައި އަލަށް ކުރާ ކަމެއް ވެސް ނޫނެވެ. މެލޭޝިއާ އަދި އިންޑޮނޭޝިއާ ފަދަ އިސްލާމީ އެތައް ގައުމެއްގައި ވެސް މި ވިޔަފާރި މިހާރު ވަރަށް ފުޅާކޮށް ހެޔޮ ގޮތުގައި ކުރިއަށް ވެސް އެބަ ދެއެވެ.

އިސްލާމިކް ޓުއަރިޒަމް ރާއްޖޭގައި ޕްރޮމޯޓްކުރެއްވުމަށް ގިނަ މަސައްކަތްތަކެއް ކުރައްވަމުންު އަންނަ ފަރާތަކުން ވިދާޅުވީ ޓުއަރިޒަމަކީ ހަމައެކަނި ރަލާއި އޫރު މަސް ނުވަތަ ހަށި ވިއްކުން ނޫން ކަމަށާއި އެފަދަ ކަންކަމާ ނުލައި ވެސް ދުނިޔޭގެ ވަރަށް ގިނަ ގައުމުތަކެއްގައި ޓުއަރިޒަމް ޕްރޮޑަކްޓްތައް ކާމިޔާބުކަމާ އެކު ވިއްކަމުން އަންނަ ކަމަށެވެ. ބެލްޖިއަމް އާއި ކެނެޑާ އަދި ޖަރުމަނީ ފަދަ ތަންތަން ބައްލަވައި ތަޖުރިބާކުރެއްވި ކަމަށާއި ރާއްޖޭގައި ވެސް އެކަން ކުރެވޭނެ ކަމަށާއި، އަދި ރާއްޖޭގެ ޓުއަރިޒަމް ދާއިރާގައި މަސައްކަތްކުރަނީ ވަރަށް ހުލްގުހެޔޮ, ޕްރޮފެޝަނަލް ތަރުތީބު ރަނގަޅު ހެޔޮ މީހުން ކަންވެސް ފާހަގަކުރައްވިއެވެ.

ހޯމްސްޓޭ އާއެކު ގެސްޓްހައުސް ހިންގާ ރަށްރަށުގައި މިހާރުވެސް ޓޫރިސްޓުން ގޭގައި ތިއްބުން ގަވާއިދެއްގެ ތެރެއިން ބެލެހެއްޓުމަށް މަގުފަހިވެގެންދާނެއެވެ. އަދި ލޯކަލް އައިލެންޑް ޓޫރިޒަމް މަދު ބަޔެއްގެ އަތްދަށަށް ދިއުން ނިމުމަކަށް ގެނެސް, ޓޫރިޒަމްގެ ފައިދާ ދުރު އަތޮޅުތަކުގެ ރައްޔިތުންނަށް ލިބިގެންދާނެކަމަށް ދާއިރާގެ ތަޖުރިބާކާރުން ވިދާޅުއެވެ. މިހުރިހާކަމަކާއެކުވެސް, އާންމު ރައްޔިތުން މީހާގެ އާމްދަނީ އިތުރުވެ, އިޖުތިމާއީ އަދުލު އަދި އިޤްތިސާދީ އިންސާފު އޮތް މުޖުތަމައެއް ބިނާކުރުމަށް ފުރުސަތު ލިބިގެންދާނެއެވެ. އަދި ލާމެހިފައިވާ ދުނިޔެއަކަށް ލޯހުޅުވާލުމަށް ދިވެހިންނަށް ލިބެގެންދާނެ ބިޔަ ބޮޑު ފުރުސަތަކެވެ. އެތަށް އާއިލާއެއް ރަށުގައި އެކުގައިތިބެގެން ދިރިއުޅުން އާރާސްތުކުރުމަށް ލިބޭ ހިތަށް ތަސައްލީ ގެނުވާނެ އުފާވެރި މަންޒަރުތައް ސިފަކުރުވާ ފުރުސަތެކެވެ.

ކޮވިޑްގެ މިހާލަތުން އަރައިގަތުމަށް ކުރާ މަސައްކަތާ އެކު އިގްތިސާދު ކޮޅަށްޖެހުމަށް އެންމެ މުހިންމު އެއްކަމަކީ އާންމު މީހާ އަށް އާމްދަނީ ލިބޭނެ މަގުތައް ތަނަވަސްކުރުމެވެ. އެ ގޮތުން “ހޯމް ސްޓޭ” ވިޔަފާރި ހުޅުވާލުމަކީ މިކަމަށް ހުޅުވާލެވުނު އިތުރު ދޮރެކެވެ. އަނެއްކޮޅުން ރާއްޖޭގެ ޓުއަރިޒަމް ވިޔަފާރި އަށް އަންނަ އަހަރު 50 އަހަރު ފުރުން ފާހަގަކުރާ އިރު މިއީ ކޮންމެހެން ކުރަންޖެހޭ ކަމެކެވެ. ހާއްސަކޮށް ސަބަބަކީ “ހޯމް ސްޓޭ” ވިޔަފާރިއާއެކު ޓޫރިޒަމްގެ މަންފާ އެންމެނަށް ލިބި އެތައް ބަޔަކަށް އޭގެ މަންފާކުރާނެ ކަމެވެ. ހޯމްސްޓޭ ވިޔަފާރިއާއެކު 100 މިލިއަން ޑޮލަރުގެ އާމްދަނީއެއް ކޮންމެ އަހަރަކު ސީދާ ރައްޔިތުންނަށް ލިބިގެންދާނެކަމަށް މިދާއިރާގެ ތަޖުރިބާކާރުން އަންދާޒާކުރައްވައެވެ. މިއީ ކޮންމެހެންކުރަންޖެހޭ ނުކޮށް ދޫކޮށްލާވަރުގެ ކަމެއް ނޫނެވެ. ލޯކަލް އައިލެންޑް ޓޫރިޒަމަކީ ޤާނޫނާ ގަވާއިދާއެއްގޮތަށް ހަލާލުގޮތުގައި ހިންގާ އަބުރުވެރި ޒިންމާދާރު ވިޔަފާރިއެކެވެ.