އޮންލައިންކޮށްވެސް ކުޑަކުދިން ގްރޫމް ކުރޭ، ބެލެނިވެރިން ސަމާލުވޭ!

ކުޑަކުދިން އިންޓަނެޓާއި އޮންލައިން ވަސީލަތްތައް ބޭނުންކުރާ މިންވަރު މިހާރު ވަނީ ވަރަށް ބޮޑަށްވެސް އިތުރުވެފައެވެ. ކޮންމެ ކުއްޖަކީވެސް މިހާރު އިންޓަނެޓް ބޭނުންކުރާނެ ކުއްޖެކެވެ. އިންޓަނެޓާއި ނުލައި މިހާރު ދިރިއުޅުން ވަނީ އުނދަގޫވެފައެވެ. ކޯވިޑާއިއެކު ގޭގައި ގިނައިރު ތިބެންޖެހުމުގެ ސަބަބުން އިންޓަނެޓްގެ ބޭނުން ވަނީ ވަރަށް ބޮޑަށްވެސް އިތުރުވެފައެވެ. އަދި ކުޑަކުދިން އިންޓަނެޓް ބޭނުންކުރާ މިންވަރު އިހުނަށްވުރެ ވަނީ ބޮޑުވެފައެވެ.

ކުދިންނަށް އިންޓަނެޓް ބޭނުންކުރުމުގެ ފުރުސަތު ދިނުމަކީ ގޯހެއްނޫނެވެ. ނަމަވެސް އިންޓަނެޓްގެ އަވައިގައި ޖެހިގެން ކުދިންނަށް ދިރިއުޅުމުގެ އެހެން ރިވެހި އާދަތައް ހަނދާންނެތޭ މިންވަރަށް ކުދިންނަށް އިންޓަނެޓް ބޭނުންކުރުމުގެ ފުރުސަތު ދެވިގެން ނުވާނެއެވެ. އެހެން މީހަކަށް ވާހަކަނުދައްކައި ކުއްޖާ މުޅި ދުވަހު ޓީވީ، ފޯނު، ނުވަތަ ޓެބްލެޓް ފަދަ ތަކެއްޗަށް ގެއްލިގެންދާނަމަ އެއީ ގޯހެކެވެ. އެހެންކަމުން ކުއްޖާއަށް އިންޓަނެޓް ބޭނުންކުރުމުގެ ފުރުސަތު ދޭންވާނީ ވަކި ލިމިޓެއްގެ ދަށުންނެވެ.

މީގެއިތުރުންވެސް އިންޓަނެޓާއިއެކު ބެލެނިވެރިން ސަމާލުކަން ދޭންޖެހޭ ކަންކަން ގިނަގުނައެވެ. އުމުރާއި ނުގުޅޭ ވީޑިއޯއާއި އެހެނިހެންވެސް ތަކެތި ދަރިފުޅު އިންޓަނެޓް މެދުވެރިކޮށް ބަލާތޯ ބެލެނިވެރިޔާ ޔަޤީންކުރަން ވާނެއެވެ. އިންޓަނެޓްގެ ސަބަބުން ކުއްޖާއަށް އައިސްދާނެ އެންމެހައި ބަދަލުތަކަށް ބެލެނިވެރިޔާ ސަމާލުވާންވާނެއެވެ.

މީގެއިތުރުން މިހާރު އިންޓަނެޓްއަކީ ބުލީއާއި ގަނާކުރުން އިތުރުވެފައިވާ ތަނެކެވެ. އެހެންކަމުން އިންޓަނެޓް މެދުވެރިކޮށް ދަރިފުޅަށް މިފަދަ އެއްވެސް ކަމެއް ދިމާވޭތޯވެސް ބެލެނިވެރިން ސަމާލުވާންޖެހެއެވެ. އިންޓަނެޓް ބޭނުންކުރުމަކީ ދަރިފުޅުގެ ސިކުނޑި ތަނަވަސްވެ އޭގެ ސަބަބުން ދަރިފުޅަށް ފައިދާވެސް ކުރާކަމެކެވެ. އެހެންކަމުން އިންޓަނެޓް ބޭނުންކުރުމުގެ ފުރުސަތު ދަރިފުޅަށް ދޭއިރު މިކަމުން ދިމާވެދާނެ އެންމެހައި ކަންކަން ރަނގަޅަށް ދަރިފުޅަށް ބުނެދީ ދަރިފުޅުގެ ލިމިޓް ބުނެދޭންޖެހެއެވެ.