އެންމެ ހިތްދަތިކޮށް އުޅެނީ ރިސޯޓް މުވައްޒަފުން

ރާއްޖޭގެ ރަންބިސް އަޅާ ކުކުޅަކީ ފަތުރުވެރިކަމެވެ. ކޮންމެ އަހަރަކުވެސް ރާއްޖެއަށް ވަންނަ އާމްދަނީގެ ބޮޑުބައެއް ހިއްސާކުރަނީ ފަތުރުވެރިކަމުގެ ސިނާއަތެވެ. މިއަދު ފަތުރުވެރިކަމުގެ ސިނާއަތާއި ނުލައި ރާއްޖޭގެ އިޤްތިޞާދުގެ މަންޒަރު ސިފަވެސް ނުކޮށްލެވެއެވެ. އެހާމެބޮޑަށް އަހަރެމެންގެ އިޤްތިޞާދު މިއަދު ވަނީ ފަތުރުވެރިކަމަށް ބަރޯސާވެފައެވެ.

ރާއްޖޭގެ ފަތުރުވެރިކަމުގެ ސިނާއަތުން ލިބޭ އާމްދަނީ މިލިއަނުން މިލިއަނަށް އަރާފައިވާއިރު މިއީ ކޮންމެވެސް ބައެއްގެ ބުރަ މަސައްކަތްކަން ޔަޤީނެވެ. ކޮންމެވެސް ބަޔެއްގެ ގުރުބާނީއެވެ. ފަތުރުވެރިކަމުގެ ސިނާއަތުގައި މަސައްކަތްކުރާ މުވައްޒަފުންގެ ބުރަ މަސައްކަތެވެ.

advertisement

ރާއްޖެއަށް ފަތުރުވެރިކަމުގެ ސިނާއަތުގައި މަސައްކަތްކުރާ މީހުންގެ މުހިންމުކަން އެހާވެސް ބޮޑެވެ. ނަމަވެސް މިއަދު އެންމެ ހާލުގައި ދިރިއުޅެމުންދާ ބަޔަކީވެސް އެއީއެވެ.

މުޅި އާއިލާއާއި ދިރިއުޅުން އެމީހުން ގުރުބާންކުރަނީ ރާއްޖޭގެ ފަތުރުވެރިކަމުގެ ސިނާއަތަށެވެ. އާއިލާއާއި ދުރުގައި އެތަކެއް ދުވަހެއް ހޭދަކުރެއެވެ. މިއީ ފަތުރުވެރިކަމުގެ ހައި ސީޒަންއެވެ. ރާއްޖޭގެ ރިސޯޓްތައް ވަނީ ފުލްވެފައެވެ. ރިސޯޓް މުވައްޒަފުންނަށް އެމީހުންގެ އާއިލާއާއި ދުރުގައި ތިބޭއިރު އެންމެ ކުޑަމިނުން ގުޅާލާނެ ވަގުތެއްވެސް ނުވެއެވެ. ދުވާލެއްގެ 24 ގަޑިއިރުގެ ތެރޭގައި 5 މިނެޓްވެސް އާއިލާއަށްދޭކަށް ނުލިބެއެވެ.

ކޮންމެ ސަރުކާރަކުންވެސް ފަތުރުވެރިކަމުގެ ސިނާއަތުގެ މުވައްޒަފުންނަށް ދައްކަނީ ނުލަނޫން މަންޒަރެއްކަމަށް ދާއިރާގެ މުވައްޒަފުން ބުނެއެވެ. މި ސަރުކާރު ވެރިކަމާއި ހަވާލުވިއިރުވެސް ނައިޓަށް ރަށައް ދެވޭނެކަމަށްބުނެ ފޮނި ހުވަފެންތައް ދެއްކިއެވެ. ކޯވިޑާއި ގުޅިގެންވެސް އެންމެ ދަތި ހާލެއްގައި އުޅެންޖެހުނީ ރިސޯޓް މުވައްޒަފުންނަށެވެ. ރިސޯޓުން ބޭރުނުވެވި އެތައް މަހެއް ރިސޯޓްގައި ބަންދުވެގެން ތިބެންޖެހުނެވެ.