އިސްމަގާމުތަކުގައި އަންހެނުން ތިބޭނަމަ އުފެއްދުންތެރިކަން މަތިވޭ: ދިރާސާ

ިސް މަގާމުތަކުގައި އަންހެނުން ތިބޭ ކުންފުނިތަކުގެ އުފެއްދުންތެރިކަން ރަނގަޅުކަމަށް ދިރާސާއަކުން ދައްކައިފިއެވެ. އިނގިރޭސިވިލާތުގައި ހެދި ދިރާސާ ރިޕޯޓެއްކަމަށްވާ “ވިމެން ކައުންޓް 2020 ރިޕޯޓް” ގައި ބުނެފައިވަނީ އިސް ވެރިންގެ ގޮތުގައި އަންހެނުން ތިބޭ ކުންފުނިތަކުގެ އުފެއްދުންތެރިކަން އެ ނޫން ކުންފުނިތަކާ އަޅާބަލާ އިރު 10 ގުނަ ރަނގަޅު ކަމަށެވެ.

މި ރިޕޯޓް ހަދާފައިވަނީ އިނގިރޭސިވިލާތުގެ ހިއްސާގެ ބާޒާރުގައި ލިސްޓްކޮށްފައިވާ ލަންޑަނުގެ 350 ކުންފުންޏެއްގެ ހާލަތު ދެނެގަތުމަށް ފަހު އެވެ. އެގޮތުން ފާހަގަކުރެވުނު އެންމެ މުހިއްމު ކަމަކީ ކުންފުނިތަކުގެ އެކްޒެކެޓިވް ފެންވަރުގެ މަގާމުތަކުގައި ނުވަތަ ކަންކަން ނިންމޭ ފެންވަރުގެ މަގާމުތަކުގެ ތިންބައިކުޅަ އެއް ބަޔަކީ އަންހެނުން ނަމަ އެފަދަ ކުންފުނިތަކުގެ ފައިދާ އެ ނޫން ކުންފުނިތަކާ އަޅާބަލާ އިރު ބޮޑުކަމެވެ.

advertisement

ރިޕޯޓްގައި ފާހަގަކޮށްފައިވާ ގޮތުގައި އެކްޒެކެޓިވް ފެންވަރުގެ މަގާމުތަކުގައި އަންހެނަކު ނެތް ކުންފުނިތަކަށް ބަލާ އިރު، އެ ކުންފުނިތަކުގެ އަހަރީ ފައިދާ އާންމުކޮށް އުޅެނީ 1.5 ޕަސެންޓްގަ އެވެ. އެކަމަކު އަންހެނުން ދައުރު ބޮޑު ކުންފުނިތަކުގެ އަހަރީ ފައިދާ އެވްރެޖްކޮށް 15.2 ޕަސެންޓަށް އަރާ ކަމަށް ބުންޏެވެ.

މީގެ އިތުރުން ލަންޑަނުގެ އެންމެ ވަރުގަދަ 100 ކުންފުންޏަށް ބަލާއިރު، ޗީފް ފައިނޭޝަނަލް އޮފިސަރު (ސީއީއޯ) ގެ މަގާމުގައި ތިބީ ކޮންމެ 10 ފިރިހެނުންގެ ތެރެއިން ދެ އަންހެނުންނެވެ. އަދި އިންވެސްޓްމަންޓް މެނޭޖަރުންގެ 96 ޕަސެންޓަކީ ފިރިހެނުންނެވެ.

ޕައިޕްލައިންގެ ދިރާސާ ރިޕޯޓަށް ފަންނީ އެހީދެއްވި އިނގިރޭސިވިލާތުގެ ކުރީގެ އަންހެން ބޮޑުވަޒީރު ތެރީޒާ މޭ ވިދާޅުވި ގޮތުގައި ކުންފުނިތަކުގެ ވެރިންގެ ފެންވަރުގައި އަންހެނުން ތިބުމުގެ މުހިއްމުކަން މިހާރު ވަރަށް ސާފުކޮށް ފެންނަން އެބައޮތެވެ. އެހެންވެ ކުންފުނިތަކުގެ ބޯޑްގައި 10 ފިރިހެނުން ތިބޭ ނަމަ އެއީ އެފަދަ ކުންފުނިތަކުން މިހާރު ސީރިއަސްކޮށް ވިސްނަންވެއްޖެ ކަމެއް ކަމަށް ވިދާޅުވި އެވެ.

އިސް މަގާމުތަކުގައި އަންހެނުން ތިބޭ ކުންފުނިތަކުގެ އުފެއްދުންތެރިކަން ރަނގަޅުވިނަމަވެސް އަންހެނުން މަތީ މަގާމުތަކުގައި ތިބޭ މިންވަރު ދަށެވެ. 350 ކުންފުނީގެ ތެރެއިން ވެރިންގެ ފެންވަރުގައި މަސައްކަތްކުރާ އަންހެނުން ތިބި ކުންފުނިތައް ނިސްބަތަކީ އެންމެ 14 ކުންފުންޏެވެ. އަދި 15 ޕަސަންޓް ކުންފުނިތަކަކީ ކަންކަން ނިންމޭ ފެންވަރުގެ މަގާމެއްގައި އެންމެ އަންހެނަކު ވެސް ނެތް ކުންފުނިތަކެވެ.