ކެއްކުމުގެ ދާއިރާއަށް ވަދެވުނީ އޮޅިގެން، މިހާރު ބޭނުންވަނީ މިދާއިރާއިން އެންމެ ކުރިއަށްދާން

ކެއްކުމަކީ ހަމައެކަނި އަންހެނުން ކުރަން ޚާއްސަ މަސައްކަތެއްކަމަށް މީގެ އަހަރުތަކެއް ކުރިން ޤަބޫލުކުރެވުނު ނަމަވެސް މިއީ މުޅިއަކުން ހަޤީގަތެއްނޫނެވެ. ރާއްޖޭގެ ފަތުރުވެރިކަމުގެ ސިނާއަތުގައި މަސައްކަތްކުރާ ގިނަ ޝެފުންނަކީ މިއަދު ފިރެހެނުންނެވެ. މިދާއިރާއަށް ނިކުންނަ ޒުވާން ފިރެހެން ކުދިންގެ އަދަދުވެސް މިހާރު އަންނަނީ އިތުރުވަމުންނެވެ.

މިދާއިރާގައި މަސައްކަތްކުރާ ޒުވާން ޝެފުންގެ ތެރޭގައި ބ.އޭދަފުއްޓަށް އުފަން އުމުރުން 21 އަހަރުގެ މުޙައްމަދު ޝުއައިބަކީ މިއަދު މި ދާއިރާގައި ފާހަގަކޮށްލެވޭ ޒުވާނެކެވެ. ކެއްކުމުގެ ދާއިރާއަށް ޝުއައިބުއަށް ވަދެވުނީ 2017 ގައި ކުރިއަށްދިޔަ ކުޑަހުރާ އެޕްރެންޓިޝިޕް ޕްރޮގްރާމެއްގެ ތެރެއިންނެވެ. 1 އަހަރު ދުވަހުގެ މި ޕްރޮގްރާމަށްފަހުގައިވެސް ކެއްކުމަށް އޭނާގެ ކިބައިގައި މާބޮޑު ޝައުގުވެރިކަމެއް ނެތެވެ. އެޕްރެންޓިޝިޕް ޕްރޮގްރާމް ނިންމާލުމަށްފަހު އޭނާ ދިޔައީ ރަށަށެވެ. ޝުއައިބު ބުނީ ކެއްކުމަކީ އޭނާ އެއްވެސްގޮތަކަށް ކުރާހިތްވި ކަމެއްނޫންކަމަށާއި މިދާއިރާއަށް ވަދެވުނީ އޮޅުމަކުން ކަމަށެވެ.

advertisement

ކެއްކުމުގެ ދާއިރާއަށް ވަދެވުނުގޮތް ކުރު ގޮތަކަށް ކިޔައިދެމުން ޝުއައިބް ބުނީ އޭނާ މަސައްކަތް ކުރަން ބޭނުންވީ ވޯޓަރ ސްޕޯޓްސްގައިކަމަށެވެ. ނަމަވެސް ފޯސީޒަންގެ ރީޖަނަލް މެނޭޖަރ ޝުއައިބު ޕިޓަވަނީ ކައްކާއަކަށްކަމަށްބުނެ އޭނާ ބަދިގެއަށްލީކަމަށެވެ.

މިދާއިރާގައި 4 އަހަރު ހޭދަކުރެވުނުއިރު ކައްކާއެއްގެ ގޮތުގައި އޭނާ ވަނީ ތަފާތު 5 ރިސޯޓެއްގައި މަސައްކަތްކޮށްފައެވެ. ކެއްކުމުގެ ދާއިރާއަށް ޝުއައިބްގެ ޝައުގުވެރިކަން ކުޑަކޮށްވެސް އުފެދުނީ އަދާރަން ކްލަބް ރަންނާޅީގައި ޝެފެއްގެ ގޮތުގައި އޭނާ މަސައްކަތްކުރަންފެށި ހިސާބުންނެވެ. އެތަނުގައި 9 މަސްދުވަސް އޭނާ ވަނީ ކައްކާއެއްގެ ގޮތުގައި މަސައްކަތްކޮށްފައެވެ.

ޝުއައިބް މިހާރު މަސައްކަތް ކުރަމުން އަންނަނީ ޕަޓީނާ މޯލްޑިވްސް ފަރި އައިލެންޑް ރިސޯޓްގެ “ވެލި ބަރ” ގައި ކައްކާއެއްގެ ގޮތުގައެވެ. ޝުއައިބް ބުނީ އެތަނުގައި އޭނާ މަސައްކަތްކުރަނީ ވަރަށް ކުރާހިތުންކަމަށެވެ. އަދި އެތަނުގައި އޭނާއާއި އެއްކޮށް މަސައްކަތްކުރާ ޝެފް ރިއްޕެގެ ފަރާތުން މިދާއިރާއިން ކުރިއަށްދިއުމަށް ވަރަށް ބޮޑު އެހީތެރިކަމެއް ލިބޭކަމަށެވެ.

“ވަރަށް ޝައުގުވެރިކަން ހުރޭ. މިހާރު ހަމަ ކުރާހިތުން ކުރަނީ. ކެރިއަށް ގްރޯތްކުރަން މިތަނަށްވެސް މިއައީ އަސްލުގައި ބުނާނަމަ. ތަންކޮޅެއް ރަނގަޅު ބްރޭންޑެއްވީމަ އަނެއްކާ ޕްރީ އޯޕަނިންގ ރިސޯޓަކަށް ވުމާއިއެކު އައީ. މިތަނުގައި އަހަރެންގެ ބޮސް (ޝެފް ރިއްޕެ) އަކީ ތަފާތު ރަނގަޅު ހުނަރުވެރި މީހެއް. އޭނަގެ ފަރާތުން ވަރަށް އެއްޗެހި ދަސްވެއްޖެ. ވަރަށް އެޕްރިޝިއޭޓްކުރަން.” ޝުއައިބް ބުންޏެވެ.

ޝުއައިބް ބުނީ މިދާއިރާއަށް ވަނުމުން ވަރަށް ގިނަ މީހުން ކައްކާއަކަށްވީ ކީތްވެތޯއާއި މިއީ އަންހެންކުދިން ކުރާކަމެއްކަމަށް ބުނެއުޅޭކަމަށެވެ. ނަމަވެސް މިއަދު މި ސުވާލުތަކަށް އޭނާގެ މާބޮޑު ސަމާލުކަމެއް ނެތެވެ. މިއަދު އޭނާ ބޭނުންވަނީ މި މަސައްކަތައިގެން ކުރިއަށްދާށެވެ. އެންމެ ފުރަތަމަ ދުވަހު އޭނާއަށް ރަނގަޅަށް ފިޔާކޮޅެއްވެސް ކޮށާލަން ނޭންގެއެވެ. ނަމަވެސް މިއަދު އޭނާއަކީ މި ދާއިރާގައި ކުރިއަރަމުން އަންނަ ޒުވާން ޝެފެކެވެ. މިއަދު އޭނާ ބޭނުންވަނީ އެގްޒެކްޓިވް ޝެފަކަށްވެ މުސްތަޤްބަލުގައި އަމިއްލަ ރެސްޓޯރަންޓެއް ހުޅުވާ މިދާއިރާއިން ދެވެންއޮތް އެންމެ ކުރިއަކަށްދާށެވެ.