އަނިޔާއަށް ހުށައެޅޭ އަންހެނުންގެ ތެރެއިން އެހީތެރިކަން ހޯދަނީ ފަސްބައިކޮށްފައި އެއްބައި

އަނިޔާއަށް ހުށައެޅޭ އަންހެނުންގެ ތެރެއިން އެހީތެރިކަން ހޯދަނީ ފަސްބައިކޮށްފައި އެއްބައި އަންހެނުންކަމަށް ހިއުމަން ރައިޓްސް ރިޕޯޓް 2021 އިން ދައްކައިފިއެވެ.

ރާއްޖޭގައި އަންހެނުންނަށް ކުރާ އަނިޔާގެ މައްސަލަތައް ގިނައެވެ. ހިއުމަން ރައިޓްސް ކޮމިޝަނަށް 2021 ވަނަ އަހަރު ހުށައެޅުނު މައްސަލަތަކުގެ ތެރޭގައި އަންހެނުންގެ ހައްޤުތަކާއި މިންތީގެ ހަމަހަމަކަން މުޖްތަމައު ބަލައިގަންނަ މިންވަރު ދަށްވަމުންދާކަން ފާހަގަކުރެވިފައިވާކަމަށް ވަނީ ބުނެފައެވެ. އެގޮތުން އަންހެނުންގެ ހައްޤުތަކާއި މިންތީގެ ހަމަހަމަކަން ޤާއިމްކުރިމަށް ކުރާ މަސައްކަތައް ހުރަސްއެޅުމަށް ދީން ބޭނުންކުރާކަން ފާހަގަކުރެވިފައިވާކަން ވަނީ ބަޔާންކޮށްފައެވެ.

advertisement

މި ރިޕޯޓްގައި ބުނެފައިވަނީ އަނިޔާއަށް ހުށައެޅޭ އަންހެނުންގެ ތެރެއިން އެހީތެރިކަން ހޯދަނީ ފަސްބައިކުޅަ ދެބައި މީހުންކަމަށެވެ. އަނިޔާއަށް ހުށައެޅޭ އަންހެނުން ރިޕޯޓްކުރުމަށް ފަސްޖެހޭ ސަބަބުތަކުގެ ތެރޭގައި ނިޒާމަށް އިތުބާރު ނުކުރެވުމާއި، ސިއްރު ނުހިފެހެއްޓުމާއި، ރިޕޯޓްކުރާ ފަރާތްތަކަށް އޮންނަ ރައްކާތެރިކަން ކުޑަވުން ހިމެނޭކަމަށް ހިއުމަން ރައިޓްސް ކޮމިޝަންގެ ރިޕޯޓްގައި ވަނީ ބުނެފައެވެ. މީގެއިތުރުން ޖެންޑަރ ބޭސްޑް ވައިލަންސްގެ މައްސަލަތައް ހުށައެޅުމަށް ހަދާފައިވާ ނިޒާމްތަކަކީ ޝަކުވާ ހުށައެޅުމަށް ފަސޭހަ ނިޒާމްތަކެއް ނޫންކަން ވަނީ ފާހަގަކޮށްފައެވެ.

މި ރިޕޯޓްގައި ބުނެފައިވަނީ 2015 ވަނަ އަހަރާއި 2020 ވަނަ އަހަރު ފެމިލީ ޕްރޮޓެކްޝަން އޮޓޯރިޓީއަށް ހުށައެޅުނު ގެވެށި އަނިޔާގެ މައްސަލަތަކުގެ ތެރޭގައި ގިނަ މައްސަލަތަކަކީ އަންހެނުންނަށް އަނިޔާކޮށްގެން ހުށައެޅުނު މައްސަލަތައްކަމަށެވެ. 2015 އިން 2020 އަށް އަންހެނުނަށް އަނިޔާކޮށްގެން ޕޮލިހަށް ހުށައެޅުނު މައްސަލަތަކުގެ ތެރޭގައި ދައުވާކުރަން ފޮނުވާފައިވަނީ ހަމައެކަނި %14 މައްސަލައެވެ. 2016 އިން 2019 އަށް އަންހެނުންނަށް އަނިޔާކޮށްފައިވާ 60 މައްސަލައެއް ދައުވާކޮށްފައިވާއިރު ކުށް ސާބިތުވެފައިވަނީ 10 މައްސަލައެއްކަމަށް ފޮރޮސެކިއުޓަރ އޮފީހުގެ މައުލޫމާތުތަކުން ދައްކައެވެ.