ސިނގިރޭޓު ބުއިން އައު އަހަރާއިއެކު ދޫކޮށްލަން ރަނގަޅު ކަމެއް

ދުންފަތުގެ އިސްތިއުމާލުކުރުމަކީ މިއަދު ގިނަ ދިވެހިންގެ ކަށީގައި ހިފާފައިވާ އާދައެކެވެ. މުޖުތަމައަށް ކުރިމަތިވެފައިވާ “ވަބާ” އެކެވެ. ދުންފަތުގެ އިސްތިއުމާލުކުރާ މީހުންނާއި ނުކުރާ މީހުންނަށްވެސް އޭގެ ނުރައްކާ އިންތިހާއަށް ބޮޑު ކަމެކެވެ. ގިނަ މީހުން މިކަން ކުރަނީ އޭގެ ސަބަބުން ހިތްހަމަ ޖެހޭތީ ކަމަށް ބުނެއެވެ. ނަމަވެސް ސިނގިރޭޓަކީ އޭގެ ސަބަބުން މީހާގެ ހިތް ނުތަނަވަސްކޮށްލާ އަދި ހާސްކޮށްލާ އެއްޗެކެވެ.

ކޮންމެ ސިނގިރޭޓަކުން 1 މިލިގްރާމް ނިކޮޓިން ހަށިގަނޑަށް ވާސިލުވާއިރު، މީހަކު ސިނގިރޭޓެއް ބުއިމުން އެ ސިނގިރޭޓުގައި ހުންނަ މި ވިހަ މާއްދާ އެންމެ 10 ވަރަކަށް ސިކުންތު ތެރޭގައި އެމީހެއްގެ ސިކުނޑިއާ ހިސާބަށް ވާސިލުވެއެވެ. އަދި އެވަގުތު އެމީހަކަށް ވަގުތީ ހިތްހަމަޖެހުމެއް ލިބޭހެން ހީވި ނަމަވެސް އޭގެ ނުރައްކާ މާ ބޮޑެވެ. އެގޮތުން ދުންފަތުގެ އިސްތިއުމާލު ކުރުމުގެ ސަބަބުން މީހާގެ ނަފްސާނީ ދުޅަހެއުކަމަށް ވަރަށް ބޮޑަށް އަސަރުކުރާ ކަމަށާއި، އެއީ “އެންޒައިޓީ” ނުވަތަ ހާސްވުމުގެ ބައްޔަށް މަގުފަހިވާ ކަމެއް ކަމަށް ދިރާސާކުރާ ފަރާތްތަކުން ބުނެއެވެ. އޭގެ އިތުރުން، ސިނގިރޭޓު ބުއިމުން ބޮލުގައި ރިއްސުމާއި، ނޭވާ އަވަސްވުމަށް މަގުފަހިވެ މީހާގެ މޫޑަށް ބޮޑެތި ބަދަލުތަކެއް ގެނުވައެވެ. އެހެންކަމުން އެ 10 ސިކުންތުގައި ލިބޭ ހިތްހަމަޖެހުމަށްވުރެ ސިނގިރޭޓުގެ ސަބަބުން ކުރިމަތިވާ ދާއިމީ ގެއްލުން މާ ބޮޑުކަމުގައި ބުނެވިދާނެއެވެ.

advertisement

ދުންފަތުގެ ސަބަބުން މީހާއަށް ހިތްހަމަޖެހުން ލިއްބައިދީ ނަފްސު އުފާކޮށްލާކަމަށް ހީވި ނަމަވެސް އެއީ ކުށްހީއެކެވެ. އަދި އެއީ މީހާ ނަފްސާނީ ބަލިމަޑުކަމެއްގެ ތެރެއަށް ވައްޓާލާ، ނަފްސާނީ ދުޅަހެޔޮކަމަށް އޭގެ ސަބަބުން ބޮޑެތި އަސަރުތަކެއް ކުރުވާ ކަމެކެވެ. އައު އަހަރެއް ފަށައިގެން އައު އަޒުމަކާއިއެކު ކުރިއަށްދާއިރު މިއައު އަހަރުގެ ތެރޭގައި ސިގިރޭޓުބުއިމުން ދުރުވުމަކީ ކުރަން ވަރަށް ރަނގަޅުކަމެކެވެ. ސިނގިރޭޓު ބުއިމުގެ ސަބަބުން ތިމާއާއި ތިމާގެ ކައިރީގައި އުޅޭ މީހުންނަށްވެސް އޭގެ ނޭދެވޭ އަސަރުކުރެއެވެ.